ຊາວພຸດຮ່ວມໃສ່ບາດຖວາຍສັງຄະທານຫໍພະຍາສີໂຄດຕະບອງ

  ງານບຸນນະມັດສະການພະທາດສີໂຄດຕະບອງ ເມືອງທ່າແຂກ ແຂວງຄຳມ່ວນ ແມ່ນໄດ້ເລີ່ມຂຶ້ນໃນລະຫວ່າງວັນທີ 4-8 ກຸມພາ 2020 ເຊິ່ງພາຍໃນງານຈະມີພິທີທາງສາສະໜາເປັນຕົ້ນແມ່ນການຕັກບາດຖວາຍສັງຄະທານຫໍພະຍາສີໂຄດ, ພະສົງສຳມະເນນ ແລະສູດບັງສະກຸນບໍລິເວນເດີ່ນພະທາດ, ການແຮ່ຜາສາດເຜິ້ງ, ວຽນທຽນອ້ອມພະທາດ ແລະອື່ນໆຕາມປະເພນີທີ່ເຄີຍສືບທອດກັນມາ.

 

 ຕະຫຼອດງານຍັງມີການວາງສະແດງ ແລະຈຳໜ່າຍສິນຄ້າປະເພດຕ່າງໆມີທັງຜະລິດຕະພັນກະສິກຳ, ເຄື່ອງຫັດຖະກຳແກະສະລັກໄມ້, ແຜ່ແພ, ເຄື່ອງເຟີນີເຈີ, ຜະ ລິດຕະພັນໄມ້ລວມເຖິງເຄື່ອງນຸ່ງຫົ່ມແລະສິນຄ້າອຸປະໂພກ-ບໍລິໂພກຈຳນວນ 400 ກວ່າຮ້ານ.

  ນອກນີ້ຍັງມີການສະແດງສີລະປະວັນນະຄະດີຈາກບັນດາເມືອງ ແລະ ໂຮງຮຽນພ້ອມທັງມີການແຂ່ງຂັນກີລາປະເພດຕ່າງໆ ທີ່ສ້າງບັນຍາກາດເຮັດໃຫ້ງານດັ່ງກ່າວມີຄວາມຄຶກຄື້ນ, ມ່ວນຊື່ນແລະຮັກສາໄດ້ຮີດຄອງປະເພນີອັນດີງາມຂອງຊາດເວົ້າສະເພາະກໍ່ຄືຊາວແຂວງຄຳມ່ວນໃຫ້ຄົງຢູ່ສືບຕໍ່ຮຸ່ນສູ່ຮຸ່ນຕະຫຼອດໄປ.

  ສະເພາະວັນທີ 6 ກຸມພາກໍ່ແມ່ນມື້ທີ່ຊາວພຸດທັງຫຼາຍທັງພາຍໃນເທສະບານເມືອງທ່າແຂກ, ມາຈາກຕ່າງເມືອງ ແລະຕ່າງແຂວງໄດ້ໃຫ້ຄວາມສຳຄັນ ແລະຮ່ວມໃຈກັນເຂົ້າມາໃສ່ບາດຖວາຍສັງຄະທານຢູ່ຫໍພະຍາສີໂຄດຕະບອງເຊິ່ງເຂົ້າຮ່ວມພິທີດັ່ງກ່າວມີທ່ານ ແກ້ວລັນດອນ ຈັນທະປານີ ເຈົ້າເມືອງໆທ່າແຂກທັງເປັນຄະນະປະທານຈັດງານບຸນພ້ອມດ້ວຍບັນດາຄະນະກຳມະການຈັດງານ ແລະມວນຊົນນ້ອຍ-ໃຫຍ່ເຂົ້າຮ່ວມຢ່າງຫຼວງຫຼາຍ.

________________

ຂຽນໂດຍ: ກອງຄໍາ ລໍອິນສານ    
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

   

แชร์