ທ່ານ ອາຄົມ ປຣະເສີດ ເຮັດວຽກຢູ່ ທພລ ຫຼວງນໍ້າທາ-ບໍ່ແກ້ວ

   ໃນລະຫວ່າງທ້າຍເດືອນມັງກອນ 2020 ທ່ານ ອາຄົມ ປຣະເສີດ ຄະນະພັກທະນາຄານແຫ່ງ ສປປ ລາວ, ຜູ້ອຳນວຍການໃຫຍ່ທະນາຄານພັດທະນາລາວ (ທພລ) ໄດ້ພົບປະໂອ້ລົມກັບຄະນະນຳ ແລະພະນັກງານ ທພລ ສາຂາຫຼວງນໍ້າທາ ແລະສາຂາຫ້ວຍຊາຍແຂວງບໍ່ແກ້ວເພື່ອຊີ້ນໍາ ແລະມີຄຳເຫັນໃຫ້ຈັດຕັ້ງປະຕິ ບັດແຜນທຸລະກໍາການເງິນໃຫ້ໄດ້ຮັບຜົນດີກວ່າເກົ່າແລະໄດ້ຕ້ອນຮັບຢ່າງອົບອຸ່ນຈາກທ່ານ ສົມຫວັງເພັງ ມະດວງຈັກ ຫົວໜ້າ ທພລ ສາຂາຫຼວງນໍ້າທາ ແລະທ່ານ ມີໄຊ ສີລິວັດຫົວໜ້າ ທພລ ສາຂາຫ້ວຍຊາຍພ້ອມຄະນະ ແລະພະນັກງານວິຊາການຂອງທັງ 2 ສາຂາ.

ໃນແຕ່ລະແຫ່ງ, ທ່ານຜູ້ອຳນວຍການໃຫຍ່ ທພລ ຍັງໄດ້ຮັບຟັງການລາຍງານບັນຫາພົ້ນເດັ່ນ-ຂໍ້ຄົງຄ້າງ, ວິທີແກ້ໄຂ ແລະແຜນການໃນຕໍ່ໜ້າຈາກຫົວໜ້າ ທພລ ສາຂາຫຼວງນໍ້າທາ ແລະຫົວໜ້າ ທພລ ສາຂາຫ້ວຍຊາຍຢ່າງລະອຽດຫຼາຍດ້ານສາມາດລະດົມເງິນຝາກ ແລະປ່ອຍສິນເຊື່ອບັນລຸຜົນດີສົມຄວນ, ສະເພາະ ທພລ ສາຂາຫຼວງນໍ້າທາສາມາດລະດົມເງິນຝາກໄດ້ທັງໝົດ 273 ຕື້ກີບ ທຽບໃສ່ແຜນການປີປະຕິບັດໄດ້ແລ້ວ 103,4% ຫຼື ລື່ນແຜນການ 3,4%, ສົມທຽບໃສ່ປີ 2018 ເພີ່ມຂຶ້ນ21 ຕື້ກີບ ເທົ່າກັບ 9,2%, ສາມາດສ້າງກໍາໄລໄດ້ທັງໝົດຈໍານວນ 7,6 ຕື້ກີບ, ສໍາລັບ ທພລ ສາຂາຫ້ວຍຊາຍກໍໄດ້ເຄື່ອນໄຫວປັບປຸງແກ້ໄຂບັນຫາຕ່າງໆຢ່າງມີຜົນສໍາເລັດເຊັ່ນດຽວກັນຊຶ່ງນອກຈາກການປະຕິບັດແຜນດໍາເນີນທຸລະກິດຕາມແຜນແລ້ວຍັງສຸມໃສ່ການບໍລິການຢູ່ດ່ານສາກົນຂົວມິດຕະພາບ 4 ແຂວງບໍ່ແກ້ວ-ແຂວງຊຽງລາຍ (ໄທ) ໄດ້ຢ່າງໜ້າເພິ່ງພໍໃຈເຮັດໃຫ້ຜູ້ທີ່ເດີນທາງເຂົ້າ-ອອກມີຄວາມສະດວກສະບາຍໃນການຈ່າຍຄ່າບໍລິການຕ່າງໆຜ່ານລະບົບທະ ນາຄານເປັນຕົ້ນການນໍາໃຊ້ລະບົບຈັດເກັບຄ່າທຳນຽມ ແລະຄ່າບໍລິການ (Easy Pass) ແລະລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ ແລະພາຫະນະຂົນ ສົ່ງສິນຄ້າດ້ວຍລະບົບອີເລັກໂຕຣນິກຜ່ານລະບົບ ທພລ.

  ທ່ານຜູ້ອຳນວຍການໃຫຍ່ ທພລ ໄດ້ຕີລາຄາສູງຕໍ່ບັນດາຜົນງານທີ່ ທພລ 2 ສາຂາຍາດມາໄດ້ໃນ 1 ປີ 2019 ຜ່ານມາ ແລະ ໃຫ້ສືບຕໍ່ເສີມຂະຫຍາຍດ້ານພົ້ນເດັ່ນ, ແກ້ໄຂບັນຫາຂໍ້ຄົງຄ້າງ ແລະປະກົດການຫຍໍ້ທໍ້ໃນຜ່ານມາໃຫ້ມີບາດກ້າວຫັນປ່ຽນໃໝ່ຢ່າງຕັ້ງໜ້າໂດຍສະເພາະຕ້ອງຍົກສູງການເມືອງແນວຄິດ,ແກ້ໃຫ້ໄດ້ຈຸດອ່ອນໃນການດໍາເນີນທຸລະກິດບາງດ້ານ, ຍົກສູງນໍ້າໃຈປະຢັດມັດທະຍັດ, ບໍລິການລູກຄ້າໃຫ້ເປັນທີ່ພໍໃຈ ແລະສ້າງໃຫ້ກາຍເປັນ 1 ໃນສາຂາທະນາຄານທີ່ ດຳ ເນີນທຸລະກຳການເງິນທີ່ດີ ແລະໃຫ້ສົມກັບເປັນທະນາຄານຂອງລັດເພື່ອຮັບໃຊ້ປະຊາຊົນຢ່າງເຕັມທີ່ໂດຍສະເພາະລູກຄ້າ ຫຼືຜູ້ປະກອບການ SME ຕາມແນວທາງຂອງພັກ ແລະລັດຖະບານໃນແຕ່ລະໄລຍະ.

__________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์