ລັດຖະມົນຕີກະຊວງ ຮສສ ມອບເງິນຊ່ວຍເຫຼືອ 4 ແຂວງພາກໃຕ້

  ເພື່ອເປັນຂວັນກຳລັງໃຈໃຫ້ກັບຂະແໜງ ຮສສ ບັນດາແຂວງນັບແຕ່ສູນກາງຈົນຮອດທ້ອງຖິ່ນກ້າວເຂົ້າສູ່ໄລຍະການຈັດຕັ້ງປະຕິບັດແຜນພັດທະນາວຽກງານແຮງງານ ແລະສະຫວັດດີການສັງຄົມ ປີ 2020 ໂດຍສະເພາະແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8, ພ້ອມທັງໄລຍະທ້າຍສະໄໝມະຕິກອງປະຊຸມໃຫຍ່ ຄັ້ງທີ X ຂອງພັກໃຫ້ປະກົດຜົນເປັນຈິງເທື່ອລະກ້າວ, ໃນລະຫວ່າງວັນທີ 5-7 ກຸມພາຜ່ານມາ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ພ້ອມຄະນະໄດ້ລົງເຄື່ອນໄຫວເຮັດວຽກຢູ່ແຂວງສາລະວັນ, ເຊກອງ, ອັດຕະປື ແລະແຂວງຈຳປາສັກ.

  ໃນກອງປະຊຸມບັນດາພະແນກ ຮສສ ແຂວງຍັງໄດ້ຍົກຜົນງານທີ່ພົ້ນເດັ່ນບາງດ້ານທີ່ພະແນກຍາດມາໄດ້ໃນໄລຍະປີ 2019 ຜ່ານມາໂດຍໄດ້ເອົາໃຈໃສ່ປະຕິບັດພາລະບົດບາດ ແລະ ໜ້າທີ່ຂອງຕົນຢ່າງຕັ້ງໜ້າ ແລະ ໄດ້ມີຜົນສຳເລັດຫຼາຍດ້ານເປັນຕົ້ນຄົ້ນຄວ້າສ້າງກົດໝາຍ ແລະ ລະບຽບການຕ່າງໆ ພ້ອມທັງໄດ້ຈັດຕັ້ງປະຕິບັດຢ່າງກວ້າງຂວາງ ແລະມີຄວາມສັກສິດກວ່າເກົ່າ; ການຈັດຕັ້ງປະຕິບັດຕົວເລກຄາດໝາຍສູ້ຊົນຫຼາຍດ້ານກໍມີຄວາມຄືບໜ້າດີຂຶ້ນເຊັ່ນ: ຕົວເລກການພັດທະນາສີມືແຮງງານ, ການຈັດຫາວຽກເຮັດງານທຳ, ການຄຸ້ມຄອງແຮງງານ, ອັດຕາການຂະຫຍາຍປະກັນສັງຄົມ, ນະໂຍບາຍສະແດງຄວາມກະຕັນຍູຕໍ່ຜູ້ມີຜົນງານ, ວຽກສັງຄົມສົງເຄາະ ແລະໄພພິບັດ,ວຽກເກັບກູ້ລະເບີດຕົກຄ້າງບໍ່ທັນແຕກ ແລະວຽກກາແດງ, ເຖິງແມ່ນວ່າໃນປີຜ່ານມາຈະປະເຊີນໜ້າໜັກໜ່ວງກັບສະພາບໄພພິບັດທາງທຳມະຊາດຍ້ອນການປ່ຽນແປງດິນຟ້າອາກາດເກີດໄພແຫ້ງແລ້ງ ແລະນໍ້າຖ້ວມໄຫຼສຸແຮງສົ່ງຜົນກະທົບໃຫ້ແກ່ຊັບສິນ ແລະຊີວິດຂອງປະຊາຊົນຢູ່ບັນດາເມືອງ ແລະແຂວງ.

  ນອກນັ້ນໃນການຢ້ຽມຢາມໃນຄັ້ງຍັງມອບເງິນຊ່ວຍເຫຼືອ ບັນດາ 4 ແຂວງ. ໃນນັ້ນລວມມີ: ແຂວງສາລະວັນ, ເຊກອງ ໄດ້ຮັບເຄື່ອງນຸ່ງຫົ່ມແຂວງລະຈຳນວນ 100 ແກັດ ລວມເປັນເງິນ 150 ລ້ານກີບ, ເກືອກິນ 3 ໂຕນ ເປັນເງິນ 9 ລ້ານກີບ ລວມທັງໝົດ159 ລ້ານກວ່າກີບ, ແຂວງອັດຕະປືເຄື່ອງນຸ່ງຫົ່ມ 30 ແກັດ ມູນຄ່າ 45 ລ້ານກີບ, ເງິນ 30 ລ້ານ, ລວມທັງໝົດ 75 ລ້ານກີບແລະແຂວງຈຳປາສັກໄດ້ຮັບເຄື່ອງນຸ່ງຫົ່ມ 100 ແກັດ ມູນຄ່າ 150 ລ້ານກີບ, ເກືອກິນ 2,5 ໂຕນ ມູນຄ່າ 7 ລ້ານກວ່າກີບລວມທັງໝົດ 157 ລ້ານກວ່າກີບ ເພື່ອຊ່ວຍເຫຼືອໄພພິບັດຕື່ມອີກ.

_____________

ຂຽນໂດຍ: ຟ້າ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์