ອາຊີບຊາວນາກໍ່ພົ້ນທຸກໄດ້

 ປະຊາຊົນລາວສ່ວນໃຫຍ່ຢຶດຖືອາຊີບປູກຝັງ-ລ້ຽງສັດເປັນຕົ້ນຕໍຍ້ອນພື້ນຖານຄອບຄົວທີ່ພໍ່ແມ່ປູຍ່າຕາຍາຍມີມາເຊັ່ນ: ການເຮັດນາປູກເຂົ້າແລະການລ້ຽງສັດເພື່ອຮັບໃຊ້ໃນຄອບຄົວເປັນຕົ້ນມາເຖິງປະຈຸບັນຊຶ່ງເປັນຍຸກເສດຖະກິດຕະຫຼາດພັກ-ລັດໄດ້ມີແນວທາງນະໂຍບາຍເພື່ອຊຸກຍູ້ສົ່ງເສີມການຜະລິດຂອງປະຊາຊົນໃຫ້ກາຍເປັນສິນຄ້າແກ້ໄຂຄວາມທຸກຍາກໃນຄອບຄົວ;ມີຫຼາຍຄອບຄົວໄດ້ມີຄວາມຕື່ນຕົວຫັນປ່ຽນການຜະລິດດັ່ງເດີມມາຜະລິດເປັນສິນຄ້າໂດຍອີງໃສ່ທ່າແຮງ ແລະມູນເຊື້ອຄວາມດຸໝັ້ນຂະ ຫຍັນພຽນຈຶ່ງເຮັດໃຫ້ຫຼາຍຄອບຄົວສາມາດຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.

 ຄອບຄົວຂອງ ທ່ານ ນາງ ຄໍາແກ້ວ ເທບພະວົງ ອາຍຸ 50 ປີ ຢູ່ບ້ານບຶງໄຊ ເມືອງສາລະວັນ ແຂວງສາລະວັນ; ມີສະມາຊິກໃນຄອບຄົວ 6 ຄົນ, ລູກ 4 ຄົນ; ມີແຮງ ງານຕົ້ນຕໍ 2 ຄົນ, ທ່ານໃຫ້ຮູ້ວ່າ: ເລີ່ມເຮັດນາມາແຕ່ປີ 1999 ແຕ່ໃນເວລານັ້ນແມ່ນເຮັດແບບຄອງເດີມບໍ່ທັນມີວິຊາການມາແນະນໍາ ແລະເຂົ້າຍັງບໍ່ທັນມີລາຄາສູງ, ຮອດປີ 2013 ຍ້ອນໄດ້ມີການຊຸກຍູ້ສົ່ງເສີມການຜະລິດເປັນສິນຄ້າຂອງພັກ-ລັດ ຄອບຄົວຕົນເອງຈຶ່ງໄດ້ຮັບການຊ່ວຍເຫຼືອທາງດ້ານວິຊາການຈາກແຂວງ, ເມືອງກ່ຽວ ກັບວິທີການປູກ,ບົວລະບັດຮັກສາ ແລະສະໜອງແນວພັນທີ່ເໝາະສົມກັບດິນນາ, ຈາກນັ້ນມາເຫັນວ່າຜົນຜະລິດເຂົ້າໄດ້ເພີ່ມຂຶ້ນ; ເນື້ອທີ່ນາທັງໝົດມີ 2,4 ເຮັກຕາ, ເຮັດນາແຊງຈໍານວນໜຶ່ງລວມທັງນາປີ ແລະນາແຊງໄດ້ເຂົ້າປະມານ 400 ກວ່າເປົ໋າ, ເປົ໋າລະ 40 ກິໂລ ໃນປີໜຶ່ງຈະຂາຍເຂົ້າອອປະມານ 300 ກວ່າເປົ໋າສ່ວນທີ່ເຫຼືອແຮ່ໄວ້ກິນໃນຄອບຄົວ; ຂາຍກິໂລໜຶ່ງ 2-2,5 ພັນກີບ, ລວມລາຍຮັບຈາກການຂາຍເຂົ້າປີໜຶ່ງປະມານ 40 ລ້ານກວ່າກີບ.

 ນອກຈາກເຮັດນາປູກເຂົ້າ ແລ້ວຄອບຄົວຍັງໄດ້ເຮັດເສື່ອນອນເປັນຊຸດຂາຍໃນລາຄາຊຸດລະ 1 ລ້ານກວ່າກີບຂຶ້ນໄປແລ້ວແຕ່ໜ້າກວ້າງຂອງເສື່ອປີໜຶ່ງຂາຍໄດ້ປະມານ 20 ລ້ານກວ່າກີບ ລວມລາຍ ຮັບຈາກການຂາຍເຂົ້າ, ຂາຍເສື່ອນອນປີໜຶ່ງໄດ້ປະມານ 60 ລ້ານກວ່າກີບ, ດັ່ງນັ້ນ ຈຶ່ງເຮັດໃຫ້ຖານະຄອບຄົວດີຂຶ້ນ, ມີເງິນສົ່ງລູກຮຽນ, ເຮັດເຮືອນຖາວອນຢູ່,ຊື້ລົດຈັກໃຫ້ລູກ, ມີເງິນເກັບໄວ້ໃຊ້ໃນຄອບຄົວ ແລະອື່ນໆ,ເຮັດໃຫ້ຄອບຄົວຖືກຮັບຮອງເປັນຄອບຄົວຕົວແບບໃນການຜະລິດເຂົ້າເປັນສິນຄ້າໃນປີ 2013 ເປັນຕົ້ນມາ.

 ໃນຕໍ່ໜ້າຄອບຄົວຈະສືບຕໍ່ປູກເຂົ້າໃຫ້ໄດ້ຫຼາຍທົດແທນເຂົ້າທີ່ຖືກເສຍຫາຍຈາກໄຟນໍ້າຖ້ວມໃນປີ 2019, ເອົາໃຈໃສ່ປົກປັກຮັກສາ ແລະຜະລິດຝຸ່ນອົງຂະທາດໃຫ້ພຽງພໍກັບເນື້ອທີ່ນາ, ຊອກຫາວິທີ່ກຳຈັດສັດຕູພືດເພື່ອເຮັດໃຫ້ສະມັດຕະພາບຂອງເຂົ້າດີຂຶ້ນກວ່າເກົ່າ.  

-----

ຂຽນໂດຍ: ມີນາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์