ທ່ຽວຊົມສວນພຶກສາດິນແດນເນລະມິດ

 ສວນພຶກສາເປັນສະຖານທີ່ທ່ອງທ່ຽວທີ່ໂດດເດັ່ນອີກແຫ່ງໜຶ່ງ, ໂດຍໄດ້ຮັບການພັດທະນາ ແລະຕໍ່ເຕີມເສີມສ້າງຂຶ້ນບົນພື້ນຖານການອະນຸລັກກໍຄືການປົກປັກຮັກສາທໍາ ມະຊາດ ແລະ ສິ່ງແວດລ້ອມໃຫ້ຍືນຍົງຄົງຕົວຕະຫຼອດໄປ, ສະຖານທີ່ທ່ອງທ່ຽວແຫ່ງນີ້ຕັ້ງຢູ່ເຂດບ້ານໃໝ່ດ່ານຊີ ເມືອງນາຊາຍທອງ ນະຄອນຫຼວງວຽງຈັນ ຕາມເສັ້ນ ທາງໃຫຍ່ສາຍເໜືອໄປປະມານ 10 ກວ່າກິໂລແມັດ ແລ້ວລ້ຽວຊ້າຍມືເຂົ້າໄປປະມານ 1 ກິໂລແມັດກໍຈະຮອດ ແລະມີສະຖານທີ່ບໍລິການຝາກລົດຈັກ-ລົດໃຫຍ່ຢ່າງກວ້າງ ຂວາງ ແລະສະຫວາດສະເຫວີຍຢູ່ດ້ານໜ້າປະຕູທາງເຂົ້າສວນ.

  ສວນພຶກສາໄດ້ຖືກຕົບແຕ່ງປະຕິມະກໍາຂຶ້ນໂດຍນາຍຊ່າງສີມືດີ ແລະມີຫົວຄິດປະດິດສ້າງຈາກເນື້ອທີ່ດິນທີ່ຂາດຕົ້ນໄມ້ໃບຫຍ້າໃຫ້ກາຍມາເປັນສະຖານທີ່ທ່ອງທ່ຽວທາງດ້ານທໍາມະຊາດທີ່ແສນສວຍສົດງົດງາມເຕັມໄປດ້ວຍຕົ້ນໄມ້ໃບຫຍ້າທີ່ຖືກນໍາມາປູກເສີມໃສ່ໃຫ້ຂຽວງາມອຸ່ມທຸ່ມເຮັດໃຫ້ອາກາດເຂດນີ້ມີຄວາມປອດໂປ່ງສົດໃສດີເໝາະແກ່ການມາພັກຜ່ອນຢ່ອນໃຈໃນວັນພັກ ແລະຫຼັງເລີກງານຈຶ່ງເຮັດໃຫ້ທ່ານ ພູວົງ ເຈົ້າຂອງສະຖານທີ່ແຫ່ງນີ້ຂະໜານນາມວ່າ: ສວນພຶກສາ.

ເມື່ອທ່ານເດີນເຂົ້າໄປໃນອຸດທິຍານແຫ່ງນີ້ທ່ານກໍຈະໄດ້ເຫັນຢ່າງມະຫັດສະຈັນທີ່ສຸດ,ຊຶ່ງມສະຖານທີ່ກວ້າງຂວາງສຸດຊົ່ວສາຍຕາໂດຍມີສະຖານທີ່ພັກຜ່ອນຢ່ອນໃຈ ແລະສິ່ງເອື້ອອໍານວຍຫຼາຍຢ່າງໄດ້ ຖືກຕົບແຕ່ງແປງສ້າງຂຶ້ນມາເພື່ອ ຮອງຮັບໃຫ້ແກ່ນັກທ່ອງທ່ຽວທີ່ມາ ທ່ຽວຊົມເຊັ່ນ: ປຸກຕູບນ້ອຍອ້ອມໜອງປາ, ມີອາຫານຕາມສັ່ງ ແລະ ເຄື່ອງດື່ມໄວ້ຄອຍບໍລິການລູກຄ້າ ແລະ ນັກທ່ອງທ່ຽວໄດ້ດື່ມ ແລະ ໄດ້ກິນແຊບໆໃຫ້ອິ່ມໜໍາສໍາລານໄປພ້ອມໆກັບບັນຍາກາດສຽງເພງກ່ອມບັນເລງ ແລະ ກິດຈະກໍາຕຶກ ເບັດເອົາປາທໍາມະຊາດຈາກໜອງອີກດ້ວຍ.

  ນອກນັ້ນຍັງມີສະຖານທີ່ພັກຜ່ອນຢ່ອນໃຈ ແລະບ່ອນທ່ຽວຊົມອີກຫຼາຍບ່ອນໃຫ້ທ່ານໄດ້ທ່ຽວຊົມ, ໄດ້ຖ່າຍຮູບເກັບພາບໄວ້ເປັນທີ່ລະນຶກຊຶ່ງໄດ້ຕົບແຕ່ງ ແລະປະດິດຄິດສ້າງຂຶ້ນດ້ວຍເຄື່ອງຕົບແຕ່ງປະຕິມະກໍາ ແລະ ເຄື່ອງປັ້ນຕ່າງໆ ທີ່ຖືກຢັງຢາຍກັນໄປເປັນຈຸດໆສະຖານທີ່ຖືກຕົບແຕ່ງແຕ່ລະຈຸດນັ້ນກໍລ້ວນແລ້ວແຕ່ມີຄວາມສວຍສົດງົດ ງາມ ແລະໂດດເດັ່ນເປັນພິເສດ, ບາງບ່ອນກໍໄດ້ຕົບແຕ່ງໃຫ້ເປັນພາບປະກອບດ້ານຄວາມຮັກຄູ່ບ່າວ-ສາວດ້ວຍປະໂຫຍກຄໍາເວົ້າສັ້ນໆທີ່ຈາລຶກໄວ້ຢ່າງມີຄວາມໝາຍ ແລະຄວາມສໍາຄັນເພື່ອສ້າງແຮງບັນດານໃຈໃຫ້ຜູ້ທີ່ມາທ່ຽວຊົມມີຄວາມສົນໃຈ ແລະປະທັບໃຈໃນການທ່ຽວຊົມອຸດທິຍານແຫ່ງນີ້ຢ່າງອີ່ມຕາອີ່ມໃຈໄປກັບການຖ່າຍຮູບເກັບພາບທີ່ໜ້າຮັກໄວ້ທັງໄດ້ຍ່າງອອກກໍາລັງກາຍໄປພ້ອມໆ ກັນເພື່ອສຸຂະພາບຂອງທ່ານ.

 ຈາກມົນສະເໜ່ ແລະບັນຍາກາດທີ່ດີໆເຫຼົ່ານີ້ເຮັດໃຫ້ຜູ້ທີ່ມາທ່ຽວຊົມມີຄວາມເພີດເພີນຈະເລີນໃຈໄປກັບສະຖານທີ່ທ່ອງທ່ຽວແດນເນລະມິດແຫ່ງນີ້ຈົນລືມອິດລືມເມື່ອຍຈຶ່ງເຮັດໃຫ້ເປັນທີ່ນິຍົມຂອງນັກທ່ອງທ່ຽວທັງພາຍໃນ ແລະຕ່າງປະເທດໄດ້ເຂົ້າມາທ່ຽວຊົມເປັນຈໍານວນຫຼວງຫຼາຍ.

___________________

ຂຽນໂດຍ: ຊາຍພະເນຈອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 05/02/2020