ເປຕັງ ຊີງຂັນປະທານສະໂມສອນບຶງຂະຫຍອງ ຈະເປີດສາກເສົານີ້

  ການແຂ່ງຂັນກີລາເປຕັງ ອ້ອມຂ້າງ 9 ຕົວເມືອງນະຄອນຫຼວງວຽງຈັນ ຊີງຂັນປະທານສະໂມສອນເປຕັງ ບຶງຂະຫຍອງຄັ້ງ ທີ 2 ປະຈຳປີ 2020 ເພື່ອເປັນການທົດສອບຄວາມສາມາດນັກກີລາເປຕັງນະຄອນຫຼວງວຽງຈັນ ກຽມຄວາມພ້ອມເຂົ້າຮ່ວມລ່າຫຼຽນ ຄຳງານມະຫາກຳກີລາແຫ່ງຊາດ ຄັ້ງທີ Xl ຫຼື ຊຽງຂວາງເກມ ທີ່ ແຂວງຊຽງຂວາງ ຮັບກຽດເປັນ ເຈົ້າພາບລະຫວ່າງວັນທີ 22 ມີນາ ຫາ 1 ເມສາ 2020.

  ຕາມການໃຫ້ສຳພາດຂອງ ທ່ານ ຄຳເສັງ ສູນດາລາ ປະທານ ສະໂມສອນເປຕັງບຶງຂະຫຍອງ ທັງເປັນປະທານສະຫະພັນມວຍ ລາວ, ມວຍວູຊູ, ມວຍສາກົນ ແລະ ມວຍປັນຈັກສີລັດ ນະຄອນຫຼວງວຽງຈັນ ໃນຕອນເຊົ້າວັນທີ 11 ກຸມພາ ແຈ້ງໃຫ້ຊາບວ່າ: ໃນວັນທີ 15 ກຸມພານີ້ ສະໂມສອນເປຕັງບຶງຂະຫຍອງ ຮ່ວມມືກັບສະຫະພັນເປຕັງນະຄອນຫຼວງວຽງຈັນ ຈະໄດ້ຈັດການແຂ່ງຂັນເປຕັງປະເພດທີມຄູ່ອ້ອມຂ້າງ 9 ຕົວເມືອງງນະຄອນ ຫຼວງວຽງຈັນ ທີ່ສະໂມສອນເປຕັງ ບຶງຂະຫຍອງ ເມືອງສີສັດຕະນາກ ເພື່ອເປັນການທົດສອບຄວາມສາ ມາດທັບນັກກີລານະຄອນຫຼວງ ກຽມຄວາມພ້ອມເຂົ້າຮ່ວມລ່າຫຼຽນຄຳງານມະຫາກຳກີລາແຫ່ງຊາດ ທີ່ແຂວງຊຽງຂວາງ ຮັບກຽດເປັນ ເຈົ້າພາບ.

  ດັ່ງນັ້ນ, ຈຶ່ງຂໍແຈ້ງມາຍັງບັນດາພະແນກການອ້ອມຂ້າງ, ຫ້ອງ ການ, ຂະແໜງການ, ແຂວງຕ່າງໆ ແລະບັນດາສະໂມສອນຕ່າງໆ ຈົ່ງສົ່ງນັກກີລາເຂົ້າຮ່ວມການແຂ່ງຂັນໃນຄັ້ງນີ້ດ້ວຍ ໂດຍມີການກຳນົດ ເງື່ອນນັກກີລາທີມຊາດຊຸດເຂົ້າຮ່ວມ ງານມະຫະກຳກີລາຊີເກມທີ່ປະເທດ ຟິລິບປິນ ແລະຊຸດອຸດົມໄຊ ເກມ ຈັບຄູ່ກັນລົງແຂ່ງຂັນຢ່າງເດັດຂາດ ການແຂ່ງຂັນລາຍການດັ່ງກ່າວ ຄາດວ່າຈະມີທີມເຂົ້າຮ່ວມແຂ່ງຂັນ ທັງໝົດເກືອບ 50 ທີມ.

  ການແຂ່ງຂັນຄັ້ງນີ້ສຳລັບທີມຊະນະເລີດແມ່ນຈະໄດ້ຮັບຂັນຊະນະເລີດ ພ້ອມເງີິນສົດ 5 ລ້ານກີບ, ທີ 2 ຈະໄດ້ຮັບຂັນ ແລະເງິນສົດ 2 ລ້ານກີບ, ທີ 3 ຈະໄດ້ຮັບຂັນ ແລະ ເງິນສົດ 1 ລ້ານກີບ ແລະທີ 4 ຈະ ໄດ້ຮັບລາງວັນຊົມເຊີຍ  5  ແສນກີບ ຖ້າຫາກພາກສ່ວນໃດສົນໃຈສາມາດຕິດຕໍ່ຫາປະທານສະຫະພັນເປຕັງ ນະຄອນຫຼວງ ໄດ້ທີ່ເບີໂທ 02059595224 ຫຼື 0205 651 8444 ໄດ້ຕະຫຼອດເວລາ.

----

ໂດຍ: ບຸນນິກ

แชร์