ແຂ່ງຂັນບານເຕະ ລາວ-ທ໊ອບ ຄັບ 2020

ເປີດສາກຂຶ້ນຢ່າງເປັນທາງການໆແຂ່ງຂັນບານເຕະ 9 ຄົນ ທົ່ວວິທະຍາໄລລາວ-ທ໊ອບ ຄັ້ງ ທີ l ປະຈຳປີ 2020 ເພື່ອສົ່ງເສີມຂະບວນການຈັດຕັ້ງປະຕິບັດຕາມ 5 ຫຼັກມູນການສຶກສາຂອງກະຊວງສຶກສາທິການ ແລະ ກີລາ ວາງອອກໃຫ້ປະກົດຜົນເປັນຈິງ ແລະ ຊົມເຊີຍວັນສ້າງຕັ້ງສະຫະພັນກຳມະບານຄົບຮອບ 64 ປີ (1 ກຸມພາ 1956 ຫາ 1 ກຸມພາ 2020) ລາຍການນີ້ມີ 8 ທີມເຂົ້າຮ່ວມ.

   ພິທີເປີດການແຂ່ງຂັນລາຍ ການດັ່ງກ່າວຈັດຂຶ້ນເມື່ອວັນທີ 1 ກຸມພາຜ່ານມາ ທີ່ສະໜາມກີລາເຕະບານຫຍ້າທຽມເຟີຣາລີ ເມືອງໄຊເສດຖານະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ກວັນ ຍົງວຸກ ປະທານ ວິທະຍາໄລ ລາວ-ທ໊ອບ ພ້ອມດ້ວຍຄະນະ ແລະຄະນະອຳນວຍການ, ພະນັກງານ, ຄູ-ອາຈານ ຕະຫຼອດ ຮອດນັກສຶກສກາ ແລະນັກກີລາ ໃນສາຂາວິຊາຮຽນເຂົ້າຮ່ວມຢ່າງຫຼວງຫຼາຍ.

  ທ່ານ ລຳໄພ ຂຸນດາວົງ ຜູ້ອຳນວຍການວິທະຍາໄລ ລາວ-ທ໊ອບ ກ່າວເປີດການແຂ່ງຂັນລາຍການດັ່ງກ່າວຂຶ້ນຢ່າງເປັນທາງການ ໃນຄັ້ງນີ້ວ່າ:ການແຂ່ງຂັນລາຍການນີ້ເປັນປີທຳອິດທີ່ຈັດຂຶ້ນຊຶ່ງມີຄວາມໝາຍຄວາມສຳຄັນເປັນຢ່າງຍິ່ງໃນການສົ່ງເສີມການປະຕິບັດ 5 ຫຼັກມູນການສຶກສາຕາມແນວທາງນະໂຍບາຍຂອງກະຊວງ ສສກ ວາງອອກໃຫ້ປະກົດຜົນເປັນຈິງພ້ອມທັງເປັນການຄັດເລືອກນັກກີລາພາຍໃນວິທະຍາໄລກຽມຕາງໜ້າເຂົ້າຮ່ວມແຂ່ງຂັນລາຍການຕ່າງໆ ພ້ອມນັ້ນກໍຍັງສົ່ງເສີມໃຫ້ນັກສຶກສາໄດ້ແລກປ່ຽນຄວາມສາມັກຄີຮັກແພງໃຫ້ເຊິ່ງກັນ ແລະກັນອີກດ້ວຍ, ເຖິງຢ່າງໃດກໍດີ,ຮຽກຮ້ອງມາຍັງນັກກີລາທຸກໆຄົນພ້ອມກັນເພີ່ມທະວີຄວາມເອົາໃຈຕໍ່ການເຂົ້າຮ່ວມກິດຈະກຳໃນຄັ້ງ ນີ້ໃຫ້ມີຜົນສຳເລັດຢ່າງຈົບງາມຮູ້ແພ້ຮູ້ຊະນະ ແລະຮູ້ໃຫ້ອະໄພເຊິ່ງກັນ ແລະກັນ.

 ການແຂ່ງຂັນລາຍການດັ່ງ ກ່າວມີ 8 ທີມເຂົ້າຮ່ວມ, ໃນນັ້ນມາຈາກພາກເຊົ້າ 3 ທີມ, ພາກບ່າຍ 1 ທີມ ແລະພາກແລງ 4 ທີມລວມກັນຈາກທັງໝົດ 5 ສາຂາວິຊາຮຽນກໍຄືສາຂາວິຊາຮຽນບໍລິຫານທຸລະກິດ, ການເງິນ-ການບັນຊີ, ໄອທີ, ຄອມພິວເຕີທຸລະກິດ ແລະພາສາອັງກິດສຳລັບ 8 ທີມ ໄດ້ຈັດແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາ ທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປເລີ່ມດຳເນີນຈົນເຖິງເດືອນມີນາ ຈຶ່ງສຳເລັດສ່ວນທີມຊະນະເລີດຈະໄດ້ຮັບຂັນແຊັມພ້ອມທຶນການສຶກສາ 1,5 ລ້ານກີບ, ທີ 2 ໄດ້ຮັບທຶນການສຶກສາ 1 ລ້ານກີບ, ທີ 3 ໄດ້ຮັບທຶນການສຶກສາ 8 ແສນກີບ ແລະທີ 4 ໄດ້ຮັບທຶນ ການສຶກສາ 5 ແສນກີບ ນອກນັ້ນກໍຍັງມີລາງວັນກອງເຊຍດີເດັ່ນ 4 ແສນກີບ ແລະດາວຍິງສູງສຸດ 1 ແສນກີບ ອີກດ້ວຍ.

แชร์