ທພລ ສາຂາຫຼວງນໍ້າທາລະດົມເງິນຝາກລື່ນແຜນ

  ໃນເມື່ອບໍ່ດົນຜ່ານມານີ້; ທ່ານ ສົມຫວັງ ເພັງມະດວງຈັກ ຫົວໜ້າ ທພລ ສາຂາຫຼວງນໍ້າທາ ໄດ້ແຈ້ງສະພາບການເຄື່ອນໄຫວດຳເນີນທຸລະກຳການເງິນໃນປີ 2019 ຜ່ານມາ ທີ່ສາຂາສາມາດລະດົມເງິນຝາກໄດ້ທັງໝົດ 273 ຕື້ກີບ ສົມທຽບໃສ່ແຜນການປີ 264 ຕື້ກີບ ປະຕິບັດໄດ້ແລ້ວ 103,4% ຫຼື ລື່ນແຜນການ 3,4%, ສົມທຽບໃສ່ປີ 2018 ເພີ່ມຂື້ນ 21 ຕື້ກີບ ຫຼືເພີ່ມຂຶ້ນ 9,2%, ມີຈໍານວນບັນຊີເງິນຝາກມີບັນຊີເງິນຝາກກະແສລາຍວັນ 186 ບັນຊີ,ບັນຊີເງິນຝາກປະຢັດມີ 21.028 ບັນຊີ, ບັນຊີເງິນຝາກປະຈໍາມີ 2.210 ບັນຊີ ແລະບັນຊີເງິນຝາກອື່ນໆ 1.715 ບັນຊີສາມາດປ່ອຍສິນເຊື່ອໃຫ້ແກ່ທຸກພາກສ່ວນເສດຖະກິດເພື່ອປະກອບສວ່ນພັດທະ ນາສ້າງສາທ້ອງຖິ່ນໃນ ແຂວງຫຼວງນໍ້າທາ ໄດ້ທັງໝົດ 197 ຕື້ກີບ ສົມທຽບໃສ່ແຜນການປີປະຕິບັດໄດ້ 91% ສົມທຽບໃສ່ປີ 2018 ຕົວເລກສິນເຊື່ອຫຼຸດລົງ 6,6% ກ່ຽວກັບອັດຕາສ່ວນເງິນກູ້ລວມຕໍ່ເງິນຝາກຫຼືຕໍ່ແຫຼ່ງທຶນທີ່ມີຂອງສາຂາໃນປີ 2019 ຢູ່ໃນອັດຕາສ່ວນ 69%, ຖືວ່າແຫຼ່ງທຶນຍັງເຫຼືອຫຼາຍຢູ່ໂດຍສະເພາະແຫຼ່ງທຶນທີ່ເປັນສະກຸນໂດລາ ແລະສະກຸນບາດໄທສໍາລັບ NPL ໃນຜັງທີ່ເກີດຂຶ້ນ.

 ໃນປີ 2019 ເທົ່າກັບ 0,09% ຂອງຍອດສິນເຊື່ອທີ່ປ່ອຍກູ້ທັງໝົດ;ລວມ NPL ໃນຜັງ ແລະນອກຜັງເຂົ້າກັນກວມອັດຕາສ່ວນ 0,9% ຂອງຍອດສິນເຊື່ອທັງໝົດ ແລະໃນປີ 2019 ສາມາດສ້າງກໍາໄລໄດ້ທັງໝົດຈໍານວນ 7,6 ຕື້ກີບ.

 ທ່ານຫົວໜ້າ ທພລ ສາຂາຫຼວງນໍ້າທາ ແຈ້ງວ່າ: ປະຈຸບັນມີ 4 ໜ່ວຍບໍລິການ, 2 ໜ່ວຍແລກປ່ຽນປະກອບດ້ວຍໜ່ວຍບໍລິການຕະຫຼາດເທດສະບານແຂວງ (ແຂວງຫຼວງນໍ້າທາ), ໜ່ວຍບໍລິການເມືອງຫຼວງນໍ້າທາ (ເມືອງຫຼວງນໍ້າທາ), ໜ່ວຍບໍລິການເມືອງລອງ (ເມືອງລອງ), ໜ່ວຍບໍລິການເມືອງສິງ (ເມືອງສິງ), ໜ່ວຍແລກ ປ່ຽນເງິນຕາບໍ່ເຕ່ນ ແລະຫ້ອງ ຮັບເງິນເມືອງວຽງພູຄາ (ເມືອງວຽງພູ ຄາ) ແລະໃນຜ່ານມາໄດ້ເຜີຍແຜ່ການນໍາ ໃຊ້ຜະລິດຕະພັນຂອງ ທພລ ໃຫ້ສັງຄົມມາ ນໍາໃຊ້ຢ່າງກວ້າງຂວາງແຕ່ຜົນຕອບຮັບກໍຍັງມີຈໍານວນໜ້ອຍຢູ່ເພາະວ່າທົ່ວແຂວງມີພົນລະເມືອງບໍ່ຫຼາຍທີ່ຢູ່ກະແຈກກະຈາຍໃນ 5 ຕົວເມືອງ, ສັນຍານໂທລະສັບ, ສັນຍານ T24 ມັກຕິດຂັດ, ຕູ້ ATM ມັກຂັດຂ້ອງ ແລະມີທະນາຄານທຸລະກິດ ພັດຫຼາຍແຫ່ງທີ່ດໍາເນີນທຸລະກິດຢູ່ພາຍໃນແຂວງ, ແຕ່ ທພລ ສາຂາຫຼວງນໍ້າທາ ຍັງສືບຕໍ່ໄດ້ຮັບຄວາມເຊື່ອຖື ແລະຄວາມ ໄວ້ວາງໃຈຈາກສັງຄົມຢ່າງກວ້າງຂວາງສະແດງອອກມີລູກຄ້າ ແລະຈໍານວນເງິນຝາກມີຕົວເລກເພີ່ມຂື້ນໃນແຕ່ລະເດືອນ ແລະຮ່ວມກັບ ທພລ ສໍານັກງານໃຫ່ຍເຮັດທົດລອງການເກັບເງິນຄ່າທໍານຽມ ແລະບໍລິການ ຫຼື Easy Pass ຜ່ານດ່ານສາກົນບໍ່ເຕນຕາມການຕົກລົງເຫັນດີຂອງລັດຖະບານກໍຄືກະຊວງການເງິນ ແລະ ອໍານາດການປົກຄອງແຂວງຂັ້ນຕ່າງໆ ໃຫ້ການຮ່ວມມືເປັນຢ່າງດີ ແລະໄດ້ມີການເປີດຢ່າງເປັນທາງການເມື່ອວັນທີ 30 ມັງກອນຜ່ານມານີ້. 

 ທ່ານ ສົມຫວັງ ເພັງມະດວງຈັກ ຍັງໄດ້ຢືນຢັນວ່າ: ຢູ່ແຂວງຫຼວງນໍ້າທາເຖິງຈະມີທະນາຄານເຖິງ 7 ແຫ່ງແລ້ວ ແລະຍັງມີທະນາຄານອື່ນໆກໍາລັງກະກຽມອາຄານສະ ຖານທີ່ທີ່ຈະທະຍອຍກັນມາເປີດສາຂານັບມື້ນັບເພີ້ມຂື້ນ, ຍິ່ງຈະເຮັດໃຫ້ການທໍາມາຫາກິນ, ການດໍາເນີນທຸລະກິດຂອງ ທພລ ທີ່ຫຍຸ້ງຍາກລໍາບາກຢູ່ແລ້ວກໍ່ຍິ່ງຈະຫຍຸ້ງຍາກກ່ວາເກົ່າເປັນສັນຍານເຕືອນໃຫ້ກຽມພ້ອມທຸກຢ່າງເພື່ອຮັບມືກັບສິ່ງເຫຼົ່ານີ້ຕັ້ງແຕ່ຫົວທີຊຶ່ງບັນດາທະນາຄານທີ່ຈະຍືນຍົງຄົງຕົວຢູ່ລອດປອດໄພໄດ້ນັ້ນກໍ່ບໍ່ໄດ້ໝາຍວ່າຈະຕ້ອງແມ່ນທະນາຄານທີ່ຮັ່ງມີເຂັ້ມແຂງໃຫ່ຍໂຕພຽງຢ່າງດຽວ, ແຕ່ພະນັກງານທະນາຄານຕ້ອງຮູ້ຈັກປັບປຸງຕົວເອງໃຫ້ເຂົ້າກັບສະພາບການແຕ່ລະໄລຍະໄດ້ດີເທົ່ານັ້ນ ຈຶ່ງຈະຍືນຍົງຕົວຢູ່ໄດ້ ແລະກ້າວໄປເຖິງການເຕີບໃຫ່ຍຂະຫຍາຍຕົວ.

   ແຕ່ດ້ວຍມູນເຊື້ອສາມັກຄີຮັກແພງຂອງ ທພລ ສາຂາຫຼວງນໍ້າທາ ທີ່ເປັນທຶນຮອນອັນລໍ້າຄ່າທີ່ມີຢູ່ແລ້ວໃນໄລຍະຜ່ານມາຕ້ອງສາມັກຄີກັນເຂົ້າຍິ່ງກ່ວາເວລາໃດໝົດ, ພ້ອມກັນປະຕິບັດໜ້າທີ່ວຽກງານທີ່ໄດ້ຮັບການມອບໝາຍດ້ວຍຄວາມຮັບຜິດຊອບສູງ, ເອົາໃຈໃສ່ຄົ້ນຄ້ວາຮໍ່າຮຽນ, ຝຶກອົບຮົມກັນເພື່ອຍົກສູງຄວາມຮູ້ຄວາມສາມາດໃຫ້ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ວິຊາສະເພາະເພື່ອຮັກສາໄດ້ຄຸນະພາບ ແລະ ຊື່ສຽງຂອງ ທພລ ສາຂາຫຼວງນໍ້າທາໃຫ້ຢືນຢູ່ໃນອັນດັບແຖວໜ້າຂອງທະນາຄານທຸລະກິດທີ່ມີຢູ່ໃນແຂວງຢູ່ໃນປະຈຸບັນນີ້ດ້ວຍການປະຕິບັດຄໍາຂວັນທີ່ວ່າ: ຊື່ສັດໝັ້ນຄົງໂປ່ງໃສທັນສະໄໝຮັບໃຊ້ປະຊາຊົນຢ່າງແທ້ຈິງ ແລະ ຕ້ອງຫ້າວຫັນຫ້າວຫັນເຂັ້ມແຂງ, ມີຄວາມສາມັກຄີເປັນປຶກແຜ່ນເປັນຈິດໜຶ່ງໃຈດຽວກັນໃນການປະຕິບັດໜ້າທີ່ວຽກງານຕາມການມອບໝາຍໃຫ້ມີຜົນສໍາເລັດເພື່ອເຮັດໃຫ້ ທພລ ມີຜົນກໍາໄລ, ມີຄວາມຮຸ່ງເຮືອງຈະເລີນຕະຫຼອດໄປ.

___________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

     

แชร์