ເປີດງານບຸນນະມັດສະການພະທາດໂຜ່ນປະຈໍາປີ 2020

ພິທີເປີດງານບຸນນະມັດສະການພະທາດໂຜ່ນປະຈໍາປີ 2020 ໄດ້ຈັດຂຶ້ນຢ່າງເປັນທາງການລະຫວ່າງວັນທີ 4-8 ກຸມພາ2020 ທີ່ເວທີກາງວັດພະທາດໂຜ່ນໂດຍການໃຫ້ກຽດເຂົ້າຮ່ວມຂອງທ່ານ ວົງເພັດ ໄຊສະຫວງ ຮອງເຈົ້າແຂວງໆ ສະຫວັນນະເຂດ, ມີຄະນະປະຈໍາພັກແຂວງ, ກໍາມະການພັກແຂວງ, ຄະນະອໍານວຍການສະຖາ ບັນການສຶກສາຕ່າງໆ, ເລຂາພັກເມືອງ-ເຈົ້າເມືອງ ແລະເມືອງອອ້ມຂ້າງເຂົ້າຮ່ວມ, ກໍາມະການພັກເມືອງ, ຫ້ອງການອອ້ມຂ້າງເມືອງ, ບັນດາເລຂາໜ່ວຍພັກ-ນາຍບ້ານ 8 ກຸ່ມບ້ານ ພາຍໃນເມືອງ, ອົງການຈັດຕັ້ງມະຫາຊົນ, ຕະຫລອດເຖິງປະຊາຊົນຜູ້ມາທ່ຽວງານບຸນເຂົ້າຮ່ວມຢ່າງຄຶກຄື້ນ.

ທ່ານ ຄໍາວິໃສ ຜຸຍຍະວົງ ເຈົ້າເມືອງໆ ໄຊພູທອງປະທານຈັດງານບຸນດັ່ງກ່າວໄດ້ຂຶ້ນກ່າວເປີດງານຢ່າງເປັນທາງການຊຶ່ງບາງຕອນທ່ານກ່າວວ່າ: ການຈັດງານບຸນນະມັດ ສະການພະທາດໂຜ່ນປະຈໍາປີ 2020 ຊິ່ງເປັນບຸນໃຫຍ່ຂອງຊາວແຂວງສະຫວັນນະເຂດ, ເວົ້າສະເພາະກໍຄືຊາວ ເມືອງໄຊພູທອງ ທີ່ໄດ້ຈັດຂຶ້ນເປັນປະຈໍາ ໃນທຸກໆປີເພື່ອເປັນການສຶບທອດມູນເຊື້ອປະເພນີອັນດີງາມທີ່ເປັນເອກະລັກທາງດ້ານວັດທະນະທຳທີ່ອຸດົມສົມບູນມີຫຼາຍສີສັນ ແລະ ມີການເຂົ້າຮ່ວມກວ້າງຂວາງຂອງປວງຊົນລາວບັນ ດາເຜົ່າໃນຂອບເຂດທົ່ວປະເທດ ແລະປະເທດໃກ້ຄຽງ,ຈຸດປະສົງຂອງການຈັດງານດັ່ງກ່າວຮັບປະກັນໃຫ້ໄດ້ການອະນຸລັກຮັກສາການສົ່ງເສີມວັດທະນະທຳຮີດຄອງປະເພ ນີອັນດີງາມທີ່ໄດ້ສືບທອດກັນຫຼາຍຮຸ່ນຄົນໃຫ້ມີຄວາມຍຶນຍົງຄົງຄູ່ຄົນລາວຕະຫຼອດໄປເປັນການສ້າງໂອກາດໃນການໂຄສະນາກ່ານທ່ອງທ່ຽວຂອງ ສປປ ລາວ ແລະການທ່ອງທ່ຽວຂອງເມືອງໄຊພູທອງ, ເປັນການຊຸກຍູ້ສົ່ງເສີມການຜະລິດເສດຖະກິດທຸກພາກສ່ວນເສດຖະກິດ.

  ທ່ານ ຄໍາວິໃສ ຜຸຍຍະວົງ ຍັງໄດ້ຍົກໃຫ້ປະຫວັດຄວາມເປັນມາເຫັນໄດ້ເຖິງຄວາມເປັນຈິງຂອງເມືອງໄຊພູທອງຖືວ່າເປັນເມືອງໜຶ່ງໃນດິນແດນແຫ່ງອະລິຍະທໍາທັງນີ້ກໍຍ້ອນເປັນທີ່ຕັ້ງຂອງພະທາດໂພ່ນເຊິ່ງແມ່ນປູ່ສະນີຍະສະຖານທີ່ມີຄວາມສັກສິດຄູ່ບ້ານຄູ່ເມືອງຂອງຊາວພຸດເວົ້າລວມກໍຄືຊາວພຸດທະສາສະນິກະຊົນທີ່ໃຫ້ຄວາມເຄົາລົບບູຊາມາແຕ່ບູຮານນະການຊຶ່ງຕາມຕໍານານໄດ້ກ່າວໄວ້ວ່າ: ເຈົ້າແມ່ແພງສີໄດ້ພ້ອມໃຈກັນສ້າງພະທາດອົງນີ້ ຂຶ້ນໃນຕອນຄໍ່າຂອງວັນພຸດ ເດືອນ12 ພສ 118 ລົງມືສ້າງຕ່ອນຄໍ່າ ສ້າງດ້ວຍ ຫີນເຂົ້າຈີ່ ຫຼືເອີ້ນວ່າ: (ຫີນໝາມໜໍ່) ກໍເປັນທາດອຸໂມງ (ຮູບໂອຂວໍ້າ) ພະ ທາດຮູບນີ້ກວ້າງດ້ານລະ 12 ວາສ້າງ ມື້ໜຶ່ງກັບຄືນໜຶ່ງຈຶ່ງສໍາເລັດ.

ມາເຖິງປະ ຈຸບັນນີ້ມີອາຍຸເຖິງ 2.439 ປີ ສະນັ້ນສະຖານທີ່ແຫ່ງນີ້ຈຶ່ງຖືວ່າເປັນມໍລະດົກຕົກທອດ, ເປັນຊັບສົມບັດມິ່ງບ້ານມິ່ງເມືອງທີ່ມີຄ່າສູງ, ໂດດເດັ່ນທາງດ້ານວັດ ທະນະທໍາອັນລໍ້າຄ່າແລະເປັນປະຫວັດສາດເຊິ່ງຕິດພັນກັບແບບແຜນດໍາລົງຊີວິດຂອງປະຊາຊົນລາວບັນດາເຜົ່າມາແຕ່ດຶກດໍາບັນຢັ້ງຢືນເຖິງຄວາມເປັນມາຂອງຊາດລາວ, ຄົນລາວໃນແຕ່ລະຍຸກສະໄໝ ແລະຍັງເປັນສະຖານທີ່ທ່ອງທ່ຽວທາງດ້ານວັດທະນະທໍາທີສໍາຄັນ ແລະ ມີຊື່ສຽງອີກແຫ່ງໜຶ່ງຂອງແຂວງສະຫວັນນະເຂດກໍຄືຂອງຊາວ ເມືອງໄຊທອງ.    

 ໃນພິທີບັນດາການນໍາພັກ-ລັດ ແຂວງກໍ່ໄດ້ໃຫ້ກຽດຂຶ້ນລັ່ນຄ້ອງ 9 ບາດເພື່ອ ເປັນສັນຍາລັກແຫ່ງການກ່າວເປີດງານຂຶ້ນຢ່າງເປັນທາງການ. ຈາກນັ້ນການນໍາພັກ-ລັດກໍໄດ້ເຂົ້າຮ່ວມການແຮ່ຜາສາດເຜິ້ງໃຫຍ່ ແລະຂະບວນແຫ່ຜາສາດເຜິ້ງຂອງກຸ່ມບ້ານພາຍໃນເມືອງໄຊພູທອງ ແລະເພື່ອເປັນການສາກາລະບູຊາເປັນການສຶບສານວັດທະນະທໍາລາວທີ່ເຄີຍປະຕິບັດກັນມາຖືວ່າເປັນປີທໍາອິດທີ່ໄດ້ຈັດໃຫ້ມີກິດຈະກໍານີ້ຂຶ້ນມາເພື່ອເປັນການບູຊາແດ່ອົງພະທາດໂຜ່ນ. ພ້ອມນັ້ນກໍໄດ້ຊົມການສະແດງກີລາປະເພນີເປັນຕົ້ນແມ່ນກີລາຄື: ຍ່າງໄມ້ໂຖກແຖກ, ແລ່ນກະສອບພ້ອມນີ້ກໍຍັງໄດ້ຊົມການສະແດງສິລະປະວັນນະຄະດີມີ 9 ຂະບວນຟ້ອນຂອງກຸ່ມບ້ານພາຍໃນເມືອງ ແລະ ປະ ກວດຮ້ອງເພງຂອງນ້ອງນັກຮຽນ.

___________________

ຂຽນໂດຍ: ພັນທະມິດ ວົງສຸທິ       
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์