ຫຼາຍສາເຫດທີ່ເຮັດໃຫ້ການເກັບລາຍຮັບແຂວງເຊກອງ ບໍ່ບັນລຸຕາມແຜນ

 ທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງເຊກອງໃຫ້ຮູ້ວ່າ: ໃນປີ 2019 ສາມາດຈັດຕັ້ງປະຕິບັດການເກັບລາຍຮັບເຂົ້າງົບປະມານໄດ້ທັງໝົດ 73,26 ຕື້ກີບ, ທຽບໃສ່ແຜນປະຕິບັດໄດ້ 91,47% ໃນນັ້ນປະກອບມີລາຍຮັບພູດສູນກາງ 6,78 ຕື້ກີບ ທຽບໃສ່ແຜນການປີເທົ່າ 82,97% ໃນນັ້ນລາຍຮັບພາສີ 5,34 ຕື້ກີບ ທຽບໃສ່ແຜນປີ 66,72 % ແລະ ລາຍຮັບພູດທ້ອງຖິ່ນ 66,48 ຕື້ກີບ ທຽບໃສ່ແຜນປີປະຕິບັດໄດ້ 92,44%, ລາຍຮັບສ່ວນໃຫຍ່ທີ່ເປັນພູດທ້ອງຖິ່ນແມ່ນໄດ້ຈາກສ່ວຍສາອາກອນ 56 ຕື້ກີບ ທຽບໃສ່ແຜນປີປະຕິບັດໄດ້ 87% ໄດ້ຈາກຊັບສິນ 10,48 ຕື້ກີບ ທຽບໃສ່ແຜນປີປະຕິບັດໄດ້ 133% ຂອງລາຍຮັບທັງໝົດ.  

  ທ່ານ ຄໍາຮູ້ ອ່ອນມະນີ ໃຫ້ຮູ້ຕື່ມວ່າ: ມີຫຼາຍສາເຫດທີ່ເຮັດໃຫ້ການເກັບລາຍຮັບເຂົ້າງົບປະມານບໍ່ບັນລຸໄດ້ຕາມແຜນເປັນຕົ້ນແມ່ນລາຍຮັບສ່ວຍສາອາກອນສາມາດຈັດ ຕັ້ງປະຕິບັດໄດ້ພຽງແຕ່ 87% ຂອງແຜນການປີເນື່ອງຈາກມີຫຼາຍປັດໄຈທີ່ເປັນຜົນພວງ ແລະ ເກີດມີສິ່ງທ້າທາຍໂດຍສະເພາະການຂຶ້ນແຜນຄາດຄະເນເກັບລາຍຮັບຂອງຂະແໜງການລາຍຮັບທົ່ວແຂວງຕາມຖານຂໍ້ມູນຄວາມອາດສາມາດໃນການຈັດເກັບລາຍຮັບທັງໝົດ 74 ຕື້ກີບ ໃນນັ້ນ, ລາຍຮັບຈາກສ່ວຍສາອາກອນ 66,1 ຕື້ກີບ ແຕ່ໃນນັ້ນປະກອບມີລາຍຮັບຄ່າ ບໍລິການຫາເພື່ອຈ່າຍ 7 ຕື້ກີບ ແລະ ລາຍຮັບຈາກຊັບສິນ 7,9 ຕື້ກີບ ພາຍຫຼັງທີ່ສະພາແຫ່ງຊາດຮັບຮອງເອົາງົບປະມານປະຈໍາປີ ກະຊວງການເງິນໄດ້ເພີ່ມຕົວເລກລາຍຮັບໃຫ້ທ້ອງຖິ່ນ 78 ຕື້ກີບ ຜ່ານການຈັດຕັ້ງປະຕິບັດການເກັບລາຍຮັບ 6ເດືອນຕົ້ນປີ ແລະມີແຈ້ງການເລກທີ 0016/ກງ ແລະຄໍາແນະນໍາເລກທີ 0743/ຫກງ ກ່ຽວກັບບ້ວງລາຍຮັບວິຊາ ການຕິດພັນກັບບ້ວງລາຍຈ່າຍປະກັນສຸຂະພາບທີ່ສູນກາງເປັນຜູ້ດຸ່ນດ່ຽງໃຫ້ ໂດຍບໍ່ອະນຸຍາດໃຫ້ທ້ອງຖິ່ນຈົດເຂົ້າເປັນລາຍຮັບງົບປະມານເນື່ອງຈາກວ່າຈະມີບັນຫາທາງດ້ານຊິເກີດຈົດຊໍ້າຊ້ອນດ້ວຍເຫດນັ້ນຈຶ່ງຂໍດັດແກ້ຫຼຸດລົງໃຫ້ຍັງເຫຼືອ 2,85 ຕື້ກີບ ຖ້າທຽບໃສ່ແຜນສະ ເໜີເບື້ອງຕົ້ນອາດສາມາດ ຈັດເກັບບັນລຸຕາມແຜນ.

ຖານຂໍ້ມູນເພື່ອສືບຕໍ່ໃນການຈັດເກັບລາຍຮັບປີ 2019 ບໍ່ຖານລາຍຮັບກໍໄດ້ຊິ້ນສຸດເປັນຕົ້ນແມ່ນການອວ່າຍໜີ້ສາມແຈ; ບ້ວງເງິນໄພພິບັດ 2017 ສືບຕໍ່ຈ່າຍ 2018, ລາຍຮັບຄ່າບໍລິການນອນໃນບ້ວງປະກັນສຸຂະພາບໄດ້ຖືກຈົດເປັນລາຍຮັບທ້ອງຖິ່ນ, ລາຍຮັບທີ່ຕິດພັນກັບລາຍຈ່າຍບ້ວງເງິນລາຍຮັບເກີນແຜນສະສາງຈ່າຍໂຄງການກໍ່ ສ້າງ, ລາຍຮັບຈາກການສໍາຫຼວດຊອກຄົ້ນລາວດາກຈຶງ ແລະບ້ວງເງິນປະກອບສ່ວນຂອງບໍລິສັດສໍາຫຼວດຊອກຄົ້ນລາວສານໄຊ ແລະລາຍຮັບທີ່ຕິດພັນກັບໄມ້ໂດຍສະເພາແມ່ນໄມ້ຢຶດໃນປີນີ້ຖ້າທຽບໃສ່ປີຜ່ານມາກໍມີນ້ອຍ, ຖານລາຍຮັບໃໝ່ທີ່ຈະທົດແທນກໍນ້ອຍດ້ວຍເຫດນັ້ນຈຶ່ງເປັນສາເຫດໃຫ້ການຈັດຕັ້ງປະຕິບັດລາຍຮັບຂອງສ່ວຍສາອາ ກອນບໍ່ບັນລຸຕາມແຜນ.

แชร์