ອາເມລິກາສືບຕໍ່ຮ່ວມມືກັບລາວ ເພື່ອສ້າງຄວາມສາມາດໃນຂະແໜງເກັບກູ້ລະເບີດບໍ່ທັນແຕກ

  ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງງານ ແລະສະຫວັດດີການສັງຄົມ ແລະທ່ານນາງ ຣີນາ ບິດເຕີ ເອກອັກຄະລັດຖະທູດສະຫະລັດອາເມລິກາ ປະຈໍາ ສປປ ລາວ ໄດ້ເຂົ້າຮ່ວມເປັນສັກຂີພິຍານການລົງນາມເຊັນບົດບັນທຶກຄວາມເຂົ້າໃຈ (MOU) ລະຫວ່າງຄະນະກໍາມະການຄຸ້ມຄອງແຫ່ງຊາດເພື່ອການແກ້ໄຂບັນ ຫາລະເບີດຕົກຄ້າງຢູ່ ສປປ ລາວ(ຄຊກລ) ແລະບໍລິສັດທີທຣາເທັຈ(Tetratech) ເພື່ອສະໜັບສະໜູນແຜນງານການສ້າງຄວາມອາດສາມາດໃນການເກັບກູ້ລະເບີດບໍ່ທັນແຕກ (ລບຕ)ຢູ່ນະຄອນຫຼວງວຽງຈັນໃນວັນທີ 21 ມັງກອນ,ເພື່ອປະກອບສ່ວນເປັນສ່ວນໜຶ່ງຂອງການສະໜັບສະໜູນຂອງ ສ.ອາເມ ລິກາ ໃນຂະແໜງ ລບຕ, ບໍລິສັດ ທີທຣາ ເທັຈ ຈະມີບົດບາດສຳຄັນໃນຜັນຂະຫຍາຍທຶນຊ່ວຍເຫຼືອຂອງປະຊາຊົນອາເມລິກາເພື່ອສ້າງຄວາມເຂັ້ມແຂງໃຫ້ແກ່ການຮ່ວມມືຂອງ ສ.ອາເມລິກາ ກັບບັນດາອົງການຈັດຕັ້ງຂອງລັດຖະບານລາວກໍຄື ກຄຊລ ແລະໂຄງການເກັບກູ້ລະເບີດແຫ່ງຊາດ (ຄກລ).

  ຂໍ້ຕົກລົງສະບັບໃໝ່ນີ້້ຈະຊ່ວຍໃຫ້ ສ.ອາເມລິກາ ສືບຕໍ່ສະໜັບສະໜູນລັດຖະບານລາວ ໃນການປະກອບສ່ວນສ້າງແຜນຍຸດທະສາດແຫ່ງຊາດ 10 ປີ ຂອງຂະແໜງການ ລບຕ, ທັງເປັນແຜນການເພື່ອກ້າວໄປສູ່ການບັນລຸເປົ້າໝາຍການພັດທະນາແບບຍືນຍົງທີ 18(SDG 18)-ການລຶບລ້າງລະເບີດບໍ່ທັນແຕກທີ່ເປັນສິ່ງກີດຂວາງຕໍ່ການພັດທະນາໃຫ້ໄດ້ພາຍໃນປີ 2030. ນອກຈາກນັ້ນ, ຂໍ້ຕົກລົງສະບັບໃໝ່ນີ້ສ້າງຂຶ້ນບົນພື້ນຖານຄວາມຄືບໜ້າທີ່ໄດ້ປະຕິບັດໃນໄລຍະ 3 ປີຜ່ານມາໂດຍຜ່ານການສະໜັບສະໜູນທຶນຈຳນວນ 90 ລ້ານໂດລາສະຫະລັດ ເພື່ອດຳເນີນການສຳຫຼວດອີງໃສ່ຈຸດຫຼັກຖານການຕົກຄ້າງຂອງລະເບີດບໍ່ທັນແຕກ ແລະ ເພື່ອສະໜັບສະໜູນການດຳເນີນງານການເກັບກູ້ຢ່າງຕໍ່ເນື່ອງໃນທົ່ວ ສປປ ລາວ, ປະຈຸບັນນີ້ການສຳຫຼວດກຳລັງດຳເນີນຢູ່ແຂວງສະຫວັນນະເຂດ, ຊຽງຂວາງ, ສາລະວັນ, ເຊກອງ, ຈຳປາ ສັກ ແລະອັດຕະປື.

  ການຊ່ວຍເຫຼືອຂອງລັດຖະບານ ສ.ອາເມລິກາ ສຳລັບຂະແໜງການ ລບຕ ໃນລາວຈະຊ່ວຍສະໜັບສະໜູນການດຳເນີນງານການເກັບກູ້ໃຫ້ກ້າວຕໍ່ໄປຂ້າງໜ້າ. ການສຳຫຼວດທ່ີກຳລັງດຳເນີນຢູ່ນີ້ຈະນຳໄປສູ່ການກຳນົດຄວາມຕ້ອງການໃນການເກັບກູ້ໄດ້ດີຂຶ້ນ ແລະສາມາດຊ່ວຍໃຫ້ມີການສະໜອງທຶນເພີ່ມຕື່ມໃນການດຳເນີນການເກັບກູ້ໃນ 6 ແຂວງນີ້.

ທ່ານທູດ ສ.ອາເມລິກາ ຣີນາ ບິດເຕີ ກ່າວວ່າ“ພວກເຮົາມີຄວາມພາກພູມໃຈໃນການລົງທຶນໃສ່ອະນາຄົດຂອງ ສປປ ລາວໂດຍການສະໜັບສະໜູນຂະແໜງການ ລບຕ, ພວກເຮົາຈະສືບຕໍ່ສະໜັບສະໜູນ ສປປ ລາວ ສ້າງແຜນຍຸດທະສາດເພື່ອສາມາດບັນລຸເປົ້າໝາຍ SDG 18 ນັ້ນກໍຄືການເກັບກູ້ ລບຕ ຊຶ່ງເປັນສິ່ງກີດຂວາງຕໍ່ການພັດ ທະນາໃຫ້ໄດ້ພາຍໃນປີ 2030 ເພື່ອໃຫ້ປະຊາຊົນລາວສາມາດບັນລຸທ່າແຮງບົ່ມຊ້ອນຂອງຕົນຢ່າງເຕັມສ່ວນ ແລະມີອະນາຄົດທີ່ສະຫງົບສຸກ,ຈະເລີນຮຸ່ງເຮືອງແລະປອດໄພ” ສ.ອາເມລິກາ ຈະຮ່ວມມືກັບລັດຖະບານ ແລະປະຊາຊົນ ສປປ ລາວ ສ້າງຄວາມອາດສາມາດໃນຂະແໜງລບຕ, ປັບປຸງການສຶກສາ, ສົ່ງເສີມສຸຂະພາບ ແລະໂພຊະນາການ, ອໍານວຍຄວາມສະດວກການຄ້າ ແລະການລົງທຶນ ແລະສ້າງຄວາມເຂັ້ມແຂງໃຫ້ການສ້າງເປັນລັດແຫ່ງກົດໝາຍຊຶ່ງແມ່ນຄວາມມຸ້ງໝັ້ນຂອງພວກເຮົາທີ່ຈະເຮັດໃຫ້ ສປປ ລາວ ເຂັ້ມແຂງ, ຈະເລີນຮຸ່ງເຮືອງ ແລະເປັນເອກະລາດ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์