ສະຫວັນນະເຂດ ຈະສ້າງເມືອງນອງໃຫ້ມີເງື່ອນໄຂພົ້ນທຸກໃນປີນີ້

   ທ່ານ ໂພໄຊ ໄຊຍະສອນ ຮອງເຈົ້າແຂວງໆສະຫວັນນະເຂດກ່າວວ່າ: ອົງການປົກຄອງແຂວງໄດ້ສຸມກໍາລັງແຮງເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກເພື່ອເຮັດແນວໃດທີ່ສ້າງເມືອງນອງໃຫ້ມີເງື່ອນໄຂພົ້ນທຸກໃນປີ 2020 ດ້ວຍການຫັນພະນັກງານ, ຫັນວຽກ, ຫັນງົບປະມານເຂົ້າໃນການພັດທະ ນາຊົນນະບົດໂດຍສະເພາະແມ່ນພື້ນຖານໂຄງລ່າງໃນນີ້ໄດ້ກໍ່ສ້າງເສັ້ນທາງປູຢາງສອງຊັ້ນແຕ່ທາງເລກ 9 ຫາ ເມືອງນອງ ແລະ ທະລຸເສັ້ນທາງຮອດແຂວງສາລະວັນເຮັດໃຫ້ເມືອງນອງບໍ່ກາຍເປັນເມືອງປິດ,ປະຈຸບັນປະຊາຊົນສາມາດເດີນທາງໄປມາ ແລະຈໍລະຈອນສິນຄ້າໄດ້ສະດວກສະບາຍ,ໄປພ້ອມກັນນັ້ນອໍານາດການປົກ ຄອງຂັ້ນທ້ອງຖິ່ນຍັງໄດ້ສ້າງປະຖົມປັດໄຈດ້ານອື່ນໆໄປພ້ອມກັນເຊັ່ນ: ດ້ານການສຶກສາ, ສາທາລະນະສຸກ, ດ້ານຮີດຄອງປະເພນີ ແລະວັດທະນະທໍາໃນນີ້ໄດ້ຫັນເອົາພະນັກງານຫຼັກແຫຼ່ງຈໍານວນ 7 ທ່ານ ຈາກພະແນກການກົມກອງອ້ອມຂ້າງແຂວງລົງກໍ່ສ້າງຮາກຖານການເມືອງເພື່ອຊ່ວຍພັດທະນາດ້ານຕ່າງໆ ຢູ່ຮາກ ຖານໂດຍໄດ້ຂຶ້ນແຜນຕາມສາຍຕັ້ງຂອງຕົນເພື່ອສຸມໃສ່ໃຫ້ເມືອງນອງມີເງື່ອນໄຂພົ້ນທຸກໃນປີ 2020 ຢ່າງແນ່ນອນ.

  ຊຶ່ງໃນຜ່ານມາຈາກການດໍາເນີນເກັບກໍາຂໍ້ມູນ ແລະວາງແຜນທີ່ສ້າງເງື່ອນໄຂໃຫ້ກາຍເປັນເມືອງພົ້ນທຸກຕາມ 9 ມາດຕະຖານເມືອງພົ້ນທຸກທີ່ວາງໄວ້ໃນດໍາລັດ 384/ລບ ວ່າດ້ວຍມາດຕະຖານພົ້ນທຸກ ແລະມາດຕະຖານການພັດທະນາຊຶ່ງເມືອງພົ້ນທຸກປະກອບມີ 9 ມາດຖານຄື: ມີໂຮງຮຽນມັດທະຍົມສົມບູນ, ມີໂຮງໝໍ  ແລະການເຂົ້າເຖິງບໍລິການໂຮງໝໍ,ເທສະບານເມືອງໄດ້ນໍາໃຊ້ນໍ້າປະປາຊຸມຊົນ,ເທສະບານໄດ້ຈັດຕັ້ງປະຕິບັດແຜນຜັງ,ມີເສັ້ນທາງເຂົ້າເຖິງທຽວໄດ້ຕະຫຼອດປີ ແລະເຊື່ອມຈອດເຂົ້າທຸກບ້ານ, ມີລະບົບຄົມມະນາຄົມ, ການຂົນສົ່ງ,ຂໍ້ມູນຂ່າວສານ,ມີຕະຫຼາດຊື້-ຂາຍສິນຄ້າ,ຊັບພະຍາກອນທໍາມະຊາດແລະສິ່ງແວດລ້ອມໄດ້ຮັບການຄຸ້ມຄອງ, ປົກປັກຮັກສາ ແລະນໍາໃຊ້ມີປະສິກທິຜົນ,ມີບ້ານພົ້ນທຸກຫຼາຍກວ່າ 70% ຂອງຈໍານວນບ້ານໃນທົ່ວເມືອງ,ຈາກການເກັບກໍາທີ່ຜ່ານມາເຫັນວ່າ: ເມືອງນອງບັນລຸໄດ້ໂດຍພື້ນຖານແລ້ວ 7 ມາດຖານ ແລະຍັງຄ້າງ 2 ມາດຖານຄື: ຍັງຄ້າງມາດຖານທີ 5 ຍັງມີຫຼາຍບ້ານທີ່ມີຄວາມຫຍຸ້ງຍາກດ້ານຄົມມະນາຄົມເສັ້ນ ທາງໄປໄດ້ລະດູດຽວແລະຍັງຄ້າງມາດຖານທີ 9 ອັດຕາສ່ວນບ້ານພົ້ນທຸກຍັງຕໍ່າກວ່າ 70% ຂອງຈໍານວນບ້ານໃນທົ່ວເມືອງ.

  ທ່ານ ໂພໄຊ ໄຊຍະສອນ ກ່າວຕື່ມວ່າ: ເພື່ອຊອກທາງອອກຂອງເມືອງນອງເຫັນວ່າ: ຕ້ອງມີການພັດທະນາແບບຈຸດສຸມໂດຍໄດ້ກໍານົດຈຸດສຸມຕັງອາໄລເປັນຈຸດສຸມພັດທະນາໃນປີ 2020 ຈະສຸມໃສ່ລຶບລ້າງບ້ານທຸກຍາກໃຫ້ໄດ້ 15 ບ້ານໃນທົ່ວເມືອງນອງໃນນີ້ມີ 12 ບ້ານແມ່ນນອນໃນຂອບເຂດຈຸດສຸມຕັງອາໄລ ແລະຈະສ້າງບ້ານຕັງອາໄລເກົ່າໃຫ້ກາຍເປັນບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດ, ຊຶ່ງຈະຈັດສັນອາຊີບໃຫ້ປະຊາຊົນເພື່ອສ້າງລາຍຮັບໃຫ້ແກ່ຄອບຄົວ,ສົ່ງເສີມອາຊີບທີ່ປະຊາຊົນເຄີຍມີມູນເຊື້ອ, ສົ່ງເສີມເຕັກນິກການຜະລິດທີ່ງ່າຍດາຍ, ມີຕະຫຼາດຮອງຮັບ, ມີຜົນກໍາໄລ, ລົງທຶນບໍ່ສູງໄດ້ຮັບຜົນໄວແລະເໝາະກັບສະພາບທ້ອງຖິ່ນເປັນຕົ້ນແມ່ນ: ການຜະລິດມັນຕົ້ນເປັນສິນຄ້າປ້ອນໂຮງງານ, ສົ່ງເສີມການລ້ຽງງົວ ແລະ ລ້ຽງແບ້ທີ່ປະຊາຊົນມີແລ້ວໂດຍເນັ້ນການຍົກສະມັດຕະພາບຜົນຜະລິດ ເປັນຕົ້ນຕໍ, ສົ່ງເສີມການປູກກ້ວຍໃນບ່ອນທີ່ມີເງື່ອນໄຂເນັ້ນໃສ່ການຜູກຂາດກັບຕະຫຼາດໃຫ້ມີຄວາມຮັບປະກັນສົ່ງເສີມການລ້ຽງໝູ ແລະ ສັດປີກເພື່ອຂາຍ ແລະ ບໍລິໂພກໃນຄອບຄົວແລະໃຫ້ມີອາຫານພຽງພໍ,ຈັດສັນຕະຫຼາດຈໍາໜ່າຍຢາງໂບງທີ່ປະຊາຊົນມີແລ້ວໃຫ້ມີລາຍຮັບ,ສົ່ງເສີມການປູກໄມ້ໃຫຍ່ໄວເພື່ອໃຫ້ເນື້ອທີ່ເໝາະ ສົມ, ສົ່ງເສີມການປູກແຂມຕິດພັນກັບການສົ່ງເສີມເຮັດຟອຍຂາຍເພື່ອເພີ່ມມູນຄ່າຜົນຜະລິດ ແລະສົ່ງເສີມຫັດຖະກໍາຕໍ່າຫູກທີ່ເປັນເອກະລັກຂອງເຜົ່າ ແລະ ມາ ຮອດປະຈຸບັນກໍ່ສາມາດຕັ້ງກຸ່ມການຜະລິດໄດ້ 87 ກຸ່ມ, ຊຶ່ງຈະໃຊ້ງົບປະມານ 5.000 ລ້ານກວ່າກີບ, ຊຶ່ງເມືອງນອງປະກອບມີ 69 ບ້ານ 6.353 ຄອບຄົວ, ມີບ້ານພັດທະນາ 4 ບ້ານ, ບ້ານທຸກຍາກ 38 ບ້ານ ເທົ່າກັບ 55% ຂອງຈໍານວນບ້ານທັງໝົດ, ມີພົນລະເມືອງ 32.080 ຄົນ, ຍິງ 15.851 ຄົນ ມີ: ຊົນເຜົ່າບຣູ, ຜູ້ໄທ ແລະເຜົ່າລາວເປັນເມືອງພູດອຍ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์