ສສຂ ຫຼວງນໍ້າທາ ຮັບຮອງເອົາການແຕ່ງຕັ້ງຫຼາຍຕໍາແໜ່ງ

  ວັນທີ 29-31 ມັງກອນ 2020 ທີ່ສະໂມສອນແຂວງຫຼວງນໍ້າທາໄດ້ປິດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາຊຸດທີ I, ໂດຍການເປັນປະທານຂອງທ່ານ ໄຊພອນ ຄູນສີລິເຮືອງ ຮອງເລຂາພັກແຂວງສະມາຊິກສະພາແຫ່ງຊາດປະທານສະພາປະຊາຊົນແຂວງຫຼວງນໍ້າທາ, ເຂົ້າຮ່ວມ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ,ທ່ານ ເພັດຖາວອນ ພິລະວັນ ເຈົ້າແຂວງໆຫຼວງນໍ້າທາ, ມີສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະປະຈຳພັກແຂວງ ແລະອາດີດການນຳພະນັກງານອາວຸໂສບໍານານຜູ້ສົງຄຸນວຸດທິພ້ອມດ້ວຍແຂກຖືກເຊີນເຂົ້າຮ່ວມ.

  ທ່ານ ໄຊພອນ ຄູນສີລິເຮືອງ ກ່າວປິດກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີ I ວ່າກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາຊຸດທີ I ໄດ້ຄົ້ນຄວ້າພິຈາລະນາຮັບຮອງເອົາບຸກຄະລາກອນຂອງແຂວງຄື: ຮັບຮອງທ່ານ ທອງແດງ ສິດ ທິສົນ ເປັນປະທານສານປະຊາຊົນແຂວງ, ທ່ານ ທອງວັນ ເລື່ອງພະຫານ ເປັນປະທານສານປະຊາຊົນເຂດ 2 ເມືອງສິງ, ທ່ານ ຂັດ ໜັ້ນທະໄລ ເປັນຮອງປະທານຄະນະກຳ ມະການວັດທະນະທຳ-ສັງຄົມ ແລະບັນດາເຜົ່າ, ທ່ານນາງ ມະນີພອນ ນາບູນແພງ ເປັນຫົວໜ້າພະແນກຍຸຕິທຳ ແລະທ່ານ ພີມແກ້ວ ທຳລະສິນ ເປັນຫົວໜ້າພະແນກກະສິກຳ ແລະປ່າໄມ້ແຂວງ.

   ກອງປະຊຸມຍັງຮັບຮອງເອົາບົດລາຍງານຂອງແຂວງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳປີ 2019 ແລະ ວາງທິດທາງແຜນການປີ 2020, ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ຮັບຮອງເອົາບົດລາຍງານຂອງແຂວງຫຼວງນໍ້າທາກ່ຽວກັບການຈັດຕັ້ງແຜນງົບປະມານປະຈຳປີ 2019 ແລະທິດທາງແຜນການປະຈຳປີ 2020, ຮັບຮອງເອົາການຈັດຕັ້ງການ ເຄື່ອນໄຫວວຽກງານກວດສອບປະຈຳປີ 2019

ແລະທິດທາງແຜນການເຄື່ອນໄຫວວຽກງານກວດສອບປະຈຳປີ 2020ບົດລາຍງານຜົນການກວດສອບສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງປະຈຳປີ 2018 ແລະ ບົດລາຍງານຂອງອົງການກວດກາລັດແຂວງກ່ຽວກັບຜົນການກວດກາຕາມຜົນຂອງການກວດສອບ, ຮັບຮອງເອົາບົດລາຍງານກ່ຽວ ກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະທິດທາງແຜນການເຄື່ອນໄຫວວຽກງານປະຈຳປີ 2020 ຂອງຫົວໜ້າອົງການໄອຍະການປະຊາຊົນແຂວງ ແລະ ປະທານສານປະຊາຊົນແຂວງ, ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະທິດທາງແຜນການເຄື່ອນໄຫວປະຈຳປີ 2020 ຂອງສະພາປະຊາຊົນແຂວງ ແລະຮັບຮອງເອົາຜົນການປະເມີນບຸກຄະລາກອນດຳລົງຕຳແໜ່ງທີ່ສະ ພາປະຊາຊົນເລືອກຕັ້ງ ແລະຮັບຮອງເອົາການແຕ່ງຕັ້ງ.    

______________

ຂຽນໂດຍ: ມຸນຕີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์