ໄຊຍະມີຫົວໜ່ວຍທຸລະກິດເຊົ່າ ແລະສໍາປະທານດິນລັດ ເຮັດທຸລະກິດ 279 ຫົວໜ່ວຍ

  ທ່ານ ບຸນລັບ ແສງອາພອນ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີ ໄດ້ໃຫ້ຮູ້ວ່າ: ເພື່ອໃຫ້ສອດຄ່ອງຖືກຕ້ອງກັບລະບຽບກົໝາຍໃນການຄຸ້ມຄອງທີ່ດິນທີ່ໄດ້ກໍານົດໄວ້ໃນວຽກງານເຊົ່າ-ສໍາປະທານ ທີ່ດິນຂອງລັດ; ຜ່ານການຈັດຕັ້ງປະຕິບັດກວດກາເຫັນວ່າທົ່ວແຂວງ ມີຫົວໜ່ວຍການເຊົ່າ-ສໍາປະທານ ທີ່ດິນລັດທັງໝົດ 279 ຫົວໜ່ວຍ, ມີ 420 ຕອນເນື້ອທີ່ 192.603 ເຮັກຕາ ໃນນີ້ກິດຈະການເຊົ່າມີ 159 ຫົວໜ່ວຍ,ມີ 278 ຕອນເນື້ອທີ່ 124,58 ເຮັກຕາ ແລະບໍ່ມີການເຄື່ອນໄຫວມີ 71 ໂຄງການ 74 ຕອນດິນ, ມີເນື້ອທີ່ 565,50 ເຮັກຕາ.

 ຄຽງຄູ່ກັນນີ້ກໍ່ໄດ້ສໍາເລັດການສໍາຫຼວດຈັດສັນທີ່ດິນຂັ້ນບ້ານຕາມຕົວເລກແຜນທີ່ຕັ້ງໄວ້ໃນປີ 2019 ໃຫ້ໄດ້ 82 ບ້ານແຕ່ປະຕິບັດຕົວຈິງໄດ້ 48 ບ້ານ ເທົ່າກັບ 59%, ໃນການຈັດສັນດິນຂັ້ນບ້ານຕິດພັນກັບການຈັດສັນດິນ 8 ປະເພດເລີ່ມປະຕິບັດແຕ່ປີ 2009 ເຖິງປະຈຸບັນສໍາເລັດແລ້ວ 258 ບ້ານ ເທົ່າກັບ 60% ຂອງບ້ານທັງ ໝົດໃນທົ່ວແຂວງ 432 ບ້ານ, ເນື້ອທີ່ 718.961 ເຮັກຕາ ເທົ່າກັບ 44% ຂອງເນື້ອທີ່ທັງໝົດໃນ ທົ່ວແຂວງ ແລະ ບ້ານທີ່ຍັງບໍ່ໄດ້ຈັດສັນມີ 174 ບ້ານ ເທົ່າກັບ 40% ມີເນື້ອທີ່ 919.938 ເຮັກຕາເທົ່າກັບ 56%.

   ພ້ອມດຽວກັນນີ້ໄດ້ຂຶ້ນທະບຽນອອກໃບຕາດິນຕາມຕົວເລກແຜນປີຕັ້ງໄວ້ 12,5 ພັນຕອນ ປະຕິບັດ ໄດ້ 13,3 ພັນຕອນ ເທົ່າກັບ 106% ຮອດປະຈຸບັນທົ່ວແຂວງອອກ ໃບຕາດິນໄດ້ທັງໝົດ 102.252 ຕອນ, ນອກນີ້ຍັງໄດ້ສໍາເລັດການສ້າງແຜນຍຸດທະສາດການຄຸ້ມຄອງອ່າງຮັບນໍ້າ 10 ປີແຕ່ປີ 2016-2025 ແຜນຄຸ້ມຄອງອ່າງ ຮັບນໍ້າແບບເຊື່ອມສານ 5 ປີ 2016-2020 ໃນນີ້ສຸມໃສ່ 2 ອ່າງບູລິມະສິດ ເກັບກໍາຂໍ້ມູນການນໍາໃຊ້ນໍ້າ ແລະຊັບພະຍາກອນນໍ້າ, ສໍາຫຼວດສະຖານທີ່ຕິດຕັ້ງສະຖານີອຸ ຕຸນິຍົມ ແລະອຸທົກກະສາດຢູ່ 7 ເມືອງ ຈໍານວນ 10 ແຫ່ງຄື: ອຸຕຸນິ ຍົມ 7 ແຫ່ງ, ສະຖານີອຸທົກກະສາດ 3 ແຫ່ງ ໃນນີ້ໄດ້ສໍາເລັດການກໍ່ສ້າງສະຖານີອຸທົກກະສາດຢູ່ 2 ແຫ່ງຄື: ນໍ້າຮຸ່ງ ເມືອງໄຊຍະບູລີ ແລະນໍ້າຂອງຈຸດເມືອງປາກລາຍ, ສ້າງສະຖານີວັດແທກແຜ່ນດິນໄຫວ 2 ແຫ່ງຄື: ຢູ່ເມືອງຫົງສາ ແລະເມືອງປາກລາຍ ໂດຍໄດ້ຮັບ ທຶນຊ່ວຍເຫຼືອຈາກ ສປ ຈີນ.

 ທ່ານຍັງໃຫ້ຮູ້ຕື່ມວ່າເພື່ອສືບຕໍ່ຜັນຂະຫຍາຍຍຸດທະສາດ, ແຜນພັດທະນາເສດຖະກິດ-ສັງຄົມຂອງຂະແໜງຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ປະສົບຜົນສຳເລັດຕາມທິດສີຂຽວ ຍືນຍົງ ໃນປີ 2020 ຈະຕ້ອງສຸມ ໃສ່ຈັດສັນທີ່ດິນ 8 ປະເພດຂັ້ນ ເມືອງໃຫ້ໄດ້ 3 ເມືອງຄື: ເມືອງ ຊຽງຮ່ອນ,ເມືອງທົ່ງມີໄຊ ແລະ ເມືອງໄຊສະຖານພ້ອມຈັດສັນທີ່ດິນຂັ້ນບ້ານໃຫ້ໄດ້ 55 ບ້ານ, ຂຶ້ນທະບຽນທີ່ດິນ-ອອກໃບຕາດິນໃຫ້ໄດ້ 6.000 ຕອນ, ສ້າງຖານຂໍ້ມູນດ້ານສິ່ງແວດລ້ອມ, ຊຸກຍູ້ບັນດາໂຄງ ການ,ກິດຈະການໃຫ້ມີແຜນຄຸ້ມຄອງສິ່ງແວດລ້ອມພ້ອມທັງອອກໃບຢັ້ງຢືນດ້ານສິ່ງແວດລ້ອມໃຫ້ໄດ້ 400 ຫົວໜ່ວຍ, ຕິດຕາມປະເມີນຜົນການເຊື່ອມສານວາງແຜນຄຸ້ມຄອງສິ່ງແວດລ້ອມແບບຮອບດ້ານ (ISP)ທົ່ວແຂວງ,ສ້າງມາດຕະຖານຕົວເມືອງສີ ຂຽວ, ສະອາດສວຍງາມໃຫ້ມີຄວາມຍືນຍົງທາງດ້ານສິ່ງແວດລ້ອມໃນທົ່ວແຂວງ ໂດຍສຸມໃສ່ 4 ເມືອງເປົ້າໝາຍຄື: ເມືອງໄຊຍະບູລີ, ເມືອງປາກລາຍ, ເມືອງແກ່ນທ້າວ ແລະເມືອງຫົງສາ.

-----

ໂດຍ: ບຸນທີ

 

แชร์