ເປີດນໍາໃຊ້ລະບົບເກັບຄ່າທຳນຽມ ແລະບໍລິການຜ່ານ ທພລ

  ໃນວັນທີ 31 ມັງກອນ 2020 ທີ່ດ່ານສາກົນຂົວມິດຕະພາບ 4 ເມືອງຫ້ວຍຊາຍ ແຂວງບໍ່ແກ້ວ ໄດ້ມີພິທີເປີດການນໍາໃຊ້ລະບົບຈັດເກັບຄ່າທຳນຽມ ແລະຄ່າບໍ ລິການ (EasyPass) ແລະ ລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ ແລະ ພາຫະນະຂົນສົ່ງສິນຄ້າດ້ວຍລະບົບອີເລັກໂຕຣນິກ ບ53 ຜ່ານລະບົບທະນາ ຄານພັດທະນາລາວ (ທພລ) ຢູ່ດ່ານສາກົນຂົວມິດຕະພາບ 4 ຊຶ່ງ ເປັນດ່ານທີ 3 ຖັດຈາກດ່ານສາກົນຂົວມິດຕະພາບ 1 ນະຄອນຫຼວງວຽງຈັນ ແລະດ່ານສາກົນບໍ່ເຕ່ນ ແຂວງຫຼວງນໍ້າ ທາໂດຍການໃຫ້ກຽດເຂົ້າຮ່ວມຂອງທ່ານ ຄຳກິ່ງ ເອື່ອຍມະນີຮັກ ຮອງເຈົ້າແຂວງບໍ່ແກ້ວ,ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະ ຊວງການເງິນ ແລະຍັງມີຜູ້ຕາງໜ້າຈາກພາກສ່ວນກ່ຽວຂ້ອງທັງສູນກາງ-ທ້ອງຖິ່ນເຂົ້າຮ່ວມ.

  ການນໍາໃຊ້ລະບົບຈັດເກັບຄ່າທຳນຽມ, ຄ່າບໍລິການ ແລະລະບົບຄຸ້ມຄອງພາຫະນະດັ່ງກ່າວກໍ່ເປັນການຫັນທັນສະໄໝເຂົ້າໃນວຽກງານຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ໂດຍສະເພາະການນໍາໃຊ້ເຄື່ອງມືເຂົ້າໃນການຄຸ້ມຄອງການບໍລິການການເງິນພາກລັດຢູ່ສູນກາງກໍ່ຄືທ້ອງຖິ່ນຊຶ່ງເປັນວຽກທີ່ສໍາຄັນຫຼາຍໃຫ້ລັດຖະບານເພື່ອຍົກລະດັບການບໍລິການພາກລັດ ແລະອໍານວຍຄວາມສະດວກໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວ ແລະປະຊາຊົນໃນການຊໍາລະຄ່າທຳນຽມ-ຄ່າບໍລິການຜ່ານຊ່ອງທາງເຄື່ອງມືທີ່ທັນສະໄໝໂດຍຜ່ານລະບົບທະນາຄານ.

  ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນໃຫ້ຮູ້ວ່າ: ການພັດທະນາຂໍ້ມູນຂ່າວສານການເງິນຮ່ວມກັບບັນດາກົມອ້ອມຂ້າງກະຊວງການເງິນ ແລະຂະແໜງການທີ່ກ່ຽວຂ້ອງເລີ່ມແຕ່ປີ 2018 ເປັນຕົ້ນມາ ແລະໄດ້ພັດທະນາລະບົບຄຸ້ມຄອງຂໍ້ມູນຂ່າວສານລາຍຮັບສ່ວຍສາອາກອນ (TAXRIS)ແລະເຊື່ອມຕໍ່ກັບບັນດາທະນາຄານທຸລະກິດທີ່ອໍານວຍຄວາມສະດວກແກ່ການຊໍາລະພາສີ-ອາກອນຜ່ານທະນາຄານ (Easy Tax ແລະSmart Tax) ແລະ ປະຈຸ ບັນການເຊື່ອມຕໍ່ລະບົບດັ່ງກ່າວໄດ້ຍົກລະດັບຂຶ້ນເທື່ອລະກ້າວເພື່ອຮັບຮອງການເຊື່ອມຕໍ່ຫາ 5 ທະນາຄານທຸລະກິດ ແລະເພີ່ມຊ່ອງທາງການຊໍາລະສໍາລັບຄ່າທຳ ນຽມທາງ-ອາກອນທີ່ດິນ ແລະ ແຜນປີ 2020 ຈະໄດ້ເຊື່ອມຕໍ່ຫາລະບົບຊໍາລະສະສາງທຸລະກໍາຍ່ອຍ(ACH) ຂອງທະນາຄານແຫ່ງ ສປປ ລາວ ເພື່ອລວມສູນການເຊື່ອມຕໍ່ຊໍາລະສະສາງທະນາຄານທຸລະກິດທັງໝົດໃນຂອບເຂດທົ່ວປະເທດ.

 ພ້ອມນັ້ນ; ຍັງຜັນຂະຫຍາຍການຄຸ້ມຄອງການເກັບລາຍຮັບພາສີ-ອາກອນ ແລະຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ແບບທັນສະໄໝໂດຍຮ່ວມ ມືກັບ ທພລ ພັດທະນາລະບົບ Ea syPass ແລະບໍລິສັດຄໍາປະເສີດຄອມພິວເຕີຈໍາກັດຜູ້ດຽວພັດທະນາລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ ແລະ ພາ ຫະນະຂົນສົ່ງສິນຄ້າດ້ວຍລະບົບອີເລັກໂຕຣນິກ ບ53 ຊຶ່ງເປັນຈຸດເລີ່ມຕົ້ນໃນການນໍາໃຊ້ເຄື່ອງມືທີ່ທັນສະໄໝເຂົ້າໃນການລວມສູນການເກັບຄ່າທຳນຽມ, ຄ່າບໍລິ ການທາງດ້ານວິຊາການ ແລະກອງທຶນຂອງລັດໃນຂອບເຂດທົ່ວປະເທດ ແລະທັງອຳນວຍຄວາມສະດວກໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວເດີນທາງເຂົ້າ-ອອກ ສປປ ລາວ ໃນການຊໍາລະຜ່ານຊ່ອງທາງເຄື່ອງມືທີ່ທັນສະໄໝຜ່ານລະບົບທະນາຄານໂດຍໃຫ້ບໍລິການຈັດເກັບຄ່າທຳນຽມ, ຄ່າບໍລິການທີ່ກ່ຽວຂ້ອງກັບຂະແໜງການເງິນກ່ອນໃນນີ້ມີຄ່າທໍານຽມວິຊາກັບດ່ານ, ຄ່າທຳນຽມ-ບໍລິການຄົນເຂົ້າ-ອອກເມືອງ ແລະພາຫະນະ (ບ 53) ແລະສືບຕໍ່ຂະຫຍາຍບໍລິການການເກັບຄ່າທໍານຽມ-ຄ່າບໍລິການທີ່ຕິດພັນກັບຂະແໜງການທີ່ກ່ຽວຂ້ອງ.​

  ໃນຂະນະດຽວກັນ, ທ່ານ ອາຄົມ ປຣະເສີດ, ຜູ້ອຳນວຍການໃຫຍ່ ທພລ ກ່າວວ່າ: ທພລ ໄດ້ມີການການຄົ້ນຄວ້າ ແລະພັດທະນາລະບົບຕາມກະຊວງການເງິນ ໂດຍມຸ່ງເປົ້າໝາຍພັດທະນາໃຫ້ສາ ມາດລວມສູນຄ່າທຳນຽມ ແລະຄ່າບໍລິການຢູ່ດ່ານສາກົນທີ່ສາມາດຕິດຕາມ ລາຍຮັບງົບປະມານໄດ້ທຸກຊົ່ວໂມງຜ່ານຄອມພີວເຕີ ແລະໂທລະສັບມືຖື, ຜ່ານການທົດລອງເກືອບໜຶ່ງປີຜ່ານມາໄດ້ມີຫຼາຍອັນພົ້ນເດັ່ນໃນການເກັບລາຍຮັບ ເຂົ້າງົບປະມານສູນກາງ ຊຶ່ງມີລັກສະນະເພີ່ມຂຶ້ນໃນແຕ່ລະເດືອນ ແລະຈຸດເດັ່ນທີ່ສຳຄັນໃນການພັດທະນາລະບົບ Easy Pass ສປປ ລາວ ເປັນປະເທດທຳອິດຂອງໂລກທີ່ສາມາດຊຳລະຄ່າທຳນຽມວິຊາກັບດ່ານແບບບໍ່ໃຊ້ເງິນສົດດ້ວຍລະບົບແອັບ AliPay ຊຶ່ງເປັນ Application ຍອດນິຍົມທີ່ສຸດຂອງປະຊາຊົນຈີນ ແລະເພື່ອສະໜອງແຜນຍຸດທະຍາດຫັນເປັນທັນສະໄໝໃນການເກັບຄ່າທຳນຽມ ແລະ ຄ່າບໍລິການຢູ່ດ່ານສາກົນ Easy Pass, ທພລ ມີແຜນພັດທະນາລະບົບໃນໄລຍະທີ່ 2 ໂດຍຈະສູ້ຊົນໃຫ້ສຳເລັດພາຍໃນເດືອນເມສາປີ 2020 ເພື່ອອຳນວຍຄວາມສະດວກໃຫ້ແກ່ເດີນທາງດ້ວຍການນຳໃຊ້ຕູ້ KIOSK ຮອງຮັບການຮັບຊຳລະຄ່າທຳນຽມ ແລະຄ່າບໍລິການໃຫ້ຫຼາຍຊ່ອງທາງເພື່ອຫຼຸດຜ່ອນການນຳໃຊ້ເງິນສົດໂດຍການຊຳລະຜ່ານ LDB Trust, LDB Wallet ແລະການຮັບຊຳລະດ້ວຍບັດສາກົນມີບັດ VISA, MASTER ແລະ ອື່ນໆຕາມແຜນໃຫ້ມີຜົນສຳເລັດຕາມນະໂຍບາຍຂອງພັກ ແລະລັດຖະບານ.

__________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์