ເຜີຍແຜ່ບົດລາຍງານດ້ານສິດທິມະນຸດ

 ວັນທີ 10 ກຸມພາ 2020 ທີ່ນະຄອນຫຼວງວຽງຈັນ ກະຊວງການຕ່າງປະເທດໄດ້ຈັດກອງປະຊຸມເຜີຍແຜ່ຜົນສຳເລັດຂອງຄະນະຜູ້ແທນລາວໃນການເຂົ້າຮ່ວມການທົບທວນບົດລາຍງານແຫ່ງຊາດດ້ານສິດທິມະນຸດຂອງ ສປປ ລາວ ພາຍໃຕ້ກົນໄກການທົບທວນປະຈຳໄລຍະ ຫຼື Penodic Review (UPR) ຮອບວຽກທີ 3 ຂອງສະ ພາສິດທິມະນຸດໃນລະຫວ່າງວັນທີ 21-24 ມັງກອນ 2020 ທີ່ສຳນັກງານຂອງອົງການສະຫະປະຊາຊາດ (ສປຊ) ທີ່ເຊີແນວ, ປະເທດສະວີສໍໂດຍເປັນປະທານຂອງ ທ່ານ ບຸນເກີດ ສັງສົມສັກ ລັດຖະມົນຕີປະຈຳສຳນັກງານນາຍົກລັດຖະມົນຕີປະທານຄະນະກຳມະການແຫ່ງຊາດວ່າດ້ວຍສິດທິມະນຸດພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ບຸນເກີດ ສັງສົມສັກ ໃຫ້ຮູ້ວ່າ: ການຈັດກອງປະຊຸມຄັ້ງນີ້ເປັນເວທີໜຶ່ງທີ່ສຳຄັນໃນການຕອບໂຕ້ການກ່າວຫາທີ່ບໍ່ສ້າງສັນຕໍ່ ສປປ ລາວ, ເປັນໂອກາດທີ່ດີເພື່ອໂຄ ສະນາ, ຊີ້ແຈງ ແລະ ອະທິບາຍກ່ຽວກັບນະໂຍບາຍທີ່ຖືກຕ້ອງ ແລະ ເປັນທຳຂອງລັດຖະບານໃນວຽກງານສິດທິມະນຸດພ້ອມດຽວກັນນັ້ນທ່ານຍັງໄດ້ຍົກໃຫ້ເຫັນຜົນສຳ ເລັດໃນການເຂົ້າຮ່ວມຂະບວນການທົບທວນ UPR ຮອບວຽນທີ 3 ຂອງ ສປປ ລາວ ໃນຄັ້ງນີ້.

  ໃນກອງປະຊຸມດັ່ງກ່າວຍັງໄດ້ແລກປ່ຽນ ແລະປະກອບຄຳຄິດຄຳເຫັນຢ່າງກົງໄປກົງມາພ້ອມທັງມີຂໍ້ສະເໜີທັງໝົດຈຳນວນ 226 ເພື່ອສະເໜີໃຫ້ ສປປ ລາວ ນຳໄປພິຈາລະນາຮັບຮອງເອົາໄປຈັດຕັ້ງປະຕິບັດໃນ 4,5 ປີຂ້າງໜ້າ ຊຶ່ງໃນນັ້ນຜູ້ແທນໄດ້ຕົກລົງນຳເອົາຂໍ້ສະເໜີແນະນຳ ທັງໝົດນັ້ນມາຄົ້ນຄວ້າ ແລະ ປຶກສາຫາລືຮ່ວມກັບພາກສ່ວນຕ່າງໆທີ່ກ່ຽວຂ້ອງເພື່ອພິຈາລະນາ ແລະ ຈະຕ້ອງໄປລາຍງານຄືນໃນກອງປະຊຸມສະພາສິດທິມະນຸດຄັ້ງທີ 44 ທີ່ຈະຈັດຂຶ້ນໃນເດືອນ ມິຖຸນາ 2020 ທີ່ຈະມາເຖິງນີ້.

______________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์