ໂຄງການຮ່ວມໃຈ ສາຍໄຍໂລມາຄໍາ ຈະໃຊ້ທຶນ 1 ຕື້ກີບ ແກ້ທຸກຍາກຢູ່ເມືອງນອງ

  ເພື່ອຜັນຂະຫຍາຍຂະບວນການແຂ່ງຂັນຮັກຊາດ ແລະພັດທະນາຊົນນະບົດລຶບລ້າງຄວາມທຸກຍາກໃຫ້ໄດ້ຖືກຈັດຕັ້ງປະຕິບັດຢ່າງເປັນຮູບປະທຳທ່ານ ເກ໊ຍ ອຸ໋ສິດທິເດດ ເຈົ້າຂອງໂຮງງານນ້ຳດື່ມ-ນ້ຳກ້ອນໂລມາຄຳ ແລະທ່ານ ສາຍ ສະໝອນກວານ ເມືອງຈັນອຳນວຍການສະຖາບັນການເງິນຈຸລະພາກສາຍໄຍສຳພັນແຂວງສະຫວັນນະເຂດຈຶ່ງໄດ້ຈັບມືກັນໃຊ້ທຶນເບື້ອງຕົ້ນຜູ້ລະ 500 ລ້ານກີບ ເພື່ອປະກອບສ່ວນຊຸກຍູ້ສົ່ງເສີມສ້າງເສດຖະກິດຄອບຄົວ ແລະບ້ານເປົ້າໝາຍທີ່ຍັງທຸກຍາກຂາດເຂີນຢູ່ 3 ບ້ານຂອງເມືອງນອງໃຫ້ມີອາຊີບຄົງທີ່ ແລະລາຍຮັບທີ່ຍືນຍົງ.  

   ທ່ານ ເກ໊ຍ ອຸ໋ສິດທິເດດ ໄດ້ຕາງໜ້າໂຄງການເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມ ຮູ້ວ່າ: ການຮ່ວມມືກັນໃນຄັ້ງນີ້ແມ່ນເລີ່ມມາແຕ່ກາງເດືອນທັນວາ 2019 ເປັນຕົ້ນມາໂດຍຕາມແຜນໂຄງການແມ່ນຈະດຳເນີນນຳ 165 ຄອບຄົວທຸກຍາກຢູ່ 3 ບ້ານຄື: ບ້ານປະ ແນະ 78 ຄອບຄົວ, ຕາຢົງ 49 ຄອບຄົວ ແລະອີກ 38 ຄອບຄົວແມ່ນຢູ່ບ້ານລະໃກ້ທີ່ຂຶ້ນກັບຈຸດສຸມຕັງອາໄລ-ລະແບງ ເມືອງນອງ ແຂວງສະຫວັນນະເຂດ ຊຶ່ງປະຈຸບັນໃນຈຳນວນຄອບຄົວເຫຼົ່ານີ້ແມ່ນຍັງທຸກຍາກຂາດເຂີນ ແລະບໍ່ມີອາຊີບຄົງທີ່ຊອກຢູ່ຫາກິນຕາມທຳມະຊາດ.

  ສຳລັບຮູບແບບ ຫຼື ວິທີການເຮັດເລີ່ມຕົ້ນລົງສຳຫຼວດຄອບຄົວເປົ້າໝາຍຢູ່ແຕ່ລະບ້ານ ແລະຄວາມຕ້ອງການຂອງປະ ຊາຊົນທີ່ສົມເຫດສົມຜົນ; ສຳຫຼວດຈັດຫາແຫຼ່ງນ້ຳໃຫ້ແຕ່ລະບ້ານເປົ້າໝາຍ ແລະບ້ານນອກເປົ້າໝາຍໂດຍໂຄງການຈະຈັດຫາດິນເຮັດສວນປູກພືດເພື່ອຊຸກຍູ້ປະຊາຊົນເຮັດສວນພືດຄົວເຮືອນໃຫ້ຕໍ່ເນື່ອງທີ່ຖືກຕາມວິທີ-ເຕັກນິກ ຮັບປະກັນດ້ານປະສິດທິຜົນ ແລະສ້າງຄວາມເຊື່ອໝັ້ນ, ຈູງໃຈໃຫ້ແກ່ຜູ້ຜະລິດ; ຊຸກຍູ້ປະຊາຊົນເຮັດສວນປູກ, ປູກພືດຫຼາຍຊະນິດປະສົມ, ພືດໄລຍະສັ້ນ, ພືດໄລຍະກາງ,ພືດໄລຍະຍາວເພື່ອໃຫ້ເປັນແຫຼ່ງອາຫານ ແລະແຫຼ່ງລາຍຮັບຈຶ່ງສົ່ງເສີມການລ້ຽງສັດໃຫ້ກັບເຂົາເຈົ້າໄດ້ມີຜົນປະໂຫຍດຕໍ່ເນື່ອງໂດຍນຳໃຊ້ເນື້ອທີ່ສວນນັ້ນເປັນບ່ອນຜະລິດຄົງທີ່ ແລະຍືນຍົງ, ໃຫ້ຫຼຸດຜ່ອນ ແລະຢຸດຕິການຖາງປ່າເຮັດໄຮ່, ປູກເຂົ້າທີ່ເລື່ອນລອຍ.

  ເຮັດສວນກ້າເບ້ຍ, ອະນຸບານເບ້ຍໄມ້, ອະນຸບານສັດ ຢູ່ 2 ຈຸດ ຢູ່ສູນຈຸດສຸມຕັງອາໄລ ແລະຢູ່ສວນປູກຂອງໂຮງຮຽນປະຖົມບ້ານຕະຢົງເພື່ອຢາກໃຫ້ນັກຮຽນ ແລະປະ ຊາຊົນໄດ້ມາຮຽນຮູ້ຂັ້ນຕອນການປູກ, ການລ້ຽງ, ການຮັກສາບົວລະບັດ, ການເຮັດຝຸ່ນບົ່ມທີ່ຖືກວິທີແລ້ວແຈກຢາຍໃຫ້ກັບປະຊາຊົນນຳໄປປູກ, ໄປລ້ຽງນອກຈາກນັ້ນຍັງຈະຊຸກຍູ້ສົ່ງເສີມມູນເຊື້ອໃນການເຮັດຫັດຖະກຳເປັນຕົ້ນ: ການຕໍ່າຫູກ ແລະຈັກສານ.

  ແນວໃດກໍດີເພື່ອໃຫ້ເປົ້າໝາຍທີ່ໂຄງການໄດ້ວາງໄວ້ທ່ານ ເກ໊ຍ ອຸ໋ສິດທິເດດ ຍັງໄດ້ສະເໜີໃຫ້ອົງການຈັດຕັ້ງແຕ່ງຕັ້ງພະນັກງານວິຊາການ-ເຕັກນິກຜູ້ຊຳນານງານໄດ້ນຳພາທີມງານຮ່ວມໃຈສາຍໄຍ ໂລມາຄຳ ຜູ້ມີສ່ວນຮ່ວມລົງເຮັດວຽກຕົວຈິງເພື່ອຮ່ວມກັນເຮັດໜ້າທີ່ຊຸກຍູ້ສົ່ງເສີມປະຊາຊົນໃຫ້ເຂົ້າຮ່ວມກິດຈະກຳຂອງໂຄງການເພື່ອເກີດຜົນປະໂຫຍດຕົວຈິງອັນໄວແກ່ປະຊາຊົນ.

  ຂະນະທີ່ໃນວັນທີ 7 ກຸມພາຜ່ານມາທີ່ສະໂມສອນຈຸດສຸມຕັງອາໄລ-ລະແບງ ໂຄງການດັ່ງກ່າວກໍໄດ້ມີການຈັດກອງປະຊຸມປຶກສາຫາລືຄວາມຄືບໜ້າການຈັດຕັ້ງປະຕິ ບັດໄລຍະ 1 ເດືອນຜ່ານມາ ໂດຍເປັນປະທານຂອງທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆນອງທັງເປັນຜູ້ຊີ້ນຳວຽກງານດັ່ງກ່າວພ້ອມນີ້ກໍມີທ່ານ ເກ໊ຍ ອູ໋ສິດທິເດດ, ທ່ານ ສາຍສະໝອນ ກວານເມືອງຈັນ, ບັນດາຫົວໜ້າ ແລະພາກສ່ວນຫ້ອງການທີ່ກ່ຽວຂ້ອງເຂົ້າຮ່ວມ.

   ໂດຍໃນ 1 ເດືອນຜ່ານມາທ່ານ ເກ໊ຍ ອຸ໋ສິດທິເດດ ເປີດເຜີຍວ່າ: ໂຄງການແມ່ນໄດ້ເຈາະສ້າງບາດານໃຫຍ່ໃຫ້ກັບ 5 ບ້ານ; ເປົ້າໝາຍ 3 ບ້ານ, ນອກເປົ້າໝາຍ 2 ບ້ານຈຳນວນ 9 ສ້າງ ປະຊາຊົນໄດ້ ຊົມໃຊ້ແລ້ວ; ສຳຫຼວດ, ອອກແບບ, ກຳ ລັງຈະສ້າງຝາຍນ້ຳລົ້ນຂະໜາດນ້ອຍ ຢູ່ 3 ຈຸດ, 3 ບ້ານ; ໄດ້ເຮັດສວນ, ກ້າເບ້ຍ ພືດ ແລະອະນຸບານພືດເປັນຕົ້ນ: ໝາກເຜັດ, ໝາກຫຸ່ງ, ໜໍ່ກ້ວຍ, ຂີງ, ຂ່າ, ໜໍ່ແຂມ, ໜໍ່ຫວາຍ ແລະອື່ນໆ ຢູ່ 2 ຈຸດ ເພື່ອໃຫ້ປະຊາຊົນ ແລະນັກຮຽນມາຮຽນຮູ້ໃນຂັ້ນຕອນການປູກ-ການລ້ຽງ ແລະການບົວລະບັດທີ່ຖືກວິທີ.

______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์