ສະຫຼອງວັນສ້າງຕັ້ງ ທະນາຄານຮ່ວມພັດທະນາຄົບຮອບ 30 ປີ

 ໃນວັນທີ 7 ກຸມພາ 2020 ໂຮງແຮມແລນມາກແມ່ຂອງ ນະຄອນຫຼວງວຽງຈັນ ໄດ້ມີພິທີສະຫຼຸບຜົນງານປີ 2019 ແລະຍ້ອງຍໍຜູ້ທີ່ມີຜົນງານດີເດັ່ນພ້ອມວາງແຜນ ການປີ 2020 ແລະງານລ້ຽງສະເຫຼີມສະຫຼອງວັນສ້າງຕັ້ງທະນາຄານຮ່ວມພັດທະນາຄົບຮອບ 30 ປີ (1989-2019) ໂດຍເຂົ້າຮ່ວມມີ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ, ທ່ານ ເອກະພັນ ພະພິທັກ ປະທານສະພາຜູ້ບໍລິຫານທະນາຄານຮ່ວມພັດທະນາພ້ອມດ້ວຍແຂກຖືກເຊີນ, ຄະນະອຳນວຍການແລະພະນັກງານຂອງເຈດີບີເຂົ້າຮ່ວມ.

  ໃນປີ 2019 ຖືວ່າເປັນປີທີ່ມີຜົນງານພົ້ນເດັ່ນຫຼາຍດ້ານ ແລະກໍ່ເປັນປີທີ່ມີຄວາມໝາຍສໍາຄັນທະນາຄານຮ່ວມພັດທະນາຄົບຮອບ 30 ປີ ໃນປີ 2019 ແມ່ນມີຜົນກໍາໄລຢ່າງໜ້າເພີ່ງພໍໃຈປະຈຸບັນທະນາຄານຮ່ວມພັດທະນາມີໜ່ວຍບໍລິການທີ່ເປີດບໍລິການທັງໝົດ 60 ໜ່ວຍ ບໍລິການໃນຂອບເຂດທົວປະເທດ, ອອກຜະລິດຕະພັນໃໝ່ເພື່ອສະໜອງລູກຄ້າໃຫ້ໄດ້ຊົມໃຊ້ຜະລິດຕະພັນຂອງຕົນຢ່າງຫຼວງຫຼາຍ ແລະໄດ້ຮັບຄວາມປະທັບໃຈເຊັ່ນວ່າ: ສິນເຊື່ອເພື່ອພະນັກງານລັດຖະກອນ, ສິນເຊື່ອເພື່ອການສຶກສາ, ສິນເຊື່ອຫັນຊັບເປັນທຶນ, ສິນເຊື່ອຊຸກຍູ້ສົ່ງເສີມ SME ແລະທຸລະກິດລາຍໃຫຍ່.

  ສໍາເລັດອອກຜະລິດຕະພັນເຮັດທຸລະກໍາທາງການເງິນຜ່ານມືຖື (Mobile Banking ) ຫຼືເອີ້ນຫຍໍ້ວ່າ: JDB Yes ແລະYes pay (QR Code) ອອກຜະ ລິດຕະພັນໃໝ່ເຊັ່ນ: ອອກບັດATMU nionPay ບັດ VISA Debit,ບັດ Credit ແລະອື່ນໆອີກຢ່າງຫຼວງຫຼາຍ,ເພື່ອພັດທະນາໃຫ້ເປັນ Digital Banking ເທື່ອລະກ້າວ.

 ນອກນັ້ນຍັງໄດ້ເຂົ້າຮ່ວມຫຼາຍໂຄງການກັບທະນາຄານອື່ນເຊັ່ນ: ການຊໍາລະພາສີທີ່ດິນ,ເສຍຄ່າທາງລົດປະຈໍາປີ ແລະອື່ນໆ, ພ້ອມກັນນັ້ນກໍເປັນການປະກອບສ່ວນແກ້ ໄຂຊີວິດການເປັນຢູ່ຂອງພະນັກງານ-ລັດຖະກອນໃຫ້ທີ່ດີຂຶ້ນໂດຍການຕອບສະໜອງສິນເຊື່ອພະນັກງານໂດຍບໍ່ມີຫຼັກຊັບຄໍ້າປະກັນໃຫ້ແກ່ພະນັກງານ-ລັດຖະກອນທີ່ເບີກຈ່າຍເງິນເດືອນຜ່ານທະນາຄານ JDB ແລະ ການຄ້າຕ່າງປະເທດລາວມະຫາຊົນ, ນອກຈາກນັ້ນຍັງໄດ້ປ່ອຍສິນເຊື່ອເຂົ້າໃນການສ້າງສາເສດຖະກິດ-ສັງຄົມກໍຄືການກໍ່ສ້າງໂຄງລ່າງພື້ນຖານເຊັ່ນ: ໂຄງການທາງດ່ວນບຶງທາດຫຼວງຫາດົງໝາກຄາຍ ແລະໂຄງການຕາມເສັ້ນທາງລົດໄຟລາວ-ຈີນ ໂຄງການອື່ນໆ ຂອງລັດຖະບານລາວ.

  ແນວໃດກໍດີ ກ່ອນໜ້າບໍ່ດົນມານີ້ທາງ JDB ໄດ້ມີການສ້າງຂະບວນການສະເຫຼີມສະຫຼອງ ຄົບຮອບ 30 ປີ ທະນາຄານຮ່ວມພັດທະນາກໍໄດ້ມີຂະບວນການບໍລິຈາກເລືອດເພື່ອກອບກູ້ຊີວິດຜູ້ທີ່ຂາດເລືອດໃນໂຮງໝໍຕ່າງໆ ໃນລາວຊຶ່ງມີຜູ້ສະໝັກໃຈບໍລິຈາກເລືອດ 50 ກວ່າຄົນ ຊຶ່ງເປັນການສ້າງບຸນກຸສົນອັນຍີ່ງໃຫຍ່ເພື່ອປະກອບສ່ວນຊ່ວຍເຫຼືອສັງຄົມໂດຍບໍ່ຫວັງຜົນຕອບແທນ,ນອກຈາກນັ້ນຍັງໄດ້ສ້າງຂະບວນການກີລາບານເຕະຍິງ-ຊາຍ ພາຍໃນທະນາຄານຮ່ວມພັດທະນາເພື່ອຊີງຂັນປະທານສະພາບໍລິຫານທະນາຄານຮ່ວມພັດທະນາຄົບຮອບ 30 ປີ ຢ່າງເບີກບານມ່ວນຊື່ນ.

  ແຜນການປີ 2020 JDB ຕ້ອງໄດ້ສູ້ຊົນອອກແຮງສ້າງຜົນກໍາໄລໃຫ້ບັນລຸເປົ້າໝາຍທີ່ວາງໄວ້ເພື່ອປະກອບສ່ວນໃນການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງໂດຍໄປຕາມຄໍາຂວັນຂອງທະນາຄານຮ່ວມພັດທະນາ “ເຕີບໃຫຍ່ໄປພ້ອມກັນ”.

_____________

ໜັງສືພິມເສດຖະກິດ-ສັງຄົມ

แชร์