ລາວຮັບເຄື່ອງກວດເຊື້ອໂຄໂຣນາ

  ໃນວັນທີ 10 ກຸມພາ 2020, ທາງບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າ ຈຳກັດຜູ້ດຽວ, ໄດ້ນຳເຄື່ອງກວດຫາເຊື້ອພະຍາດອັກເສບປອດເຊື້ອຈຸລາໂລກສາຍພັນໃໝ່ ຫຼື ໂຄໂຣນາໄວຣັດ, ພ້ອມດ້ວຍອຸປະກອນຮັບໃຊ້ຈຳນວນໜຶ່ງລວມມູນຄ່າທັງໝົດ 2,05 ແສນໂດລາສະຫະລັດ.

  ໂດຍການກ່າວມອບຂອງ ທ່ານ ປີຊາໄຊ ແກ້ວໄຊຍະຈັກ ປະທານບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າ ຈຳກັດຜູ້ດຽວ, ຕາງໜ້າຮັບຂອງ ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນ, ທັງເປັນປະທານຄະນະກຳມະການສະເພາະກິດປ້ອງກັນ ແລະ ຄວບຄຸມພະຍາດອັກເສບປອດທີ່ເກີດ ຈາກເຊື້ອຈຸລະໂລກສາຍພັນໃໝ່ ຫຼືໂຄໂຣນາ ໄວຣັດ, ໂດຍເຂົ້າຮ່ວມມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ມີຫົວໜ້າຫ້ອງການກະຊວງການເງິນ, ຄະນະກົມ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 ສຳລັບເຄື່ອງທີ່ນຳມາມອບໃນຄັ້ງນີ້, ເປັນການຊ່ວຍເຫຼືອລ້າຈາກບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າຈຳກັດ ຜູ້ດຽວ, ຊຶ່ງປະກອບມີເຄື່ອງກວດເຊື້ອພະຍາດຈຳນວນ 2 ເຄື່ອງ; ນໍ້າຢາກວດຫາເຊື້ອພະຍາດ 2.500 ຫຼອດ, ຖົງມືຈຳນວນ 40.000 ຄູ່; ເຄື່ອງນຸ່ງປ້ອງກັນເຊື້ອໂລກຈຳນວນ 1.200 ຊຸດ ລວມມູນຄ່າທັງໝົດ 2,05 ແສນໂດລາສະຫະລັດ.

  ໂອກາດນີ້, ທ່ານ ສົມດີ ດວງດີ ໄດ້ກ່າວຊົມເຊີຍ ແລະສະແດງຄວາມຮູ້ບຸນຄຸນຢ່າງສູງຕໍ່ການຊ່ວຍເຫຼືອດັ່ງກ່າວ, ຊຶ່ງເຫັນວ່າມີຄວາມສຳຄັນຈຳເປັນທີ່ສຸດຕໍ່ລັດຖະບານ ສປປ ລາວ ໃນປະຈຸບັນເພື່ອຕອບໂຕ້ການແຜ່ລະບາດຂອງເຊື້ອໄວຣັດໂຄໂຣນາ ແລະຈະນຳໃຊ້ເຄື່ອງຊ່ວຍເຫຼືອດັ່ງກ່າວເຂົ້າໃນວຽກງານຢ່າງມີປະສິດທິຜົນຂະນະດຽວກັນ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກໄດ້ສະແດງຄວາມຂອບໃຈມາຍັງບໍລິສັດທີ່ປຶກສາດ້ານການລົງທຶນແລະກໍ່ສ້າງເຂື່ອນໄຟຟ້າ ຈຳກັດຜູ້ດຽວ ໃນການຊ່ວຍເຫຼືອເຄື່ອງ ແລະອຸປະກອນຄັັ້ງນີ້, ຊຶ່ງຈະສາມາດຊ່ວຍໃນດ້ານການແພດມີປະສິດທິພາບຂຶ້ນຕື່ມ.

  ພ້ອມນັ້ນ, ຍັງໄດ້ແຈ້ງໃຫ້ຮູ້ຜ່ານສື່ມວນຊົນວ່າມາເຖິງປະຈຸບັນຢູ່ ສປປ ລາວ ແມ່ນຍັງບໍ່ທັນມີກໍລະນີໃດທີ່ຢັ້ງຢືນວ່າແມ່ນເຊື້ອພະຍາດໂຄໂຣນາໄວຣັດເທື່ອທັງນີ້, ກໍເພື່ອເຮັດໃຫ້ສັງຄົມກໍຄືປະຊາຊົນລາວບໍ່ໃຫ້ກັງວົນ ແລະເຊື່ອໃນສື່ສັງຄົມອອນລາຍຕ່າງໆທີ່ເຜີຍແຜ່ອອກໄປນັ້ນແຕ່ຢ່າງໃດກໍດີທາງລັດຖະບານລາວໂດຍສະເພາະແມ່ນກະຊວງສາທາລະນະສຸກໄດ້ເຝົ້າລະວັງຢ່າງເຂັ້ມງວດພາຍໃຕ້ການຊີ້ນຳຂອງລັດຖະບານຢ່າງໃກ້ຊິດ, ຊຶ່ງໄດ້ເອົາໃຈໃສ່ກວດກາເຂັ້ມງວດຢູ່ບາງດ່ານສາກົນ, ສະໜາມບິນທີ່ມີຊາຍ ແດນຕິດຈອດກັບ ສປ ຈີນ.

--------------------

ຂຽນໂດຍ: ກະຊວງການເງິນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์