ເຈົ້າແຂວງເຊກອງ ປະດັບຫຼຽນໄຊແຮງງານໃຫ້ທ່ານ ວິໄລວົງ ບຸດດາຄຳ

 ໂດຍໄດ້ຮັບການມອບໝາຍຈາກນາຍົກລັດຖະມົນຕີແຫ່ງ ສປປ ລາວ, ໃຫ້ແຂວງເຊກອງຕາງໜ້າພັກ-ລັດ ຈັດພິທີປະດັບຫຼຽນໄຊແຮງງານຊັ້ນ II ໃຫ້ແກ່ບຸກຄົນທີ່ມີຜົນງານໃນການປະກອບສ່ວນພັດທະນາເສດຖະກິດ-ສັງຄົມຂອງແຂວງເຊກອງ ໃນວັນທີ 31 ມັງກອນ 2020 ທີ່ ຫ້ອງປະຊຸມຊັ້ນ 3 ຫ້ອງວ່າການແຂວງ, ທ່ານ ຄໍາເຜີຍ ບຸດດາວຽງ, ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງຕາງໜ້າໃຫ້ລັດຖະບານລາວປະດັບຫຼຽນໄຊແຮງງານຊັ້ນ II ໃຫ້ແກ່ທ່ານ ວິໄລວົງ ບຸດດາຄໍາ ກຳມະການສູນກາງພັກ,ຄະນະປະຈໍາສະພາແຫ່ງຊາດເຂດເລືອກຕັ້ງທີ 16 ແຂວງເຊກອງທີ່ມີຜົນງານດີເດັ່ນປະກອບສ່ວນຂົນຂວາຍທຶນຮອນຢູ່ພາຍໃນ ແລະຕ່າງປະເທດເຂົ້າໃນການພັດທະນາເສດຖະກິດ-ສັງຄົມ ແຂວງເຊກອງ ໃນໄລຍະຜ່ານມາລວມມູນຄ່າ 2 ຕື້ກວ່າກີບ.

  ການປະດັບຫຼຽນໄຊແຮງງານໃຫ້ແກ່ບຸກຄົນດີເດັ່ນໃນຄັ້ງນີ້ແມ່ນໄດ້ຈັດຂຶ້ນໃນທ່າມກາງບັນຍາກາດຊົມເຊີຍກອງປະຊຸມສະໄໝສາມັນເທື່ອທີ 8 ສະພາປະຊາຊົນ ແຂວງເຊກອງຊຸດທີ I ຊຶ່ງມີຄວາມໝາຍ, ຄວາມສໍາຄັນຢ່າງຍິ່ງ, ທັງເປັນການປະກອບສ່ວນເຂົ້າໃນການເພີ່ມພູນຄູນສ້າງ, ການພັດທະນາເສດຖະກິດ-ສັງຄົມຂອງແຂວງເຊກອງຢ່າງຫຼວງຫຼາຍ.

 ______________

ຂຽນໂດຍ: ພຸດທະສອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์