ນວ ມອບ-ຮັບໜ້າທີ່ຫົວໜ້າພະແນກການເງິນ

 ວັນທີ 7 ກຸມພາ 2020 ທີ່ຫ້ອງວ່າການນະຄອນຫຼວງວຽງຈັນ, ໄດ້ຈັດພິທີມອບ-ຮັບໜ້າທີ່ລະຫວ່າງທ່ານ ຄຳພັນ ມາລາບັນດິດ ຫົວໜ້າພະແນກການເງິນນະຄອນ ຫຼວງວຽງຈັນ (ນວ) ຜູ້ເກົ່າກັບທ່ານ ສິລິລາດ ທົງສິນທອງເພັງ ຫົວໜ້າພະແນກການເງິນນະຄອນຫຼວງວຽງຈັນ (ນວ) ຜູ້ໃໝ່ໂດຍເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນ, ມີທ່ານ ອາດສະພັງທອງ ສີພັນດອນ ຮອງເຈົ້າຄອນນະຄອນຫຼວງວຽງຈັນ ແລະພະນັກງານທີ່ກ່ຽວ ຂ້ອງເຂົ້າຮ່ວມ.

  ໃນກອງປະຊຸມທ່ານ ບຸນທອງ ພົມມະຈັນ ຫົວໜ້າຄະນະຈັດຕັ້ງ ນວ; ໄດ້ຂຶ້ນຜ່ານຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ສະບັບເລກທີ 088/ຈນວ, ລົງວັນທີ 3 ກຸມພາ 2020 ວ່າດ້ວຍການແຕ່ງຕັ້ງຫົວໜ້າພະແນກການເງິນ ນວ, ໂດຍແຕ່ງຕັ້ງ ທ່ານ ສິລິລາດ ທົງສິນ ທອງເພັງ ຫົວໜ້າສ່ວຍສາອາກອນປະຈຳ ນວ ເປັນຫົວໜ້າພະແນກການເງິນ ນວ ຜູ້ໃໝ່ ແລະຜ່ານຂໍ້ຕົກລົງສະບັບເລກທີ 4199/ກງ, ລົງວັນທີ 21 ຕຸລາ 2019 ວ່າດ້ວຍການຍົກຍ້າຍພະນັກງານສັງກັດຢູ່ພະແນກການເງິນ ນວ ໄປຮັບໜ້າໃໝ່ຢູ່ຫ້ອງວ່າການ ນວ, ໂດຍໄດ້ຍົກຍ້າຍ ທ່ານ ຄຳພັນ ມາລາບັນດິດ ຫົວໜ້າພະແນກການເງິນ ນວ ຜູ້ເກົ່າໄປຮັບໜ້າທີ່ໃໝ່ຢູ່ຫ້ອງວ່າການ ນວ.

  ໂອກາດດຽວກັນ, ທ່ານ ສິດທິສອນ ເທບພາສີ ຫົວໜ້າກົມຈັດຕັ້ງ ແລະພະນັກງານກະຊວງການເງິນ, ໄດ້ຂຶ້ນຜ່ານຂໍ້ຕົກລົງສະບັບເລກທີ 0402/ກງ, ລົງວັນທີ 6 ກຸມພາ 2020 ໄດ້ເຫັນດີແຕ່ງຕັ້ງທ່ານ ຄຳພັນ ພັນທຸລັກ ຮອງຫົວໜ້າ ສ່ວຍສາອາກອນປະຈໍາ ນວ ຂຶ້ນເປັນຫົວໜ້າສ່ວຍສາອາກອນປະຈໍາ ນວ ແລະ ອີງຕາມຂໍ້ຕົກ ລົງສະບັບເລກທີ 0405/ກງ, ລົງວັນທີ 6 ກຸມພາ 2020 ໄດ້ເຫັນດີຍົກຍ້າຍ ທ່ານ ສົມພອນ ພິມມະສອນ ຮອງຫົວໜ້າສ່ວຍສາອາກອນປະຈໍາ ນວ ໄປຮັບໜ້າໃໝ່ຢູ່ກົມສ່ວຍສາອາກອນ ແລະເຫັນດີແຕ່ງຕັ້ງທ່ານ ພອນ ໄຊ ເພັງສຸວັນ ຫົວໜ້າຂະແໜງກວດກາຫຼັງການແຈ້ງລາຍຮັບເປັນຮອງຫົວໜ້າສ່ວຍສາອາກອນປະຈໍາ ນວ.

  ໂອກາດດັ່ງກ່າວ, ທ່ານ ສົມດີ ດວງດີ ກໍໄດ້ມີຄຳເຫັນວ່າ: ການປັບປຸງການຈັດຕັ້ງໃນຄັ້ງນີ້ເປັນການປັບປຸງຕາມປົກກະຕິທັງເປັນການສ້າງຄວາມເຂັ້ມແຂງໃຫ້ຂະແໜງການເງິນ, ໂດຍການສືບທອດປ່ຽນແທນຕາມພາລະບົດບາດຂອງການຈັດຕັ້ງການຊັບຊ້ອນໝູນວຽນຂອງພະນັກງານຫຼັກແຫຼ່ງຈໍານວນໜຶ່ງ, ເພື່ອເຮັດໃຫ້ມີຄວາມໜັກແໜ້ນເຂັ້ມແຂງສາມາດປະຕິບັດໄດ້ຫຼ້ອນໜ້າທີ່ການເມືອງທີ່ພັກ-ລັດມອບໝາຍ.

  ພ້ອມນັ້ນ, ຍັງເນັ້ນໃຫ້ເອົາໃຈໃສ່ສ້າງຜົນງານໃຫ້ດີຂຶ້ນເລື້ອຍໆ...ສ່ວນການຈັດຕັ້ງປະຕິບັດວຽກງານວິຊາສະເພາະໃຫ້ເອົາໃຈໃສ່ແຕ່ຕົ້ນປີໂດຍສະເພາະບັນດາວຽກທາງດ້ານລາຍຮັບໃຫ້ຂຸ້ນຂ້ຽວສຸມໃສ່ເຮັດແຕ່ຫົວທີ, ສໍາລັບລາຍຈ່າຍໃຫ້ມີການກວດກາຕິດຕາມຢ່າງເຄັ່ງຂັດຂຶ້ນຕື່ມ.

______________

ຂຽນໂດຍ: ກະຊວງການເງິນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์