ເອຊີລີດາ ເລີ່ມໃຫ້ລູກຄ້າຖອນເງິນຜ່ານຕູ້ ເອທີເອັມ ໂດຍບໍ່ໃຊ້ບັດ

 ໃນວັນທີ 7 ກຸມພາ 2020 ທະນາຄານ ເອຊີລີດາ ລາວ ຈຳກັດ, ປະຊາທະນາຄານທີ່ທ່ານໄວ້ວາງໃຈ ແລະມີວິໄສທັດໃນການເປັນທະນາຄານຊັ້ນນຳທາງດ້ານສະໜອງແຫຼ່ງທຶນໃຫ້ແກ່ທຸລະກິດຂະໜາດນ້ອຍ ແລະຂະໜາດກາງຢູ່ໃນ ສປປ ລາວ ໄດ້ເປີດນຳໃຊ້ການບໍລິການໃໝ່ທີ່ມີຊື່ວ່າ “ການຖອນເງິນຜ່ານຕູ້ເອທີເອັມໂດຍບໍ່ນຳໃຊ້ບັດ” ຊຶ່ງລູກຄ້າຂອງທະນາຄານເອຊີລີດາລາວ ຈຳກັດ ສາມາດຖອນເງິນຜ່ານຕູ້ເອທີເອັມຂອງທະນາຄານເອຊີລີດາໂດຍບໍ່ຈຳເປັນຕ້ອງນຳໃຊ້ບັດເອທີເອັມ.

  ເນື່ອງຈາກວ່າປະຈຸບັນນີ້ການນຳໃຊ້ເຕັກໂນໂລຊີແມ່ນມີຄວາມວ່ອງໄວ ແລະ ພັດທະນາຢ່າງບໍ່ຢຸດຢັ້ງ, ປະຊາຊົນລາວ ແລະ ບຸກຄົນທົ່ວໄປໃນໂລກນີ້ມີການຍົກລະດັບຮູບ ແບບການດຳລົງຊີວິດໂດຍການນຳໃຊ້ Smart phone, ອຸປະກອນເອເລັກໂຕຣນິກແລະການບໍລິການຂອງທະນາຄານໃນຮູບແບບດິຈິຕອລທີ່ທັນສະໄໝເຊັ່ນວ່າການບໍລິການເທິງມືຖື(ເອຊີລີດາທັນໃຈ), ນອກຈາກແອັບ ແລະການເຕີບໃຫຍ່ຂະຫຍາຍໂຕຮ່ວມກັນກັບລູກຄ້າກຽດຕິມາສັກຂອງພວກເຮົາແລ້ວ, ການຖອນເງິນໂດຍບໍ່ນຳໃຊ້ບັດແມ່ນມີຄວາມສະດວກສະບາຍ, ວ່ອງໄວ ແລະມີຄວາມປອດໄພສູງ ແລະສອດຄ່ອງຕາມມາດຕະຖານສາກົນທີ່ຕອບສະໜອງຄວາມຕ້ອງການຂອງລູກຄ້າ ແລະສາທາ ລະນະຊົນໃນການໃຊ້ບໍລິການ ດິຈິຕອລ ຂອງທະນາຄານ ເອຊີລີດາ ລາວຈຳກັດ.

  ທະນາຄານ ເອຊີລີດາ ລາວ ຈຳກັດ ເປັນທະນາຄານແຫ່ງທຳອິດໃນລາວທີ່ໃຫ້ການບໍລິການຖອນເງິນໂດຍບໍ່ນຳໃຊ້ບັດຜ່ານຕູ້ ATM ໂດຍນຳໃຊ້ລະຫັດ OTP.“ການຖອນເງິນສົດຜ່ານຕູ້ເອທີເອມໂດຍບໍ່ນຳໃຊ້ບັດ” ແມ່ນຄຸນລັກສະນະໜຶ່ງຂອງເອຊີລີດາທັນໃຈຊຶ່ງລູກຄ້າສາມາດຖອນເງິນຜ່ານຕູ້ເອທີເອັມໂດຍບໍ່ຈຳເປັນຕ້ອງນຳໃຊ້ບັດເອທີເອັມ, ລູກຄ້າສາມາດຖອນເງິນຈາກບັນຊີທັນໃຈ, ບັນຊີທະນາຄານ ແລະຍັງສາມາດຖອນເງິນຈາກເບີໂທລະສັບທີ່ບໍ່ໄດ້ລົງທະບຽນນຳໃຊ້ເອຊີລີດາທັນໃຈ.

  ໃນປະຈຸບັນນີ້, ລູກຄ້າທີ່ໄດ້ນຳໃຊ້ເອຊີລີດາທັນໃຈມີຫຼາຍ 40 ພັນລູກຄ້າຫຼັງຈາກທີ່ເປີດໃຫ້ນຳໃຊ້ຢ່າງເປັນທາງການໃນກາງປີ 2018 ລູກຄ້າສາມາດໃຊ້ເອຊີລີດາ ທັນ ໃຈໃນການຊຳລະສິນຄ້າຜ່ານ QR, ການໂອນເງິນ,ການຊຳລະໃບບິນ (ນຳປະປາ,ອິນເຕີເນັດຂອງລາວໂທລະຄົມ), ການຕື່ມມູນຄ່າໂທ (ລາວໂທລະຄົມ ແລະອີທີແອລ), ກວດຍອດເງິນ, ເບິ່ງອັດຕາແລກປ່ຽນ ແລະຂໍ້ມູນອື່ນໆທີ່ກ່ຽວຂ້ອງພ້ອມທັງຈະໃຫ້ບໍລິການການຊຳລະຄ່າໃບບິນອິນເຕີເນັດ, ການຕື່່ມມູນຄ່າທີ່ຫຼາກຫຼາຍເຄືອຂ່າຍແລະການຊຳລະອື່ນໆອີກໃນໄວໆນີ້.

  ປະຈຸບັນ, ກຸ່ມຂອງເອຊີລີດາ ມີທະນາຄານເອຊີລີດາມະຫາຊົນຊຶ່ງເປັນບໍລິສັດແມ່ ແລະມີ 4 ບໍລິສັດລູກທີ່ປະຕິບັດງານຢູ່ກຳປູເຈຍ, ສປປ ລາວ ແລະມຽນມາ ແລະໃຫ້ບໍລິການໂອນເງິນໃນທົ່ວໂລກ, ກຸ່ມເອຊີລີດາມີຊັບສິນລວມທັງໝົດເກືອບ 6 ຕື້ໂດລາສະຫະລັດ ແລະ ມີ 313 ສາຂາ, ຕູ້ເອທີເອັມ 683 ຕູ້ ແລະ ໃຫ້ບໍລິການລູກຄ້າ ຫຼາຍລ້ານຄົນໂດຍນຳໃຊ້ຜະລິດຕະພັນ ແລະການບໍລິການຂອງທະນາຄານ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์