ເຊັນສັນຍາລົງທຶນປູກດອກກຸຫຼາບ ແລະດອກລາເວນເດີ ທີ່ຊຽງຂວາງ

  ວັນທີ 31 ມັງກອນ 2020 ຢູ່ຫ້ອງປະຊຸມພະແນກແຜນການ ແລະການລົງທຶນແຂວງຊຽງຂວາງໄດ້ມີພິທີເຊັນຍາວ່າດ້ວຍການລົງທຶນປູກດອກກຸຫຼາບ ແລະດອກລາເວນເດີຕິດພັນກັບການທ່ອງທ່ຽວຢູ່ບ້ານໜອງຫຼວງ ແລະບ້ານພູເກັງ, ເມືອງແປກລະຫວ່າງອົງການປົກຄອງແຂວງຕາງໜ້າໂດຍພະແນກແຜນການ ແລະການລົງທຶນແຂວງກັບບໍລິສັດຢູຊີຊິນຊື່ລູ່ພັດທະນາຊັບພະຍາກອນຊີວະພາບຈຳກັດຜູ້ດຽວຂຶ້ນຢ່າງເປັນທາງການ.

  ໃນພິທີທ່ານ ນາງ ສື ຊາວ ຫົວ ປະທານບໍລິສັດຢູຊີຊິນລູ່ພັດທະນາຊັບພະຍາກອນຊີວະພາບຈຳກັດໄດ້ມີຄຳເຫັນຕໍ່ໂຄງການດັ່ງກ່າວວ່າໂຄງການປູກດອກກຸຫຼາບ ແລະດອກລາເວນເດີຕິດພັນກັບການທ່ອງທ່ຽວຕາມການຜ່ານການເຫັນດີ ແລະປຶກສາຫາລືຂອງຄະນະການນໍາແຂວງ, ຫົວໜ້າພະແນກການ ແລະວິຊາການຕ່າງໆ.

   ຢູ່ສະຖານທີ່ແຫ່ງນີ້ແມ່ນມີສະພາບອາກາດທີ່ເໝາະສົມກັບການຢູ່ອາໄສຂອງບຸກຄົນ ແລະຄົວເຮືອນຕ່າງໆ ເພາະອາກາດຢູ່ນີ້ມີຄວາມອົບອຸ່ນໃນລະດູໜາວ ແລະ ມີອາ ກາດເຢັນໃນລະດູຮ້ອນ, ມີທົ່ງຫຍ້າທີ່ງົດງາມ ແລະອຸດົມສົມບູນ, ສຳລັບພວກຂ້າພະເຈົ້າໄປມາໝົດທຸກຫົນທຸກແຫ່ງແລ້ວແຕ່ຈິດໃຈກໍ່ຍັງບໍ່ມີຄວາມມັກ ແລະຮັກເທົ່າທົ່ງພຽງທົ່ງໄຫຫີນທີ່ຢູ່ໂພນສະຫວັນແຂວງຊຽງຂວາງນີ້ມາກ່ອນ, ສະຖານທີ່ແບບນີ້ແມ່ນເປັນຄວາມໄຝ່ຝັນທີ່ພວກຂ້າພະເຈົ້າສະແຫວ່ງຫາມາໂດຍຕະຫຼອດ.

  ຈາກນັ້ນ, ອົງການປົກຄອງແຂວງຊຽງຂວາງຕາງໂດຍພະແນກແຜນການ ແລະ ການລົງທຶນແຂວງ ທ່ານ ອຳໄພ ວັນຈັນທະລັງສີ ຮອງຫົວໜ້າພະແນກແຜນການ ແລະການລົງທຶນແຂວງກັບທ່ານ ນາງ ສື ຊາວ ຫົວ ປະທານບໍລິສັດ ຢູຊີຊິນຊ່ືລູ່ພັດທະນາຊັບພະຍາກອນຊີວະພາບຈຳກັດໄດ້ຮ່ວມກັນເຊັນໃນນາມຄູສັນຍາ ແລະ ທ່ານ ບຸນໂຮມ ເທດທານີ ຄະນະປະຈໍາພັກແຂວງ ຫົວໜ້າພະແນກ ກະສິກຳ ແລະປ່າໄມ້ແຂວງ, ທ່ານ ສີວິ ໄລ ອຸດົມສຸກ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງ ແລະທ່ານ ຈາງຈີ ຊວາງ ຮອງ ປະທານບໍລິສັດ ຢູຊີຊິນຊ່ືລູ່ພັດທະນາຊັບພະຍາກອນຊີວະພາບຈຳກັດ ໄດ້ຮ່ວມກັນເຊັນໃນນາມພະຍານໂດຍທ່ານ ບຸນຕົ້ນ ຈັນທະພອນ ເຈົ້າແຂວງແຂວງຊຽງຂວາງ, ບັນດາທ່ານຫົວໜ້າ, ຮອງຫົວໜ້າພະແນກການອ້ອມຂ້າງແຂວງ ແລະວິຊາການຈາກຂະແໜງການທີ່ກ່ຽວ ຂ້ອງເຂົ້າຮ່ວມເປັນສັກຂີພິຍານໃນການເຊັນສັນຍາໃນຄັ້ງນີ້.

_____________

ຂຽນໂດຍ: ແສງມາລີຕິກ    
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 06/02/2020