ສາລະວັນອະໄພຍະໂທດ-ຫຼຸດຜ່ອນໂທດ ແລະປ່ອຍຕົວນັກໂທດ 42 ຄົນ

  ໃນວັນທີ 28 ມັງກອນ 2020 ທີ່ຄ້າຍຄຸມຂັງ-ດັດສ້າງນາໄຊ, ໄດ້ຈັດພິທີປະກາດອະໄພຍະໂທດຫຼຸດຜ່ອນໂທດ ແລະປ່ອຍຕົວນັກໂທດປະຈຳປີ 2019, ເຂົ້າຮ່ວມມີ ທ່ານ ບົວທອງ ຄຸນຍອດປັນຍາ ຮອງເຈົ້າແຂວງສາລະວັນ ທັງເປັນປະທານຄະນະກຳມະການອະໄພຍະໂທດ-ຫຼຸດຜ່ອນໂທດຂັ້ນແຂວງ, ມີ ພັທ ສົມພູ ສາຍຈັນທະເວດ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຜູ້ຊີ້ນຳວຽກງານຄຸມຂັງ-ດັດສ້າງ, ທ່ານ ຄຳພັນ ລາຕິກຸນ ຮອງຫົວໜ້າອົງການໄອຍະການປະຊາຊົນແຂວງ ພ້ອມດ້ວຍຄະນະກຳມະການອະໄພຍະໂທດຫຼຸດຜ່ອນໂທດຂັ້ນແຂວງ, ພໍ່ແມ່ຍາດພີ່ນ້ອງ ແລະນັກໂທດເຂົ້າຮ່ວມ.

  ໃນພິທີ, ໄດ້ມີການຜ່ານດຳລັດຂອງປະທານປະເທດວ່າດ້ວຍການອະໄພຍະໂທດ-ຜ່ອນໂທດ ແລະປ່ອຍຕົວນັກໂທດປະຈຳປີ 2019 ໃນທົ່ວປະເທດທັງໝົດມີ 2.146  ຄົນ, ຍິງ 347 ຄົນ, ຄົນຕ່າງປະເທດ 39 ຄົນ, ຍິງ 2 ຄົນ ໃນນັ້ນຫຼຸດຜ່ອນໂທດຈຳນວນ 1.824 ຄົນ, ຍິງ 291 ຄົນ, ຄົນຕ່າງປະເທດ 34 ຄົນ, ຍິງ 2 ຄົນ ແລະປ່ອຍຕົວນັກໂທດຈຳນວນ 322 ຄົນ, ຍິງ 56 ຄົນ, ຄົນຕ່າງປະເທດ 5 ຄົນ. ສໍາລັບຢູ່ແຂວງສາລະວັນໄດ້ອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວນັກໂທດ ປະຈຳປີ 2019 ມີທັງໝົດ42 ຄົນ, ຍິງ 11 ຄົນ, ໃນນັ້ນ ອະໄພຍະໂທດຫຼຸດຜ່ອນໂທດ 27 ຄົນ, ຍິງ 5 ຄົນ ແລະ ປ່ອຍຕົວນັກໂທດ 15 ຄົນ, ຍິງ 6 ຄົນ. ສ່ວນ ໃຫຍ່ແມ່ນການກະທຳຜິດກ່ຽວກັບຢາເສບຕິດ. ຊຶ່ງຜ່ານມາເຂົາເຈົ້າໄດ້ຕັ້ງໃຈດັດສ້າງຕົນເອງດ້ວຍຄວາມບຸກບືນຫ້າວຫັນ, ຮູ້ສຶກກິນແໜງແຂງໃຈຕໍ່ການກະທຳຜິດຂອງຕົນເອງໃນໄລຍະຜ່ານມາຈົນສາມາດເຮັດໃຫ້ຕົນເອງກາຍເປັນພົນລະເມືອງດີຂອງສັງຄົມ ແລະໄດ້ຮັບການອະໄພຍະໂທດຫຼຸດຜ່ອນໂທດ ແລະປ່ອຍຕົວໃນທີ່ສຸດ.

  ໃນໂອກາດດັ່ງກ່າວນີ້ ທ່ານ ບົວທອງ ຄຸນຍອດປັນຍາ ໄດ້ໂອ້ລົມ ແລະຊີ້ທິດເຍືອງທາງຕໍ່ນັກໂທດທີ່ໄດ້ຮັບການອະໄພຍະໂທດຫຼຸດຜ່ອນໂທດ ແລະປ່ອຍຕົວໃນຄັງນີ້ຈົ່ງສືບຕໍ່ໃນການປະຕິບັດລະບຽບຂອງຄ້າຍຄຸມຂັງເພື່ອໃຫ້ໄດ້ຮັບນະໂຍບາຍຕື່ມໃນປີຕໍ່ໄປ, ສ່ວນຜູ້ທີ່ໄດ້ຮັບນະໂຍບາຍອະໄພຍະໂທດປ່ອຍຕົວແມ່ນຕ້ອງສືບຕໍ່ປະຕິບັດພັນທະຂອງພົນລະເມືອງລາວໃນການດຳລົງຊີວິດໃຫ້ສອດຄ່ອງກັບລະບຽບກົດໝາຍ ແລະຮັບປະກັນບໍ່ໃຫ້ກັບຄືນໄປເຮັດຜິດລະບຽບກົດໝາຍບ້ານເມືອງຢ່າງເດັດຂາດ.

  ການປະຕິບັດນະໂຍບາຍອະໄພຍະໂທດຜ່ອນໂທດ ແລະປ່ອຍຕົວນັກໂທດເປັນບູລິມະສິດໜຶ່ງທີ່ພັກ ແລະລັດຖະບານແຫ່ງ ສປປ ລາວ ໄດ້ຈັດຕັ້ງປະຕິບັດໃນໄລຍະການສະເຫຼີມສະຫຼອງວັນຊາດທີ 2 ທັນວາ ຄົບຮອບ 44 ປີ.

  ນອກນັ້ນໃນພິທີກໍ່ໄດ້ມີການມອບໃບຢັ້ງຢືນການໃຫ້ອະໄພຍະໂທດຫຼຸດຜ່ອນໂທດ ແລະປ່ອຍຕົວນັກໂທດປະຈຳປີ 2019 ຕື່ມອີກ.

__________

ຂຽນໂດຍ: ທິດລານີ ໂຄດໂຍທາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์