ຄູສອນຊັ້ນມັດທະຍົມສຶກສາ ຮຽນຮູ້ນຳໃຊ້ເຄື່ອງທົດລອງວິທະຍາສາດ

  ກອງປະຊຸມສ້າງຂີດຄວາມສາມາດໃຫ້ແກ່ຄູສອນຊັ້ນມັດທະຍົມສຶກສາໃນເທສະບານແຂວງຫຼວງພະບາງກ່ຽວກັບການຮຽນຮູ້ການນຳໃຊ້ເຄື່ອງທົດລອງວິທະຍາສາດທຳມະຊາດໄດ້ອັດລົງດ້ວຍຜົນສຳເລັດອັນຈົບງາມຫຼັງທີ່ໄດ້ດຳເນີນມາເປັນເວລາ 3 ວັນລະຫວ່າງ 28-30 ມັງກອນ 2020 ທີ່ສູນໄອຊີທີ (ICT) ແຂວງຫຼວງພະບາງ ໂດຍພາຍໃຕ້ການເປັນປະທານຂອງທ່ານ ອະນຸແພງ ແກ້ວວົງສາ ຮອງຫົວໜ້າພະແນກສຶກສາທິການ ແລະກີລາແຂວງ, ມີ ທ່ານຫົວໜ້າ-ຮອງຫົວໜ້າສູນໄອ ຊີທີ, ວິທະຍາກອນ, ສຳມະນາກອນ ແລະວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມຝຶກອົບຮົມສ້າງຂີດຄວາມສາມາດການນຳໃຊ້ເຄື່ອງ ທົດລອງວິທະຍາສາດທຳມະຊາດ ຄັ້ງນີ້ໄດ້ແບ່ງອອກເປັນ 3 ຫ້ອງເພື່ອເປັນການລົງມືປະຕິບັດຕາມຂັ້ນຕອນຂອງການທົດລອງໃນ ແຕ່ລະວິຊາຄື: ການທົດລອງວິຊາຊີວະສາດປະກອບມີທົດສອບວິຕາມິນໃນໝາກໄມ້, ການຊຶມຜ່ານເຈ້ຍ   ຫຸ້ມຈຸລັງຫົວມັນຝຣັ່ງ, ຜ່າຕັດກົບ,ການລໍາລ້ຽງນຳຂອງພືດ ແລະ ການຄາຍນໍ້າ, ສຶກສາແຜ່ບໍາລຸງ ລ້ຽງຫົວມັນຝຣັ່ງຜ່ານກ້ອງຈຸລະທັດ,ການທົດລອງວິຊາເຄມີສາດ ປະກອບມີການທົດສອບປະເພດອາຫານຕ່າງໆເຊັ່ນ: ອາຫານປະເພດກາກບອນໄຮເດຣດ, ທົດສອບປະເພດໂປເຕອິນ, ທົດສອບປະເພດ ລີປີດ (ໄຂມັນ), ທົດສອບປະເພດ ທາດພິດຢູ່ໃນອາຫານ: ນໍ້າສົ້ມ, ນໍ້າປາ, ແປ້ງນົວ ແລະການທົດ ສອບອາຊີດ ແລະບາເຊີດ້ວຍ NaHco3 (ໂສດາເບຄິງ) ນາຕຼີຮີດຮົກຊິດ (NaOH), ອາຊີດຊີຕຣິກ (ນໍ້າໝາກນາວ), ອາຊີດອາເຊຕິກ (C2 H2O2), ນໍ້າຢາຊັກຜ້າຂາວ (NaCeO); ໂຄກ, ສໄປຣ, ດ້ວຍທາດໃຫ້ສັນຍານກະລໍາສີອິດ, ວິທີການຕອງ-ການລະເຫີຍຈາກ ຂອງແຂງກາຍເປັນອາຍດ້ວຍຢາມ໋ອງ, ນອກຈາກໃຊ້ທາດເຄມີທີ່ມີຢູ່ໃນຫ້ອງທົດລອງແລ້ວຍັງໃຊ້ຊີວະພືດທີ່ມີຢູ່ໃນທໍາມະຊາດປະກອບໃນການຮຽນ-ການສອນ, ການທົດສອບຮີໂດຣກາກບອນບໍ່ອິ່ມຕົວ ດ້ວຍເປືອກໝາກພຸກ, ເປືອກໝາກ ກ້ຽງ ແລະແປັກມັງການັດກາລີ (KMnO4), ການພິສູດທາດບໍລິສຸດ ແລະທາດລະລາຍ, ການທົດລອງວິຊາຟີຊິກສາດປະກອບມີລູກໄກວງ່າຍດາຍ, ກົດເກນຮັກສາປະລິມານເດີນເຄື່ອນ, ຄວາມແຮງດຸ່ນ ດ່ຽງ, ການຢືດຫົດຂອງໄສ້ເສືອ, ການສຶກສາການສະທ້ອນເທິງແວ່ນ ພຽງ, ການສຶກສາການຫັກແສງ ຜ່ານໜ້າຂີດຂັ້ນ, ການຫັກຂອງແສງຜ່ານປ່ຽງບາງໜ້າຂະໜານ, ການຫັກແສງຜ່ານເລັນ, ວົງຈອນໄຟຟ້າແບບລຽນກັນ ແລະການວົງຈອນໄຟຟ້າແບບຕໍ່ຂະໜານ.

  ໂອກາດນີ້, ທ່ານ ອະນຸແພງ ແກ້ວວົງສາ ໄດ້ເນັ້ນຫຼາຍບັນຫາເປັນຕົ້ນໃຫ້ບັນດາຄູຝຶກ ແລະສຳມະນາກອນຈົ່ງໄດ້ນຳເອົາບົດຮຽນ ແລະປະສົບການໃນຄັ້ງນີ້ນຳໄປເຜີຍແຜ່, ໝູນໃຊ້ເຂົ້າໃນການຮຽນ-ການສອນເພື່ອໃຫ້ນ້ອງນັກຮຽນໄດ້ມີຄວາມຮູ້, ເຂົ້າໃຈຢ່າງເລິກ ເຊິ່ງ ແລະສາມາດນຳໃຊ້ເຂົ້າໃນການດຳລົງຊີວິດຢ່າງຖືກຕ້ອງ, ພ້ອມກັນຕັ້ງໜ້າພັດທະນາຕົນເອງ ໃຫ້ມີຄວາມຮູ້ຄວາມສາມາດເປັນຄູສອນດີສອນເກັ່ງກາຍເປັນຄູປະສົບການ, ຄູຊໍານານງານ ແລະເປັນ ແບບຢ່າງນຳໜ້າທີ່ດີໃຫ້ແກ່ຄູ-ອາຈານ, ນ້ອງນັກຮຽນ-ນັກສຶກສາ ແລະສັງຄົມ.

แชร์