ໂຮງງານຜະລິດອາຫານສັດພູຄໍາຮັບຮອງ ໄອເອັສໂອ

 ພິທີມອບ-ຮັບໃບຮັບຮອງລະບົບ ISO9001:2015 ຂອງບໍລິສັດ ຊີ.ພີ. ລາວ ຈໍາກັດ “ໂຮງງານຜະລິດອາຫານສັດພູຄໍາ” ໄດ້ຈັດຂຶ້ນໃນວັນທີ 6 ກຸມພາ 2020 ທີ່ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງທ່ານ ພູວົງ ວົງຄໍາຊາວ ຫົວໜ້າຫ້ອງວ່າການນະຄອນຫຼວງວຽງຈັນ, ທ່ານນາງ ອຸຣະວະດີ ສີຣິພົມ ອັກຄະຣາຊະທູດໄທປະຈໍານະຄອນຫຼວງວຽງຈັນ, ມີປະທານສະມາຄົມທຸລະກິດໄທປະຈໍາລາວ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ທໍານອງ ພົນທອງມາກ ກໍາມະການຜູ້ຈັດການບໍລິສັດ ຊີ.ພີ.ລາວ ຈໍາກັດ ກ່າວວ່າ: ບໍລິສັດ ຊີ.ພີ.ລາວ ຈຳກັດ ເປັນບໍລິສັດລູກຂອງ CPF ປະເທດໄທ (ເຄືອຈະເລີນໂຄກກະພັນ) ປະຈຸບັນມີ ການລົງທຶນໃນ 17 ປະເທດ, ດຳເນີນທຸ ລະກິດທາງດ້ານການກະເສດອຸດສາຫະ ກຳ ແລະອາຫານຄົບວົງຈອນ, ຜະລິດຕະ ພັນອາຫານສັດ, ລ້ຽງສັດ ແລະແປຮູບ ເພື່ອຈຳໜ່າຍພາຍໃນແລະສົ່ງອອກຕ່າງປະເທດທົ່ວໂລກ.

 CPF ເປັນບໍລິສັດທີ່ມີຄວາມອາດສາມາດ ແລະຊ່ຽວຊານໃນທຸລະກິດນີ້ມາຍາວນານຈຶ່ງໄດ້ຮັບຄວາມໄວ້ວາງໃຈຈາກລັດຖະບານລາວໃຫ້ມາລົງທຶນໃນຂະແໜງການນີ້ຊຶ່ງເລີ່ມດຳເນີນທຸລະກິດໃນປີ 2007 ເປັນຕົ້ນມາໂດຍຢຶດຖືເອົາຫຼັກການເຮັດທຸລະກິດ 3 ຜົນປະໂຫຍດຕາມນະໂຍບາຍຫຼັກຂອງ CPF ຄື: ຜົນປະໂຫຍດຕໍ່ປະເທດທີ່ເຂົ້າໄປລົງທຶນ, ຕໍ່ປະຊາຊົນ ແລະຕໍ່ບໍລິສັດ, ພ້ອມກັນນີ້ກໍເພື່ອຕອບສະໜອງອາຫານໂປຣຕີນໃຫ້ພຽງພໍກັບຄວາມຕ້ອງການຂອງຜູ້ບໍລິໂພກຕະຫຼອດຈົນສົ່ງເສີມໃຫ້ຊາວກະສິ ກອນລ້ຽງສັດກັບບໍລິສັດເຮັດໃຫ້ມີວຽກເຮັດງານທຳ, ມີລາຍໄດ້ ແລະການເປັນຢູ່ທີ່ດີຂຶ້ນສາມາດຫຼຸດຜ່ອນຄວາມທຸກຍາກ, ຫຼຸດຜ່ອນການນໍາເຂົ້າສິນຄ້າຈາກຕ່າງປະເທດເພື່ອໃຫ້ສອດຄ່ອງຕາມນະໂຍບາຍຂອງພັກ-ລັດຖະບານລາວທີ່ໄດ້ວາງອອກ.

  ບໍລິສັດ ຊີ.ພີ.ລາວ ປະກອບດ້ວຍໂຮງງານຜະລິດອາຫານສັດ, ຟາມໝູ ແລະອາຫານແປຮູບ, ປະຈຸບັນມີສາຂາຢູ່ນະຄອນຫຼວງວຽງຈັນ, ແຂວງຄໍາມ່ວນ, ສະຫວັນນະເຂດ, ຈໍາປາສັກ ແລະມີເປົ້າໝາຍຈະຂະຫຍາຍສາຂາອອກໄປທຸກແຂວງທົ່ວປະເທດ.

  ສ່ວນວິໄສທັດຂອງ ຊີ.ພີ.ລາວ ຄື: ເປັນຜູ້ນໍາດ້ານການກະເສດອຸດສາຫະກໍາ ແລະອາຫານພ້ອມທັ້ງມຸ້ງເນັ້ນໃນການສ້າງຄົນ, ສ້າງງານ, ສ້າງພື້ນຖານໃຫ້ກັບສັງຄົມລາວ,ເອົາໃຈໃສ່ຜະລິດອາຫານມີຄຸນນະພາບ,ປອດໄພ, ໄດ້ມາດຕະຖານສາກົນສູ່ຜູ້ບໍລິໂພກໃສ່ໃຈການຮັບຜິດຊອບຕໍ່ສັງຄົມ ແລະສິ່ງແວດລ້ອມຢ່າງຈິງຈັງ ແລະຕໍ່ເນື່ອງ.

  ສໍາລັບໃບຮັບຮອງລະບົບ ISO9001:2015 ທີ່ບໍລິສັດ ຊີ.ພີ.ລາວ ກໍຄື “ໂຮງງານຜະລິດອາຫານສັດພູຄໍາ” ໄດ້ຮັບໃນຄັ້ງນີ້ແມ່ນໄດ້ດໍາເນີນການປະຕິບັດມາດຖານ ISO ມາແຕ່ປີ 2018 ເປັນຕົ້ນມາຊຶ່ງມາຮອດປະຈຸບັນແມ່ນສໍາເລັດ ແລະຜ່ານທຸກມາດຖານເງື່ອນໄຂທີ່ທາງບໍລິສັດ SGS ວາງໄວ້.

  ຈາກນັ້ນໃນພິທີໄດ້ມີການມອບ-ຮັບໃບຮັບຮອງລະບົບດັ່ງກ່າວຊຶ່ງໃຫ້ກຽດມອບຂອງ ທ່ານ ທັດສະວິດ ໄຊວັນນະທໍາ ຜູ້ຈັດການຝ່າຍລາວຕົວແທນຈາກບໍລິສັດ SGS ແລະຮັບໂດຍທ່ານ ທໍານອງ ພົນທອງມາກ ກໍາມະການຜູ້ຈັດການບໍລິສັດ ຊີ ພີ ລາວ ຈໍາກັດ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์