ທພລ ສາຂາຫ້ວຍຊາຍມີແຜນສ້າງຜົນກຳໄລ

  ທ່ານ ມີໄຊ ສີລິວັດ ຮັກສາການຫົວໜ້າທະນາຄານພັດທະນາລາວ (ທພລ) ສາຂາຫ້ວຍຊາຍ ແຂວງບໍ່ແກ້ວ ໄດ້ແຈ້ງໃຫ້ຮູ້ຜົນການດໍາເນີນທຸລະກໍາໃນຮອບປີ 2019 ຜ່ານມາໂດຍມີຍອດຊັບສິນທັງໝົດ 384,48 ຕື້ກີບ ເມື່ອທຽບໃສ່ປີ 2018 ເພີ່ມຂຶ້ນ32, ຕື້ກີບ ເພີ່ມຂຶ້ນ 9,08% ທຽບໃສ່ແຜນປະຕິບັດໄດ້ 4,10%; ດ້ານການນໍາໃຊ້ທຶນ, ມີຍອດສິນເຊື່ອທັງໝົດ 105,99 ຕື້ກີບ ທຽບໃສ່ປີ 2018 ຫຼຸດລົງ 46,54%; ດ້ານແຫຼ່ງທຶນ (ເງິນຝາກ) ມີຍອດເງິນຝາກທັງໝົດ 396,16 ຕື້ ກີບ ທຽບໃສ່ປີ 2018 ເພີ່ມຂຶ້ນ 38,48 ຕື້ກີບ ຫຼື ເທົ່າກັບ 10,76%, ທຽບໃສ່ແຜນປີປະຕິບັດໄດ້ 5,85%, ໃນນີ້ເງິນຝາກທຸກປະເພດເພີ່ມຂຶ້ນທຽບໃສ່ແຜນປີ 2019 ເພີ່ມຂຶ້ນ 21,9 ຕື້ກີບ

 ທ່ານຮັກສາການຫົວໜ້າ ທພລ ສາຂາຫ້ວຍຊາຍ ໄດ້ຢືນຢັນວ່າ: ສາຂາຫ້ວຍຊາຍມີຈໍານວນລູກຄ້ານໍາໃຊ້ຜະລິດຕະພັນໃໝ່ຮອດທ້າຍເດືອນທັນວາ 2019 ມີຕູ້ ATM ທັງໝົດ 9 ໜ່ວຍ, ສາຂາຮັບ ຜິດຊອບ 7 ໜ່ວຍ, ບັດ ATMcard  8.342  ບັດ, MOBILE Banking (LDB Trust) 652 ຄົນ,Trus Pay, LDB QR Code 164 ຮ້ານ, ປະກັນໄພ 262 ລາຍການເປັນເງິນ257.169.515 ກີບ, Western Union ຂາເຂົ້າ 100 ລາຍການເປັນເງິນ 0,44 ຕື້ກວ່າກີບ, Western Union ຂາອອກ 26 ລາຍການເປັນເງີນ 31,110 ໂດລາ, ເງິນຜ່ານການຊຳລະສະສາງ 31,1 ຕື້ກວ່າກີບ, ຄ່າທຳນຽມຂອງຂົວມິດຕະພາບ 4 ມີ 10,84 ຕື້ກວ່າກີບ (ຄ່າທຳນຽມວິຊາ 5,963ຕື້ກີບ,ຄ່າທຳນຽມຄົນ ແລະພາຫະນະ4.861 ຕື້ກີບ) ແລະມີຄາດໝາຍສູ້ຊົນແຜນທຸລະກິດປະຈຳປີ 2019 ທພລ ສາຂາຫ້ວຍຊາຍ ໃຫ້ມີກຳໄລ 314 ລ້ານກີບ.

  ທ່ານຮັກສາການຫົວໜ້າ ທພລ ສາຂາຫ້ວຍຊາຍ ຍັງແຈ້ງແຜນດໍາເນີນທຸລະກໍາໃນຕໍ່ໜ້າແມ່ນຈະເອົາໃຈໃສ່ລະດົມເງິນຝາກເນັ້ນໃສ່ເງິນຝາກກະແສລາຍວັນໃນການຂາຍຜະລິດຕະພັນຕ່າງໆ ດ້ວຍວິທີໂຄສະນາຜ່ານສື່ອິນເຕີເນັດ, ໂທລະພາບ, ວິທະຍຸ, ໜັງສືພິມ, ວາລະສານຕ່າງໆເພື່ອໃຫ້ສັງຄົມໄດ້ຮັບຮູ້ຢ່າງກ້ວາງຂວາງ ແລະນຳໃຊ້ໃຫ້ຫຼາຍຂຶ້ນ, ສ້າງເອກະສານໃນການໂຄສະນາ, ອະທິບາຍຄວາມໝາຍຄວາມສໍາຄັນຂອງຜະລິດຕະພັນຕ່າງເພື່ອເປັນເຄື່ອງມືໃຫ້ແກ່ພະນັກງານຜູ້ຮັບຜິດຊອບໄດ້ນໍາໃຊ້ຢ່າງຖືກຕ້ອງ; ສືບຕໍ່ເດີນຕະຫຼາດຂາຍຜະລິດຕະພັນໃໝ່, ເຂົ້າຫາກຸ່ມລູກຄ້າທີ່ໄດ້ເຊັນສັນຍາແລ້ວເພື່ອທົບທວນຄືນດ້ານດີ-ດ້ານອ່ອນແລະສ່ວນທີ່ຍັງຄ້າງກໍ່ໃຫ້ໄດ້ນໍາໃຊ້ຢ່າງທົ່ວເຖິງ, ຂະຫຍາຍກຸ່ມລູກຄ້າໃໝ່ທັງເຮັດການໂຄສະນາແລະຕິດຕັ້ງການນໍາໃຊ້ໄປພ້ອມ, ເພື່ອປະຕິບັດຕົວເລກຄາດໝາຍແຜນການ 2019 ທີ່ວາງໄວ້.

ສໍາລັບແຜນນຳໃຊ້ສິນເຊື່ອ, ສາຂາຫ້ວຍຊາຍໄດ້ຖືເອົາການເກັບກູ້ໜີ້ສິນເປັນບຸລິມະສິດໃນແຜນປີ 2019, ອອກແຮງໃນການເກັບກູ້ໜີ້ສິນ NPLs ທັງໝົດ, ດ້ວຍການແຕ່ງຕັ້ງເປັນຄະນະກໍາການ, ອະນຸກຳມະການເກັບກູ້ໜີ້ສິນຂອງສາໂດຍແມ່ນຫົວໜ້າສາຂາເປັນປະທານ, ແບ່ງຄວາມຮັບຜິດຊອບເປັນຈຸອະນຸກໍາການ, ແບ່ງລູກຄ້າໃຫ້ແຕ່ລະຈຸຕາມຄວາມເໝາະສົມ,ແຕ່ລະຈຸລົງຫາລູກຄ້າເພື່ອໄກ່ເກ່ຍເກັບກູ້ໜີ້ສິນຄືນເປັນແຕ່ລະລາຍ, ແຕ່ງ່າຍຫາຍາກ,ມີການສະຫຼຸບເປັນແຕ່ລະອາທິດ, ເດືອນ, ປີລາຍ ງານໃຫ້ປະທານເພື່ອຕີລາຄາ, ຖອດຖອນບົດຮຽນ ແລະວາງວິທີແກ້ໄຂໃນໄລຍະຕໍ່ໄປ; ເອົາໃຈໃສ່ປັບປຸງວຽກງານບໍລິການໃຫ້ພະນັກງານທຸກຄົນຕ້ອງເພີ້ມຄວາມສະດວກ ວ່ອງໄວ, ຍີ້ມແຍ້ມແຈ່ມໃສໃນການບໍລິການ, ສ້າງຄວາມປະທັບໃຈຂອງລູກຄ້າພ້ອມທັງຮັບປະກັນຄວາມຖືກຕ້ອງ; ປັບປຸງພະນັກງານ Teller ໃຫ້ມີຄວາມຕື່ນຕົວພັດ ທະນາຕົນເອງໃຫ້ມີທັກສະ, ຄວາມຊໍານານໃນໜ້າທີ່ຂອງຕົນ; ສົມທົບກັບຂະແໜງການຕະຫຼາດຈັດສໍາມະນາການນໍາໃຊ້ຜະລິດຕະພັນໃໝ່ອີກຕື່ມໂດຍສະເພາະການນໍາໃຊ້ LDB trust ແລະໃຫ້ພະນັກງານທຸກຄົນທີ່ຍັງບໍ່ທັນໄດ້ເຂົ້າຮ່ວມເພື່ອພ້ອມກັນນຳໄປຈັດຕັ້ງປະຕິບັດໃຫ້ໄດ້ຕົວເລກເປົ້າໝາຍແຜນການປີ 2019.

______________

ຂຽນໂດຍ: ຣັດສະໝີ ດວງສັດຈະ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์