ຖໍ້າຫົງຄໍາ ແຫຼ່ງທ່ອງທ່ຽວທີ່ມີຄວາມສວຍງາມ

  ເມືອງມໍລະດົກໂລກຫຼວງ ພະບາງດິນແດນອະລິຍະທໍາດັ້ງເດີມທີ່ຍັງຫຼົງເຫຼືອຢູ່ປະຈຸບັນໄດ້ສະທ້ອນໃຫ້ເຫັນຮາກເຫງົ້າອັນສວຍສົດງົດງາມໃນສິລະປະຂອງສະຖາປັດຕິຍະກຳ, ວັດທະນະທຳ, ປະເພນີ ແລະຂະໜົບທຳນຽມໃນການດຳລົງຊີວິດບໍ່ມີວັນຈືດຈາງ ຈຶ່ງເຮັດ ໃຫ້ເປັນເມືອງແຫ່ງມົນສະເໜ່ ແລະຄວາມສວຍງາມຂອງນໍ້າຕົກຕາດ ເພາະຄວາມເປັນເອກະລັກຂອງ ເມືອງນີ້ໄດ້ສະແດງໃຫ້ເຫັນເຖິງຄວາມສວຍງາມ.

  ຖໍ້າຫົງຄໍາເປັນສະຖານທີ່ທ່ອງທ່ຽວອີກແຫຼ່ງໜຶ່ງທີ່ໂດດເດັ່ນຊຶ່ງ ເປັນຖ້າທີ່ມີຄວາມສວຍງາມທີ່ເຕັມໄປດ້ວຍປ່າໄມ້ອັນດົກໜາແລະ ຂຽວງາມອຸ່ມທຸ່ມປົກຄຸມໄປທົ່ວທຸກບ່ອນເມື່ອແນມໄປກໍຈະເຫັນເປັນໝອກເມກຂາວໆໄຫຼລ່ອງລອຍອ້ອມຮອບບໍລິເວນຖໍ້າທີ່ສູງຊັນນັ້ນ, ນອກນັ້ນມີທິວທັດທໍາມະຊາດອັນສວຍສົດງົດງາມທີ່ອຸດົມສົມບູນໄປດ້ວຍປ່າໄມ້ອັນດົກໜາ ແລະຂຽວງາມ ອຸ່ມທຸ່ມປົກຄຸມໄປທົ່ວບໍລິເວນຖໍ້າ ເຮັດໃຫ້ອາກາດເຂດນີ້ປອດໂປ່ງ ສົດໃສດີມີສາຍລົມພັດຜ່ານມາຕາມຮ່ອມຜາປ່າໄມ້ຕະຫຼອດເວລາພາ ໃຫ້ຈິດໃຈສົດຊື່ນ.

 ຖໍ້າຫົງຄໍາ ຕັ້ງຢູ່ແຄມນໍ້າງາຂຶ້ນກັບບ້ານນໍ້າງາ ຫ່າງຈາກຕົວເມືອງປະມານ 25 ກິໂລແມັດ,ຖໍ້າຫົງຄໍາ ນີ້ໃນເມື່ອກ່ອນສະໄໝສົງຄາມເຄີຍເປັນບ່ອນລີ້ໄພຂອງປະຊາຊົນບ້ານ ດັ່ງກ່າວ ແລະໃນຍາມບຸນປີໃໝ່ ລາວປະຊາຊົນຈາກບັນດາແຂວງ ແລະເມືອງໄດ້ພາກັນມາສະເຫຼີມສະຫຼອງ ແລະມາທ່ຽວຊົມຖໍ້າຫົງຄໍາຢ່າງຫຼວງຫຼາຍ.

-----

ໂດຍ: ວົງມະນີ

• 12/02/2020