ເຈົ້າເມືອງຫີນບູນ ມອບເຄື່ອງກໍ່ສ້າງໃຫ້ແກ່ໂຮງຮຽນ ບ້ານນາໂນ

 ໃນວັນທີ 6 ກຸມພາຜ່ານມາທ່ານ ຄໍາສິງ ອໍລະວັນ ເຈົ້າ ເມືອງໆຫີນບູນພ້ອມດ້ວຍຄະນະຫ້ອງການອ້ອມຂ້າງເມືອງໄດ້ລົງມອບເຄື່ອງວັດສະດຸກໍ່ສ້ງໃຫ້ແກ່ໂຮງຮຽນບ້ານນາໂນ, ຊຶ່ງມີການຈັດຕັ້ງບ້ານ, ນັກທຸລະກິດຫ້າງຮ້ານ, ພໍ່ແມ່ປະຊາຊົນ ແລະນ້ອງນ້ອຍນັກຮຽນເຂົ້າຮ່ວມ.

  ບ້ານນາໂນ ຢູ່ຫ່າງຈາກເທສະບານເມືອງຫີນບູນປະມານ 35 ກິໂມແມັດ, ຢູ່ທາງທິດຕາເວັນອອກສຽງເໜືອ, ມີໂຮງຮຽນມັດທະຍົມຕົ້ນ 1 ຫຼັງ, ມີ 4 ຊັ້ນຮຽນ, ມີ 4 ຫ້ອງ, ມີອາຈານສອນ 8 ຄົນ, ຍິງ 4 ຄົນ, ມີນັກຮຽນທັງໝົດ 92 ຄົນ, ຍິງ 46 ຄົນ ແລະໂຮງຮຽນປະຖົມ 1 ຫຼັງ, ມີ 4 ຊັ້ນຮຽນ (ປ1 ຮອດ ປ4) ເຄື່ອງທີ່ໄດ້ລົງມາມອບແມ່ນໄດ້ມາຈາກຫຼາຍພາຍສ່ວນເຊັ່ນ: ບັນດາຫ້ອງການອ້ອມຂ້າງເມືອງ ແລະນັກທຸລະກິດຫ້າງຮ້ານປະກອບມີ: ແຮ່-ຊາຍ 1 ລົດ, ດິນ ບ໋ອກ 1.000 ກ້ອນ, ປູນຊີເມັນ 4 ໂຕນ ລວມມູນຄ່າທັງໝົດ 5 ລ້ານກີບ.

  ໃນພິທີທ່ານ ຄຳສິງ ອໍລະວັນ ຍັງໄດ້ຂຶ້ນໂອ້ລົມໂດຍໄດ້ສະແດງຄວາມເປັນຫ່ວງເປັນໄຍຕໍ່ກັບການດຳລົງຊີວິການເປັນຢູ່ຂອງພໍ່ແມ່ປະຊາຊົນ ແລະ ການສຶກສາຂອງນ້ອງນ້ອຍນັກຮຽນນັ້ນເປັນສິ່ງສຳຄັນໃນການພັດທະນາຄວາມຮູ້, ຄວາມສາມາດໃຫ້ແກ່ລູກຫຼານເປັນສິ່ງຈຳເປັນທີ່ພວກເຮົາທຸກຄົນ, ການຈັດຕັ້ງທຸກພາກສ່ວນຕ້ອງໄດ້ເອົາ ໃຈໃສ່ຮ່ວມກັນ ແລະທ່ານຍັງໄດ້ຮຽກຮ້ອງມາຍັງປະຊາຊົນພາຍໃນບ້ານຈົ່ງພ້ອມກັນຮັກສາມູນເຊື້ອອັນດີງາມຂອງຕົນກໍຄືຄວາມມີນໍ້າໃຈ, ຄວາມສາມັກຄີຊ່ວຍເຫຼືອເຊິ່ງກັນ ແລະກັນໃນການພັດທະນາບ້ານເມືອງກໍຄືພັດທະນາປະເທດຊາດຂອງພວກເຮົາ.

-------------

ຂຽນໂດຍ: ລັດດາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์