ບໍລິສັດ IHC ມອບຢາ ແລະອຸປະກອນການແພດໃຫ້ແກ່ ສປປ ລາວ

   ໃນຕອນເຊົ້າຂອງວັນທີ 10 ກຸມພາ 2020 ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າຈຳກັດຜູ້ດຽວ (IHC ) ໄດ້ນຳເອົາຢາ ແລະ ອຸປະກອບການແພດສຳລັບການປ້ອງກັນ ແລະກວດເຊື້ອພະຍາດອັກເສບປອດສາຍພັນໃໝ່ໂຄໂລນາ (Corona Virus) ມາມອບລັດຖະບານແຫ່ງ ສປປ ລາວ, ຊຶ່ງພິທີມອບ-ຮັບ ໄດ້ຈັດຂຶ້ນທີ່ກະຊວງການເງິນ, ໂດຍການກ່າວມອບຂອງທ່ານ ປີຊາໄຊ ແກ້ວໄຊຍະຈັກ, ປະທານບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າຈຳກັດຜູ້ດຽວ ແລະ ໃຫ້ກຽດກ່າວຮັບແມ່ນທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (Novel Corona Virus: NCoV); ມີທ່ານຮສ.ດຣ ບຸນກອງ ສີຫາວົງ, ລັດຖະ ມົນຕີກະຊວງສາທາລະນະສຸກພ້ອມດ້ວຍພະນັກງານທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

   ເຄື່ອງທີ່ນຳມາມອບເພື່ອຊ່ວຍເຫຼືອໃນຄັ້ງນີ້ປະກອບມີ: ເຄື່ອງກວດພະຍາດຈຳນວນ 2 ເຄື່ອງ, ນໍ້າຢາກວດເຊື້ອພະຍາດຈຳນວນ 2.500 ຫຼອດ, ຖົງມືຈຳນວນ 100.000 ຄູ່, ລວມເປັນມູນຄ່າທັງໝົດປະມານ 100.000 ໂດລາສະຫະລັດ.

-------------- 

 ໃນໂອກາດນີ້, ທ່ານ ສົມດີ ດວງດີ ໄດ້ຕາງໜ້າໃຫ້ລັດຖະບານກ່າວຂອບໃຈ ແລະຊົມເຊີຍຕໍ່ບໍລິສັດທີ່ປຶກສາດ້ານການລົງທຶນ ແລະກໍ່ສ້າງເຂື່ອນໄຟຟ້າຈຳກັດຜູ້ດຽວທີ່ໄດ້ນຳເອົາຢາ ແລະ ອຸປະກອນການແພດມາມອບຊ່ວຍເຫຼືອໃນຄັ້ງນີ້, ຊຶ່ງການປະກອບສ່ວນຊ່ວຍເຫຼືອດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຂອງສະພາບ ການໃນປະຈຸບັນເປັນຢ່າງຍິ່ງໂດຍສະເພາະການປະກອບສ່ວນປ້ອງກັນ, ຄວບຄຸມ ແລະແກ້ໄຂການລະບາດຂອງຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (Novel Corona Virus: NCoV) ຢູ່ ສປປ ລາວ, ພ້ອມກັນນັ້ນ ກໍ່ໄດ້ຊີ້ນຳໃຫ້ພາກສ່ວນກ່ຽວຂ້ອງຂອງກະຊວງສາທາລະນະສຸກນຳເອົາເຄື່ອງຊ່ວຍເຫຼືອດັ່ງກ່າວ ໄປຄຸ້ມຄອງ ແລະນຳໃຊ້ໃຫ້ມີປະສິດທິພາບ ແລະປະສິດທິຜົນ.

____________

ຂຽນໂດຍ: ກົມປະຊາສຳພັນ ສນຍ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์