ເຈົ້າແຂວງຄຳມ່ວນມອບເຂົ້າຊ່ວຍເຫຼືອໃຫ້ເມືອງບົວລະພາ

  ໃນຕອນເຊົ້າຂອງວັນທີ 3 ກຸມພາ 2020 ທີ່ຜ່ານມາທີ່ຫ້ອງວ່າການເມືອງບົວລະພາໄດ້ມີພິທີມອບ-ຮັບເຂົ້າສານ (ຈ້າວ) ຈຳນວນທັງໝົດ 166 ກະສອບເທົ່າກັບ 3.320 ກິໂລ ລວມມູນຄ່າທັງໝົດ 20 ລ້ານກ່ວາກີບ ໃຫ້ກັບເມືອງບົວລະພາຊຶ່ງຕ່າງໜ້າມອບ-ຮັບເຂົ້າຊ່ວຍເຫຼືອໃນຄັ້ງນີ້ໂດຍແມ່ນທ່ານ ໂອໄດ ສຸດາພອນ ເຈົ້າແຂວງແຂວງຄຳມ່ວນ ພ້ອມດ້ວຍທ່ານ ແກ້ວ ຈັນທະວົງ ພະນັກງານບຳນານເປັນຜູ້ມອບໂດຍມີທ່ານ ບຸນກ້ວາງ ແກ້ວບຸນຍົງ  ເຈົ້າເມືອງເມືອງບົວລະພາຕາງໜ້າໃຫ້ກັບການນຳພາຍໃນເມືອງເປັນຜູ້ຮັບໂດຍມີບັນດາຄະນະນຳພາຍໃນເມືອງເຂົ້າຮ່ວມເປັນສັກຂີພິຍານຢ່າງພ້ອມພຽງ.

  ຈຸດປະສົງໃນການມອບເຂົ້າຊ່ວຍເຫຼືອໃນຄັ້ງນີ້ກໍ່ເພື່ອນຳໄປຊ່ວຍເຫຼືອໃຫ້ກັບພໍ່ແມ່ປະຊາຊົນພາຍໃນເມືອງບົວລະພາທີ່ຖືກຜົນກະທົບຈາກໄພພິບັດນໍ້າຖ້ວມຄັ້ງທີ່ຜ່ານມາ ເຊິ່ງໃນຄັ້ງນີ້ ທ່ານ ແກ້ວ ຈັນທະວົງ ພະນັກງານບຳນານຍັງໄດ້ມອບເງິນອີກຈຳນວນ 100 ໂດລາ ເພື່ອນຳໄປຊື້ປູນຊີເມັນໄປມອບໃຫ້ກັບບ້ານແກ້ງຫຍ້າລວນເພື່ອສ້າງເສັ້ນທາງເຂົ້າບ້ານອີກດ້ວຍໃນຕອນທ້າຍຂອງພິທີທ່ານ ບຸນກວ້າງ ແກ້ວບຸນຍົງ ເຈົ້າເມືອງເມືອງບົວລະພາຍັງໄດ້ສະແດງຄວາມຂອບໃຈທີ່ການນຳຂັ້ນແຂວງ ແລະພະນັກ ງານອາວຸໂສບຳນານທີ່ເຫັນໄດ້ເຖີງຄວາມຫຍຸ່ງຍາກຂອງພໍ່ແມ່ປະຊາຊົນພາຍໃນເມືອງບົວລະພາ ແລະ ທ່ານຈະນໍາເອົາເຂົ້າຊ່ວຍເຫຼືອດັ່ງກ່າວໄປມອບໃຫ້ກັບພໍ່ແມ່ປະຊາ ຊົນພາຍໃນເມືອງບົວລະພາທີ່ຂາດເຂີນຕົວຈິງ.

______________

ຂຽນໂດຍ: ບຸນປະພາດ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์