ໄຊຍະ ຂຸ້ນຂ້ຽວປູກພືດລະດູແລ້ງ ຮອດເວລານີ້ທົ່ວແຂວງສຳເລັດເກືອບ 100%

  ການປູກພືດລະດູແລ້ງຂອງຊາວກະສິກອນແຂວງໄຊຍະບູລີໃນປີ 2019-2020 ເກືອບສຳເລັດແລ້ວ 100% ພາຍຫຼັງທີ່ຂຸ້ນຂ້ຽວລົງມືຜະລິດມາແຕ່ເດືອນທັນວາປີຜ່ານມານີ້ເພື່ອເຮັດໃຫ້ການຜະລິດປູກພືດຕ່າງໆ ໃນລະດູແລ້ງໄປຕາມລະດູການແລະຮັບປະກັນຜົນຜະລິດໃນບັ້ນເກັບກູ້ໃນທ້າຍລະດູທັງນີ້ຄາດວ່າການປູກພືດລະດູແລ້ງຂອງຊາວກະສິກອນທົ່ວ ແຂວງໄຊຍະບູລີ ແມ່ນຈະໃຫ້ສຳເລັດ 100% ໃນກາງເດືອນກຸມພາ 2020 ນີ້.

   ຕາມການໃຫ້ຂໍ້ມູນຈາກຂະແໜງປູກຝັງພະແນກກະສິກໍາ ແລະປ່າໄມ້ແຂວງໄຊຍະບູລີໃຫ້ຮູ້ວ່າ: ການປູກພືດລະດູແລ້ງຂອງຊາວກະສິກອນທົ່ວແຂວງມີເນື້ອທີ່ແຜນ ການທັງໝົດ 16.891 ເຮັກຕາ; ໃນນີ້ເນື້ອທີ່ປູກເຂົ້ານາແຊງມີ 2.300 ເຮັກຕາ, ເຮັດນາ ກະເສດສຸມມີ 872 ເຮັກຕາ ຄາດຄະເນສະມັດຕະພາບສະເລ່ຍ 4,20 ໂຕນຕໍ່ເຮັກຕາ, ຄາດຄະເນຜົນຜະລິດ 9.660 ໂຕນ. ສ່ວນແຜນປູກພືດຜັກຕ່າງໆມີ 14.591 ເຮັກຕາ, ຄາດຄະເນຜະລິດຕະ ພາບ 6,66 ໂຕນຕໍ່ເຮັກຕາ, ຄາດ ຄະເນ ຜົນຜະລິດ 97.217 ໂຕນ.

  ປະຈຸບັນການຜະລິດເຂົ້ານາແຊງຕາມແຜນການມີທັງໝົດ 2.300 ເຮັກຕາ ມາຮອດປະຈຸບັນຕົກກ້າໄດ້ 94,15%, ກຽມດິນໄດ້ 2,07 ພັນເຮັກຕາ ເທົ່າກັບ 90 ,30% ແລະປັກດໍາສໍາເລັດແລ້ວ 2,07 ພັນເຮັກຕາ ເທົ່າກັບ 90,30%.

 ນອກຈາກປູກເຂົ້ານາແຊງແລ້ວຊາວກະສິກອນແຂວງໄຊຍະບູລີຍັງໄດ້ປູກພືດຜັກຕ່າງໆຮັບໃຊ້ບໍລິໂພກ ແລະຂາຍເປັນສິນຄ້າ, ເຊິ່ງມີເນື້ອທີ່ແຜນການປູກທັງໝົດ 14,5 ພັນເຮັກຕາ ມາຮອດປະຈຸບັນແມ່ນປະຕິບັດໄດ້ 21,4 ພັນເຮັກຕາ ເທົ່າກັບ147,34% ຖືວ່າລື່ນແຜນການທີ່ຕັ້ງໄວ້.

   ພ້ອມດຽວກັນນີ້ທາງແຂວງກໍ່ຄືພາກສ່ວນທີ່ກ້ຽວຂ້ອງຍັງໄດ້ຊຸກຍູ້ຜູ້ປະກອບການພາຍໃນ ແລະຕ່າງປະເທດລົງທຶນເຂົ້າໃນການປູກພືດເປັນສິນຄ້າມີ 11 ບໍລິສັດ, ມີເນື້ອທີ່ທັງໝົດ 1,6 ພັນເຮັກຕາ ໃນນີ້ລົງທຶນປູກໝາກຖົ່ວເຫຼືອງ 2 ບໍລິສັດມີເນື້ອທີ່442,29 ເຮັກຕາ ແລະປູກໝາກໂມ 9 ບໍລິສັດ ມີເນື້ອທີ່ 1,2 3 ພັນເຮັກຕາ.

  ສ່ວນການສົ່ງອອກ ແລະນໍາເຂົ້າຜົນຜະລິດກະສິກໍາໃນປີຜ່ານມາຍັງມີການຂະຫຍາຍຕົວຢ່າງຕໍ່ເນື່ອງເຊັ່ນ: ສົ່ງອອກແກນສາລີຈໍານວນ 117 ໂຕນກວ່າ ມູນຄ່າ 1.1 7 9 ໂດລາ, ໝາກເດືອຍສີຈໍານວນ 145 ໂຕນກວ່າ ມູນຄ່າ55.100 ໂດລາ, ແຂມ 15 ໂຕນ ມູນຄ່າ 3.750 ໂດລາ, ໝາກແຕງດອງ 46 ໂຕນກວ່າມູນຄ່າ 2.799 ໂດລາ, ຂີງ 145 ໂຕນ ມູນຄ່າ 48,03 ພັນໂດລາ, ມັນຕົ້ນແຫ້ງ 10,21 ໂຕນ ມູນຄ່າ 1,12 ພັນໂດລາ, ໝາກນໍ້າມັນ 1 ໂຕນ ມູນຄ່າ 625 ໂດລາ, ຖົ່ວແດງ 117 ໂຕນ ມູນຄ່າ 50,3 ພັນໂດລາ, ໝາກໂມ 2,4 ພັນໂຕນ ມູນຄ່າ 2,42 ແສນໂດລາ. ຂະນະທີ່ນໍາເຂົ້າ ໝາກໄມ້ມີ 9 ໂຕນ ມູນຄ່າ 6.611 ໂດລາ, ພືດຜັກຕ່າງໆຈໍານວນ 1 ໂຕນກວ່າ ມູນຄ່າ 876 ໂດລາ.

________________

ຂຽນໂດຍ: ບຸນທີ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์