ກະຊວງການຄ້າ ແຈ້ງໃຫ້ຂາຍຜ້າອັດປາກ-ດັງ ບໍ່ເກີນ 1 ພັນກີບຕໍ່ອັນ

  ກະຊວງອຸດສາຫະກຳ ແລະການຄ້າໄດ້ອອກແຈ້ງການໃຫ້ບັນດາຮ້ານຄ້າ ແລະຮ້ານຈຳໜ່າຍຜະລິດຕະພັນການຢາທົ່ວປະເທດໃຫ້ຂາຍຜ້າອັດປາກ-ດັງ (ແຜ່ນຕອງ 3 ຊັ້ນ) ຊະນິດສາຍຢາງຢືດທຸກລຸ້ນ ແລະນໍ້າຢາລ້າງມືແມ່ນບໍ່ໃຫ້ເກີນກຳນົດລາຄາການຄຸ້ມຄອງສິນຄ້າທີ່ລັດວາງອອກ.

 ອີງຕາມແຈ້ງການຂອງລັດຖະມົນຕີກະຊວງອຸດສາຫະກຳ ແລະການຄ້າ ໃນນາມເປັນປະທານຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະຄ່າບໍລິການຕາມຂໍ້ຕົກລົງເລກທີ 71/ນຍ ວ່າ: ກຳນົດເອົາລາຍການສິນຄ້າຜ້າອັດປາກ-ດັງ (ແຜ່ນຕອງ 3 ຊັ້ນ) ຊະນິດສາຍຢາງຢືດທຸກລຸ້ນ ແລະນໍ້າຢາລ້າງມືທຸກລຸ້ນບໍ່ໃຫ້ເກີນ 2,5 ພັນກີບຕໍ່ກັບ (ໜຶ່ງກັບມີ 50 ອັນ) ຖ້າແຍກອອກຂາຍຍ່ອຍແມ່ນບໍ່ໃຫ້ເກີນອັນລະ 1 ພັນກີບ ຖ້າບຸກຄົນໃດ, ນິຕິບຸກຄົນ,ບັນດາຮ້ານຈຳໜ່າຍຜະລິດຕະພັນຢາພົບເຫັນການລະ ເມີດສ່ວຍໂອກາດຂຶ້ນລາຄາ ຫຼືກັກຕຸນສິນຄ້າເພື່ອເກັງກຳໄລເກີນການຄຸ້ມຄອງສິນຄ້າທີ່ລັດໄດ້ວາງອອກຈະຖືກມາດຕະການດຳເນີນຄະດີແພ່ງ, ຄະດີອາຍາ ແລະມາດຕະການອື່ນໆຕາມກົດໝາຍທີ່ໄດ້ກຳນົດໄວ້ຢ່າງເຂັ້ມງວດ.

  ໂດຍມອບໃຫ້ພະແນກອຸດສາຫະກຳ ແລະການຄ້າແຂວງ, ນະຄອນຫຼວງວຽງຈັນ ເປັນເຈົ້າການຊີ້ນຳຫ້ອງການອຸດສາຫະກຳ ແລະການຄ້າເມືອງ, ເທດສະບານ ແລະແຕ່ງຕັ້ງພະນັກງານຕິດຕາມກວດກາບົນພື້ນຖານຮ້ານຂາຍຢາ ແລະ ຮ້ານຈຳໜ່າຍຜະລິດຕະພັນຢາໃຫ້ເປັນປົກກະຕິເມື່ອພົບເຫັນຜູ້ປະກອບການລະເມີດລາຄາຕາມທີ່ໄດ້ກຳນົດນີ້ແມ່ນໃຫ້ແຈ້ງເຖິງເບີສາຍດ່ວນປົກປ້ອງຜູ້ຊົມ ໃຊ້ 1510 ແລະສາຍດ່ວນລັດຖະບານ 1516.

________________

ຂຽນໂດຍ: ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์