2 ໂຄງການໃຫຍ່ຢູ່ໄຊສົມບູນ ສະເໜີ 7 ບັນຫາສໍາຄັນໃຫ້ລັດຊ່ວຍຊຸກຍູ້ສົ່ງເສີມ

 ເພື່ອເຮັດໃຫ້ 2 ໂຄງການໃຫຍ່ຂອງບໍລິສັດກຸ່ມ ຄຳໄພຊະນະ ຈຳກັດຜູ້ດຽວ ທີ່ພວມດຳເນີນການຢູ່ແຂວງໄຊສົມບູນຖືກດຳເນີນການຈັດຕັ້ງປະຕິບັດ ແລະພັດທະນາຢ່າງມີປະສິດທິຜົນປະຊາຊົນໄດ້ຮັບຜົນປະໂຫຍດຫຼາຍທີ່ສຸດທັງໃຫ້ສອດຄ່ອງກັບລະບຽບກົດໝາຍໂດຍສະເພາະແມ່ນດຳລັດສະບັບເລກທີ 414/ລບ ທາງໂຄງການໄດ້ສະເໜີໃຫ້ພັກ ແລະ ລັດຖະບານແຕ່ຂັ້ນສູນກາງລົງຮອດທ້ອງຖີ່ນໂດຍສະເພາະແມ່ນຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງ ແຂວງໄຊສົມບູນ ປະກອບສ່ວນເອື້ອອຳນວຍຄວາມສະດວກໃນດ້ານຕ່າງໆລວມກັນທັງໝົດ 7 ບັນຫາສຳຄັນ.

  ກອງປະຊຸມເປີດກວ້າງຂອງຄະນະຮັບຜິດຊອບຊີ້ນຳການພັດທະນາເຂດຈຸມໃຈກາງແຂວງໄຊສົມບູນທີ່ຈັດຂຶ້ນເມື່ອບໍ່ດົນຜ່ານມານີ້ໂດຍພາຍໃຕ້ການເປັນປະທານຂອງທ່ານ ພັນຄຳ ວິພາວັນ ຮອງປະທານປະເທດ ທັງເປັນຫົວໜ້າຄະນະຊີ້ນຳການພັດທະນາເຂດຈຸມໃຈກາງໜຶ່ງໃນວາລະທ່ານ ຄຳໄພ ສົມຊະນະ ປະທານບໍລິສັດກຸ່ມຄຳໄພຊະນະ ຈຳກັດຜູ້ດຽວກໍໄດ້ຂຶ້ນປະກອບຄວາມຄິດເຫັນຄວາມຄືບໜ້າກ່ຽວກັບໂຄງການ KPG ປັບປຸງຊີວິດການເປັນຢູ່ປະຊາຊົນເພື່ອແກ້ໄຂຄວາມທຸກຍາກ ແລະໂຄງການ KPG ພັດທະນາສະຖານທີ່ທ່ອງທ່ຽວສະຫວັນທະເລໝອກພູເບ້ຍແຂວງໄຊສົມບູນພ້ອມກັບສະເໜີຕໍ່ພັກ ແລະ ລັດຖະບານກໍຄືຄະນະຮັບຜິດຊອບຊີ້ນຳການພັດທະນາເຂດຈຸດສຸມໃຈກາງເພື່ອໃຫ້ການຊຸກຍູ້ສົ່ງເສີມດັ່ງນີ້:

   1; ມາຮອດຈຸດນີ້ການສຶກສາສຳຫຼວດກໍສຳເລັດແລ້ວຈະເຮັດແນວໃດເພື່ອໃຫ້ໂຄງການໄດ້ຮັບການພັດທະນາວ່ອງໄວຂຶ້ນກໍຂໍຮ້ອງໃຫ້ພັກ ແລະລັດຖະບານອະນຸມັດທັງ 2 ໂຄງການໃຫ້ຖືກຕ້ອງຕາມຂັ້ນຕອນລະບຽບກົດໝາຍ ແລະວ່ອງໄວທັນໃຈທີ່ສຸດເພື່ອຕອບສະໜອງຈິດໃຈ ແລະເນື້ອໃນຂອງດຳລັດສະບັບເລກທີ 414/ລບ ໃຫ້ມີຜົນສັກສິດບໍ່ໃຫ້ໂຄງການມີການຢຸດສະຫງັກເດີນໜ້າພັດທະນາຕາມແຜນການຢ່າງຕໍ່ເນື່ອງ.

   2; ອຳນວຍຄວາມສະດວກໃນການເຂົ້າຫາແຫຼ່ງທຶນ ແລະອັດຕາດອກເບ້ຍຕໍ່າພ້ອມມີໄລຍະຍາວນານເພາະ 2 ໂຄງການນີ້ແມ່ນມີຄວາມສຳຄັນທີ່ສຸດຈະປະກອບສ່ວນໃນແຜນພັດທະນາເສດຖະກິດ-ສັງຄົມຂອງແຂວງກໍຄືຂອງລັດຖະບານ ແລະ ໂຄງການກໍບໍ່ແມ່ນຂອງບໍລິສັດ ຫຼື ຂອງຂ້າພະເຈົ້າພຽງຜູ້ດຽວ ແຕ່ລະກິດຈະກຳທຸກວຽກ ງານຂອງໂຄງການແມ່ນກ່ຽວພັນກັບປະຊາຊົນໃນທ້ອງຖີ່ນຖ້າປ່ອຍໃຫ້ຂ້າພະເຈົ້າພຽງຝ່າຍດຽວທີມີຜ້າຫົ່ມຜືນນ້ອຍໆ ເມື່ອປົກຫວິດຫົວກໍຍັງຂາປົກຫວິດຂາກໍຍັງຫົວ ກໍຄົງເປັນໄປໄດ້ຍາກຂ້າພະເຈົ້າໃນຜ່ານມາກໍຜັນຂະຫຍາຍຕາມຈິດໃຈຂອງພັກ ແລະລັດຖະບານເຕັມທີ່ແລ້ວແຕ່ກໍຫົ່ມບໍ່ໄດ້ຫຼາຍຄົນຫຼືບໍ່ກວ້າງຂວາງສະນັ້ນ,ຈະເຮັດແນວໃດຈື່ງຈະໄດ້ຜ້າຫົ່ມຜືນໃຫຍ່ຈາກພັກຈາກລັດ ເພື່ອໃຫ້ສາມາດຫົ່ມໄດ້ຫຼາຍຄົນ ແລກວ້າງຂວາງກວມໄປຫຼາຍຄອບຄົວ ຫຼາຍບ້ານຫຼາຍເມືອງ ແລະຫຼາຍແຂວງ ຫຼື ຫຼາຍກວ່ານັ້ນໃຫ້ສາມາດຫົ່ມໄປໄດ້ອົບອຸ່ນໃນທົ່ວປະເທດຂ້າພະເຈົ້າເຊື່ອໝັ້ນວ່າມາຮອດເວລານີ້ພັກ ແລະ ລັດຖະບານຮັບຮູ້ດີແລ້ວ ແລະ ກຳແໜ້ນໄດ້ແລ້ວເຖິງເວລາອັນສົມ ຄວນແລ້ວທີ່ພັກ-ລັດຖະບານ ຄວນຈະຕັດສິນໃຈມອບຜ້າຫົ່ມຜືນໃຫຍ່ໃຫ້ແກ່ນັກທຸລະກິດ, ນັກພັດທະນາຜູ້ທີ່ເຮັດແທ້ທຳຈິງມີຄວາມຈິງໃຈຕໍ່ພັກຕໍ່ລັດ ແລະຕໍ່ປະຊາຊົນ ເພື່ອນຳໄປຈັດຕັ້ງຜັນຂະຫຍາຍໃຫ້ບັນລຸຜົນສຳເລັດໄດ້ຕາມທີ່ພັກ-ລັດຖະບານວາງຄາດໝາຍເອົາໄວ້.

  3; ຫາກມີຄວາມເປັນໄປໄດ້ກໍຂໍຮ້ອງໃຫ້ພາກສ່ວນກ່ຽວຂ້ອງຂອງລັດຊ່ວຍພິຈາລະນາທຶນຮອນບັນດາໂຄງການທີ່ບໍລິສັດລົງທຶນກ່ອນໃຫ້ພັກໃຫ້ລັດປະຕິບັດຖືກຕ້ອງ ແລະ ສຳເລັດແລ້ວໃນຜ່ານມາເພື່ອມາໝູນໃຊ້ເຂົ້າໃສ່ການພັດທະນາຂອງໂຄງການທີ່ຮ່ວມມືກັບປະຊາຊົນຢູ່ ແຂວງໄຊສົມບູນ ໃຫ້ໄດ້ໄວຂຶ້ນ.

  4; ຂ້າພະເຈົ້າຄິດວ່າເຖິງເວລາແລ້ວທີ່ພັກ ແລະລັດຖະບານຈະເຮັດແນວໃດເອົານັກທຸລະກິດຜູ້ເຮັດແທ້ທຳຈິງຜູ້ທີ່ມີຄວາມສາມາດ,ມີຄວາມພ້ອມ, ມີປະຫວັດຈະແຈ້ງ ແລະມີພື້ນຖານແໜ້ນໜາເຮັດ ແຕ່ນ້ອຍຫາໃຫຍ່ຄື ຂື້ນຂັ້ນໄດເປັນກ້າວໆ ມາເປັນນັກທຸລະກິດ ຮູ້ຜິດ ຮູ້ຖືກ ຮູ້ຢືມ ແລະຮູ້ສົ່ງ ໃຫ້ກາຍເປັນນັກພັດທະນາປະຕິວັດຈັບມືຄຽງບ່າຄຽງໄລ່ຮ່ວມກັນກັບພັກກັບລັດເພື່ອຊ່ວຍກັນສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຕາມແຜນການທີ່ພັກທີ່ລັດໄດ້ວາງຄາດໝາຍເອົາໄວ້.    

   5; ສະເໜີກ່ຽວກັບການນໍາເຂົ້າທຶນຈໍານວນ 260 ລ້ານໂດລາສະຫະລັດເພື່ອມາດຳເນີນໂຄງການພັດທະນາພື້ນຖານໂຄງລ່າງຄົບວົງຈອນທີ່ບໍລິສັດກຸ່ມ ຄຳໄພມີການຮ່ວມມືກັບບໍລິສັດໄຮທາລາເຊັນສັນຍາສຶກສາຄວາມເປັນໄປໄດ້ກັບອົງການປົກແຂວງໃນຄັ້ງວັນທີ 25 ກໍລະກົດ 2018 ກໍຂໍໃຫ້ພັກ ແລະລັດຖະບານພິຈາລະນາເພື່ອເຮັດແນວໃດໃຫ້ໄດ້ ນຳທຶນດັ່ງກ່າວເຂົ້າມາພັດທະນາແຂວງ ໄຊສົມບູນຕາມແຜນການຂອງພັກ ແລະ ລັດຖະບານ ຊື່ງບໍລິສັດໄຮທາລາຂ້າພະ ເຈົ້າຂໍຢືນຢັນວ່າ ເປັນບໍລິສັດທີ່ມີຄວາມໜ້າເຊື່ອຖືສູງ ຫຼືເປັນບໍລິສັດໃຫຍ່ໜື່ງຂອງຈີນທີ່ມີຄວາມເຂັ້ມແຂງທາງດ້ານການເງິນ ແລະປະສົບການມາຍາວນານຊຶ່ງຜ່ານມາກໍໄດ້ມີການໄປລົງທຶນຢູ່ຫຼາຍໆ ປະ ເທດໃນທົ່ວໂລກຖ້າເຮົາສາມາດດຶງບໍລິສັດນີ້ເຂົ້າມາໄດ້ກໍຈະເປັນຜົນດີທີ່ສຸດຕໍ່ແຜນການພັດທະນາແຂວງໄຊສົມບູນຂອງພວກເຮົາ;

   6; ສະເໜີໃຫ້ພາກສ່ວນທີ່ກ່ຽວຂ້ອງເບື້ອງລັດປະກອບຄວາມຄິດເຫັນຕໍ່ການພັດທະນາທັງ 2 ໂຄງການນີ້ໂດຍສະເພາະແມ່ນສະຖານທີ່ທ່ອງທ່ຽວພູເບ້ຍ ແລະຖໍ້າເຈົ້າອານຸວົງເລາະຕາມສາຍນໍ້າຈັ້ງເພື່ອຄວາມເປັນເອກະພາບໃນການຂຽນປະຫວັດ, ທີ່ມາຂອງຊື່ເອີ້ນແຕ່ລະຈຸດສຳຄັນເຊັ່ນ: ຄຳວ່າພູເບ້ຍ, ຜາເທີ ແລະພືດພັນຕ່າງໆ.

   7; ຮຽກຮ້ອງມາຍັງການນໍາທຸກຂັ້ນໂດຍສະເພາະຂັ້ນແຂວງ, ຂັ້ນເມືອງ ແລະບ້ານຈົ່ງຊ່ວຍບໍລິສັດເພື່ອປຸກລະດົມດ້ານການເມືອງແນວຄິດໃຫ້ພໍ່ແມ່ປະຊາຊົນທຸກຊັ້ນຄົນໄດ້ເຂົ້າໃຈຕໍ່ໂຄງການເປັນຕົ້ນແມ່ນໂຄງການ KPG ປັບປຸງຊີວິດການເປັນຢູ່ປະຊາຊົນເພື່ອແກ້ໄຂຄວາມທຸກຍາກດ້ວຍການຜະລິດກະສິກຳສະອາດຄົບວົງຈອນພ້ອມທັງປະກອບສ່ວນຊຸກຍູ້, ຊ່ວຍເຫຼືອເຮັດໃຫ້ບໍລິສັດກໍຄືໂຄງການໄດ້ມີການພັດທະນາຂະຫຍາຍຖານການຜະລິດໄປເລື້ອຍໆໃນແຕ່ລະຄອບຄົວ, ແຕ່ລະບ້ານ ແລະແຕ່ລະເມືອງຂອງ ແຂວງໄຊສົມບູນ.

  ສຳລັບຄວາມຄືບໜ້າຂອງ 2 ໂຄງການແມ່ນໄດ້ເດີນໜ້າຈັດຕັ້ງປະຕິບັດຢ່າງມີໝາກຜົນສຳເລັດສະເພາະໂຄງການ KPG ປັບປຸງຊີວິດການເປັນຢູ່ປະຊາຊົນແຂວງໄຊສົມບູນ ພາຍຫຼັງທີ່ໄດ້ຮັບອະຍຸຍາດເຂົ້າສຶກສາສຳຫຼວດຄວາມເປັນ ໄດ້ນັບແຕ່ທ້າຍປີ 2018 ເປັນຕົ້ນມາກໍ ໄດ້ສຸມເອົາໃຈໃສ່ຮ່ວມກັບພາກລັດ ແລະ ປະຊາຊົນພ້ອມທັງໄດ້ມອບແນວແກ່ນຫຍ້າ ແລະງົວແມ່ພັນພື້ນລາວເພື່ອສົ່ງເສີມໃຫ້ປະຊາຊົນລ້ຽງເປັນຟາມໄປກ່ອນ ແລ້ວຈຳນວນ 2 ຄັ້ງຢູ່ບ້ານກໍໄຮ, ບ້ານອ້ອມເມືອງອານຸວົງ 209 ໂຕ ແລະຢູ່ບ້ານນາຊົງ ແລະ ບ້ານວຽງທອງ ເມືອງທ່າໂທມ ຈຳນວນ 197 ໂຕ ແລະຍັງຈະສືບມອບໝູນວຽນໄປເລື້ອຍໆ ສ່ວນໂຄງການ KPG ພັດທະນາສະຖານທີ່ທ່ອງ ທ່ຽວສະຫວັນທະເລໝອກພູເບ້ຍແຂວງໄຊສົມບູນຫຼັງຮັບອະນຸຍາດໃນກາງເດືອນ ກຸມພາ 2019 ຮອດຂະນະນີ້ໂຄງການກໍໄດ້ສຳເລັດການສຶກສາສຳຫຼວດຂັ້ນຕອນສຸດ ທ້າຍກ່ອນຂໍອະນຸມັດພັດທະນາຈາກພັກ ແລະລັດຖະບານໂດຍຈະມີການພັດທະນາຫຼາກຫຼາຍກິດຈະກຳຂຶ້ນໃໝ່ໄປຄຽງຄູ່ກັບອະນຸລັກສີ່ງມະຫັດສະຈັນຂອງທຳມະຊາດທີ່ມີຢູ່ຫຼາກລາຍຮ່ວມກັບປະຊາຊົນໃນທ້ອງຖີ່ນ.

_______________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์