ເມືອງບົວລະພາສຳເລັດກອງປະຊຸມໃຫຍ່ຄັ້ງທີ XI ຂອງອົງຄະນະພັກເມືອງ

 ກອງປະຊຸມໃຫຍ່ຄັ້ງທີ XI ຂອງອົງຄະນະພັກເມືອງບົວລະພາ ແຂວງຄໍາມ່ວນ ໄດ້ດໍາເນີນຂຶ້ນໃນລະຫວ່າງວັນທີ 30-31 ທັນວາ 2020 ໂດຍການເປັນປະທານຂອງສະຫາຍ ບຸນກວ້າງ ແກ້ວບຸນຍົງ ຮັກສາການເລຂາພັກເມືອງ, ເຈົ້າເມືອງໆບົວລະພາ,ເປັນກຽດເຂົ້າຮ່ວມມີສະຫາຍ ສົມໃຈ ເພັດສີນວນ ຮອງເລຂາພັກແຂວງ, ປະທານສະພາປະຊາຊົນແຂວງຄຳມ່ວນ,ມີບັນດາສະຫາຍໃນຄະນະຊີ້ນໍາກອງປະຊຸມໃຫຍ່ຂັ້ນແຂວງ,ຄະນະພັກເມືອງອ້ອມຂ້າງ,ພະນັກງານອາວຸໂສບຳນານຕະຫຼອດເຖິງຜູ້ແທນສົມບູນຈຳນວນ 140 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງເຂົ້າຮ່ວມ.

  ສະຫາຍ ບຸນກວ້າງ ແກ້ວບຸນຍົງ ຮັກສາການເລຂາພັກເມືອງ, ເຈົ້າເມືອງໆບົວລະພາໄດ້ກ່າວໄຂກອງປະຊຸມພ້ອມທັງຕີລາຄາຜົນສຳເລັດຂອງການຈັດຕັ້ງປະຕິບັດມະຕິ ກອງປະຊຸມໃຫຍ່ ຄັ້ງທີ X ຂອງອົງຄະນະພັກເມືອງໃນໄລຍະ 5 ປີຜ່ານມາ ຊຶ່ງເມືອງບົວລະພາ ແມ່ນມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມ ສະຫງົບໂດຍພື້ນຖານ, ເສດຖະກິດມີການຂະຫຍາຍຕົວໃນລະດັບທີ່ດີ, ລວມຍອດລາຍ ຮັບປະຕິບັດໄດ້ 230 ຕື້ກີບ, ສະເລ່ຍລາຍຮັບຕໍ່ຫົວຄົນ 6 ລ້ານກວ່າກີບ ຫຼືເທົ່າກັບ 846 ໂດລາສະຫະລັດ, ໄລຍະ 5 ປີຜ່ານມາມີແຫຼ່ງທຶນສະໜັບສະໜູນຈຳນວນ 2.157 ຕື້ກວ່າກີບ.ໃນນັ້ນການລົງທຶນຂອງລັດມີ 85 ໂຄງການລວມມູນຄ່າ 1.282 ຕື້ກີບ, ທຶນຊ່ວຍເຫຼືອເພື່ອການພັດທະນາ 40 ໂຄງການ ລວມມູນຄ່າ 381 ຕື້ກີບ, ທຶນພາຍໃນ ແລະຕ່າງປະເທດ 36 ໂຄງການລວມມູນຄ່າ 493 ຕື້ກີບ, ມີເນື້ອທີ່ປູກເຂົ້ານາແຊງ, ນາປີ ແລະເຂົ້າເນີນສູງ 6.276 ເຮັກຕາ, ລວມຜົນຜະລິດ 14 ພັນໂຕນ,ສະເລ່ຍ 461 ກິໂລເຂົ້າເປືອກຕໍ່ຄົນຕໍ່ປີ,ການປູກພືດເປັນສະ ບຽງອາຫານ ແລະ ເປັນສິນຄ້າປະຕິບັດໄດ້ 2.254 ໂຕນຕໍ່ປີ, ວຽກງານພັດທະນາຊົນນະບົດ ແລະລຶບລ້າງຄວາມທຸກຍາກໄດ້ສ້າງຕັ້ງກຸ່ມການຜະລິດ 7 ກຸ່ມ, ໃນນັ້ນກຸ່ມປູກຝັງ 2 ກຸ່ມ ແລະກຸ່ມລ້ຽງສັດ 5 ກຸ່ມ, ປະຈຸບັນມີບ້ານພົ້ນທຸກ 62 ບ້ານກວມເອົາ 86%, ຄອບຄົວພົ້ນທຸກ 5.032 ບ້ານ ເທົ່າກັບ 91%, ບ້ານທຸກຍາກຍັງເຫຼືອ 10 ບ້ານເທົ່າກັບ 14% ແລະຄອບຄົວທຸກຍາກຍັງເຫຼືອ 454 ຄອບຄົວ ເທົ່າກັບ 8% ແລະມີບ້ານກະສິກຳພັດທະນາ 5 ບ້ານ,ບ້ານທີ່ຊົມໃຊ້ໄຟຟ້າມີ 67 ບ້ານກວມເອົາ 93% ແລະຄອບຄົວທີ່ໄດ້ຊົມໃຊ້ໄຟຟ້າ 3.952 ຄອບຄົວ ເທົ່າກັບ 61%. ສຳລັບຄາດໝາຍທີ່ວາງໄວ້ໃນ 5 ປີຕໍ່ໜ້າ ໂດຍໄດ້ກຳນົດ ເອົາ 8 ແຜນງານ 33 ໂຄງການທີ່ເປັນບູລິມະສິດຊຶ່ງລວມມີມູນຄ່າທັງໝົດ 36,70 ຕື້ກີບ. ໃນນັ້ນມີແຜນງານຜະລິດສະບຽງອາຫານ,ການສົ່ງເສີມການຜະລິດເປັນສິນຄ້າຈາກຜະລິດຕະພັນກະສິກຳ-ປ່າໄມ້,ອຸດສາຫະກຳ ແລະບໍ່ແຮ່,ແຜນການສ້າງບ້ານ,ກຸ່ມບ້ານພັດທະນາ ແລະລຶບລ້າງຄວາມທຸກຍາກ, ແຜນງານພັດທະນາພື້ນຖານໂຄງລ່າງຕົວເມືອງ ແລະຊົນນະບົດ, ການພັດທະນາການທ່ອງທ່ຽວ ແລະປົກປັກຮັກສາສິ່ງແວດລ້ອມ, ການພັດທະນາການສຶກສາ ແລະປັບປຸງສຸຂະພາບຂອງປະຊາຊົນ, ການພັດທະນາວັດທະ ນະທຳ, ສິນລະທຳ, ປູກຈິດສຳນຶກນໍ້າໃຈຮັກຊາດ ແລະສາມັກຄີບັນດາເຜົ່າ ແລະ ແຜນງານພັດທະນາລະບົບການເມືອງ, ການປົກຄອງ, ວຽກງານປ້ອງກັນຊາດ-ປ້ອງກັນຄາວມສະຫງົບ. ຈາກນັ້ນກອງປະຊຸມກໍ່ໄດ້ດຳເນີນການປ່ອຍບັດເລືອກເອົາຄະນະບໍລິຫານງານພັກເມືອງຊຸດໃໝ່ຈຳນວນ 25 ສະຫາຍ, ກອງປະຊຸມຄັ້ງປະຖົມມະ ລຶກໄດ້ເປັນເອກະພາບເລືອກເອົາ ສະຫາຍ ບຸນກວ້າງ ແກ້ວບຸນຍົງ ເປັນເລຂາຄະນະບໍລິຫານງານພັກເມືອງ, ສະຫາຍ ຄຳປອນ ກາລີແກ້ວດວງສອນ ເປັນຮອງເລຂາ ແລະສະຫາຍນາງ ກົງໃຈໄຊປັນຍາ ເປັນຮອງເລຂາ ທັງເປັນປະທານກວດກາພັກເມືອງຊຸດໃໝ່.

______________

ຂຽນໂດຍ: ກອງຄຳ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์