ສກມ ສີໂຄດຕະບອງ ສອບເສັງນັກຮຽນເກັ່ງ

  ເມື່ອທ້າຍອາທິດຜ່ານມານີ້ທີ່ໂຮງຮຽນມິດຕະພາບວຽງຈັນ-ໂຮຈີມິນ (ໂຮງຮຽນ ມ ປາຍສີໂຄດເກົ່າ) ນະຄອນຫຼວງວຽງຈັນ ຫ້ອງການສຶກສາທິການ ແລະກີລາເມືອງສີໂຄດຕະບອງ ໄດ້ຈັດຕັ້ງການສອບເສັງນັກຮຽນເກັ່ງຂັ້ນ ປ5, ມ4 ແລະມ7 ທົ່ວເມືອງເພື່ອຄັດເລືອກເອົານັກຮຽນເກັ່ງທີ່ເປັນຕົວແທນຂອງເມືອງເຂົ້າຮ່ວມການແຂ່ງຂັນສອບເສັງນັກຮຽນເກັ່ງຂັ້ນນະຄອນຫຼວງວຽງຈັນປະຈຳສົກຮຽນ 2019-2020 ທີ່ຈະມີຂຶ້ນໃນມໍ່ໆນີ້ໄດ້ຈັດຂຶ້ນໃນໂດຍກຽດເປັນປະທານຂອງທ່ານນາງ ພູວຽງ ແກ້ວວົງວິຈິດ ເຈົ້າເມືອງໆສີໂຄດຕະບອງ ມີຮອງຫົວໜ້າຫ້ອງການສຶກສາທິການ ແລະກີລາເມືອງ, ຄະນະຮັບຜິດຊອບການສອບເສັງ, ຄະນະກຳມະການຍາມຫ້ອງເສັງພ້ອມດ້ວຍຄູນຳພາ ແລະນັກສອບເສັງທົ່ວເມືອງສີໂຄດຕະບອງເຂົ້າຮ່ວມ.

  ການສອບເສັງຄັ້ງນີ້ມີນັກຮຽນເກັ່ງຈາກໂຮງຮຽນທັງພາກລັດ ແລະເອກະຊົນເຂົ້າຮ່ວມສອບເສັງຂັ້ນປະຖົມສຶກສາ ປ 5 ຈຳນວນ 163 ຄົນ ຍິງ 117 ຄົນ, ສອບເສັງໃນ 3 ວິຊາຄື: ວິຊາຄະນິດສາດ, ພາສາລາວ ແລະ ວິຊາໂລກອ້ອມຕົວເຮົາສ່ວນຂັ້ນມັດທະຍົມສຶກສາຕອນຕົ້ນ ມ4 ມີນັກສອບເສັງທັງໝົດ 204 ຄົນ ຍິງ 133 ຄົນ ສອບເສັງໃນ 4 ວິຊາຄື: ວິຊາພາສາລາວ-ວັນນະຄະດີ, ວິຊາຄະນິດສາດ, ຟີຊິກສາດ ແລະວິຊາວິທະຍາສາດທຳມະຊາດສ່ວນຂັ້ນມັດທະຍົມສຶກສາຕອນປາຍ ມ7 ມີນັກສອບເສັງທັງໝົດ 117 ຄົນ ຍິງ 89 ຄົນ ສອບເສັງໃນ 4 ວິຊາ ຄື: ວິຊາພາສາລາວ-ວັນນະຄະດີ, ວິຊາຟີຊິສາດ, ເຄມີສາດ ແລະວິຊາຄະນິດສາດໂດຍໄດ້ຄັດເອົານັກ ຮຽນເກັ່ງຂັ້ນປະຖົມສຶກສາ ປ5 ວິຊາລະ 3 ຄົນ ລວມ 9 ຄົນ, ຂັ້ນ ມັດທະຍົມສຶກສາ ມ4 ແລະ ມ7  ວິຊາລະ 5 ຄົນ ລວມທັງໝົດ 40 ຄົນ ເພື່ອເປັນຕົວແທນຂອງເມືອງສີໂຄດຕະບອງ ເຂົ້າຮ່ວມການແຂ່ງຂັນສອບເສັງນັກຮຽນເກັ່ງຂັ້ນນະຄອນຫຼວງວຽງຈັນ ປະຈຳສົກຮຽນ 2019-2020.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์