ຊື້-ຂາຍເຈ້ຍເສດຄືທຸລະກິດເງິນລ້ານສັງຫານຄວາມທຸກ

  ການເຮັດທຸລະກິດຊື້-ຂາຍເຈ້ຍກໍແມ່ນອີກອາຊີບໜຶ່ງທີ່ໜ້າສົນໃຈ ແລະບໍ່ຄວນເບິ່ງຂ້າມຖ້າຮູ້ຈັກວິທີນໍາໃຊ້ເຈ້ຍເສດ ຫຼືເຈ້ຍທີ່ເຮົາບໍ່ໄດ້ນໍາໃຊ້ແລ້ວນັ້ນເອົາມາເຮັດໃຫ້ມັນເປັນປະໂຫຍດຄືນໃໝ່ດ້ວຍການເກັບຊື້ເຈ້ຍເສດຈາກແຫ່ງຕ່າງໆມາຊອຍໃຫ້ເປັນຊິ້ນສ່ວນແລ້ວອັດແໜ້ນເປັນກ້ອນສົ່ງຂາຍໃຫ້ໂຮງງານຜະລິດເຈ້ຍຄືນໃໝ່, ແຕ່ວ່າທຸ ລະກິດແບບນີ້ຂ້ອນຂ້າງບໍ່ຢາກມີຄົນນິຍົມເຮັດພໍເທົ່າໃດ, ຍ້ອນຂາດການສຶກສາກ່ຽວກັບທ່າແຮງດ້ານລາຍຮັບກໍຄືຜົນກໍາໄລທີ່ໄດ້ມາຈາກການຊື້-ຂາຍເຈ້ຍ ຊຶ່ງໃນຈໍານວນ 9 ຕົວເມືອງທີ່ຂຶ້ນກັບນະຄອນຫຼວງວຽງຈັນ ຖ້າຄິດສະເລ່ຍແລ້ວແຕ່ລະເມືອງຈະມີຜູ້ປະກອບການເຮັດອາຊີບດ້ານນີ້ສູງສຸດບໍ່ເກີນສອງຫາສາມຄອບຄົວ.

   ທ່ານນາງ ສົມພອນ ສຸນາເຄນ ຜູ້ປະກອບການທຸລະກິດຮັບຊື້-ຂາຍເຈ້ຍ ຢູ່ບ້ານຫົວຂົວ, ເມືອງໄຊເສດຖາ ໄດ້ໃຫ້ຮູ້ວ່າ, ເມື່ອກ່ອນເປັນຄູອານຸບານຢູ່ໂຮງຮຽນເອກະຊົນ ແຫ່ງໜຶ່ງ, ແຕ່ຍ້ອນສະພາບຄອບຄົວມີຄວາມຫຍຸ້ງຍາກ, ຢາກມີເວລາໃຫ້ກັບຕົນເອງ ແລະ ຄອບຄົວທັງຢາກມີອາຊີບອິດສະຫຼະແບບເປັນຂອງຕົນເອງຫຼາຍກວ່າຈຶ່ງຕັດ ສິນໃຈລາອອກຈາກເປັນຄູ ແລ້ວມາເຮັດອາຊີບຊື້-ຂາຍເຈ້ຍ, ຊຶ່ງໃນເບື້ອງຕົ້ນກໍໄດ້ສຶກສາເບິ່ງ ໃນການເຮັດ ແລະເຫັນວ່າພໍເປັນໄປໄດ້ຈຶ່ງໄດ້ລົງມືເຮັດ, ໂດຍໄດ້ລົງທຶນຕາມຄວາມສາມາດຈາກໜ້ອຍຫາຫຼາຍ, ອາຊີບຮັບຊື້-ຂາຍເຈ້ຍ ແມ່ນເຮັດມາໄດ້ປະມານ 20 ກວ່າປີແລ້ວ, ໃນໄລຍະທີ່ເລີ່ມເຮັດໃໝ່ໆ ທຶນຮອນກໍບໍ່ມີຫຼາຍນໍາໃຊ້ລົດຖີບແກ່ລໍ້

ເລາະຊອກຊື້ເຈ້ຍຢູ່ແຕ່ລະບ້ານໄປຂາຍສົ່ງໃຫ້ໂຮງງານຜະ ລິດເຈ້ຍດ້ວຍຄວາມມານະອົດທົນ ແລະສູ້ຊົນໝົ້ນທຸກມາເປັນເວລາ 5 ປີປາຍ ຈຶ່ງທ້ອນເງິນໄດ້ຈໍານວນໜຶ່ງໄປຊື້ລົດຈັກໄດ້ໜຶ່ງຄັນມາແກ່ລໍ້, ຊຶ່ງມັນໄດ້ສ້າງຄວາມສະດວກສະບາຍໃຫ້ຢູ່ໃນຂັ້ນຕອນທໍາອິດຂອງຊີວິດທີ່ກໍາລັງຕໍ່ສູ້ ແລະດີ້ນຮົນເພື່ອຫາລ້ຽງຄອບຄົວ,ກິດຈະການຊື້-ຂາຍເຈ້ຍດໍາເນີນມາຕື່ມອີກ3 ປີ ເຫັນວ່າໄປດ້ວຍດີ ມີລາຍໄດ້ ເພີ່ມຂຶ້ນ ແລະ ສາມາດຊື້ລົດຮຸ່ນ ໄດໄວ້ບັນທຸກເຈ້ຍໄດ້ໜຶ່ງຄັນ, ຊື້ຈັກຊອຍເຈ້ຍໜຶ່ງເຄື່ອງ ແລະ ຈັກອັດແໜ້ນເຈ້ຍໄດ້ໜຶ່ງເຄື່ອງ ແລະກິດຈະການດັ່ງກ່າວດໍາເນີນໄປໄດ້ໄລຍະໜຶ່ງເຫັນວ່າໄປໄດ້ດີມີລາຍຮັບເຂົ້າມາຫຼາຍຂຶ້ນກວ່າເກົ່າອີກຈຶ່ງໄດ້ຊື້ເຄື່ອງຈັກອັດແໜ້ນຕື່ມອີກໜຶ່ງເຄື່ອງ.

 ທ່ານນາງ ສົມພອນ ສຸນາເຄນ ເຈົ້າຂອງກິດຈະການດັ່ງກ່າວຍັງໄດ້ໃຫ້ຮູ້ຕື່ມອີກວ່າ, ມາຮອດປະຈຸບັນນີ້ໄດ້ມີເຄື່ອງຈັກ ແລະພາຫະນະຮັບໃຊ້ເຂົ້າມາຊ່ວຍແລ້ວຈຶ່ງໄດ້ຫຼຸດຜ່ອນແຮງງານກໍາມະກອນລົງ, ໃນເມື່ອກ່ອນມີກໍາມະກອນທັງໝົດ 10ຄົນ,ດຽວນີ້ຍັງເຫຼືອພຽງ 7 ຄົນ ລົງທຶນຊື້ເຈ້ຍເຂົ້າມາມື້ລະ 4 ໂຕນ ເປັນເງິນທັງໝົດ 4 ລ້ານກວ່າກີບ,ແຕ່ລະມື້ຫຼັງຈາກຊື້ເຈ້ຍມາແລ້ວກໍໃຊ້ຈັກບົດ ແລະອັດແໜ້ນແລ້ວໄປສົ່ງໃຫ້ໂຮງງານຜະລິດເຈ້ຍຢູ່ດົງໂພນແຮ່ ເມືອງຫາດຊາຍຟອງ ໂດຍໄດ້ລົງທຶນຊື້ເຈ້ຍເຂົ້າມາມື້ລະປະມານ 4 ໂຕນ ເປັນເງິນທັງໝົດປະມານ 4 ລ້ານກວ່າກີບ, ນອກຈາກນັ້ນ, ຍັງໄດ້ຮັບເຈ້ຍອະນາໄມ ແລະປຶ້ມຂຽນຈາກໂຮງງານມາເປັນຕົວແທນຈໍາໜ່າຍໃນລາ ຄາໂຮງງານຕື່ມອີກຊຶ່ງທັງໝົດເຫຼົ່ານີ້ສາມາດສ້າງລາຍຮັບນໍາຜົນກໍາໄລມາເກັບໄວ້ແຕ່ລະເດືອນປະມານ 5-6 ລ້ານກີບ ແລະ ເງິນທີ່ເກັບສະສົມໄວ້ແຕ່ລະເດືອນສາມາດແບ່ງເປັນທຶນການ ສຶກສາໃຫ້ລູກສອງຄົນ ແລະຮັບໃຊ້ຊີວິດການເປັນຢູ່ຂອງຄອບຄົວໃຫ້ມີຢູ່ມີກິນບໍ່ໄດ້ຂາດແຄນ.

  ຍ້ອນມີອາຊີບຊື້ເຈ້ຍ-ຂາຍເຈ້ຍ ຈຶ່ງເຮັດໃຫ້ຊີວິດການເປັນຢູ່ພາຍໃນຄອບຄົວຂອງທ່ານນາງ ສົມພອນ ສຸນາເຄນ ນັບມື້ນັບດີຂຶ້ນ ແລະ ສາມາດຫຼຸດພົ້ນອອກຈາກຄວາມ ທຸກຍາກເທື່ອລະກ້າວສົມກັບຄໍາກ່າວຂານວ່າ: ອາຊີບຊື້-ຂາຍເຈ້ຍຂອງລາວຄືທຸລະກິດເງິນລ້ານສັງຫານຄວາມທຸກຢ່າງແທ້ຈິງທ່ານເອີຍ.

__________

ຂຽນໂດຍ: ຊາຍພະເນຈອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์