ຍີ່ປຸ່ນ ມອບທຶນຊ່ວຍເຫຼືອ 7 ໂຄງການ

  ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອລ້າເປັນຈຳນວນເງິນ 7,18 ແສນໂດລາ ໃຫ້ແກ່ຂະແໜງສຶກສາທິການຈຳນວນ 5 ໂຄງການ ເພື່ອຈັດຕັ້ງປະຕິບັດທີ່ ແຂວງບໍ່ແກ້ວ, ອຸດົມໄຊ, ວຽງຈັນ, ໄຊຍະບູລີ, ແລະແຂວງສາລະວັນ, ຂະແໜງສາທາລະນະສຸກຈຳນວນ 1 ໂຄງການທີ່ແຂວງຫົວພັນ ແລະຂະແໜງໂຄງລ່າງພື້ນຖານອີກ 1 ໂຄງການທີ່ແຂວງສາລະວັນ ໂດຍຜ່ານໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGPs).

  ໃນວັນທີ 31 ມັງກອນ 2020 ໄດ້ມີການເຊັນສັນຍາໂຄງການທີ່ສະຖານທູດຍີ່ປຸ່ນປະຈຳ ສປປ ລາວ, ນະຄອນຫຼວງວຽງຈັນ, ລະຫວ່າງ ທ່ານ ອະວາ ໂມໂຕະ ເຄອິຈິ ອຸປະທູດຍີ່ປຸ່ນຊົ່ວຄາວປະຈຳ ສປປ ລາວ ແລະບັນດາໂຕແທນຈາກການນຳຂັ້ນເມືອງແລະແຂວງທີ່ໄດ້ຮັບໂຄງການດັ່ງກ່າວ.

 ສຳລັບ 5 ໂຄງການຂະແໜງສຶກສາທິການນີ້ປະກອບມີການກໍ່ສ້າງສິ່ງອຳນວຍຄວາມສະດວກທີ່ໂຮງຮຽນມັດຖະຍົມຕົ້ນວຽງພັດທະນາທີ່ແຂວງບໍ່ແກ້ວ, ໂຮງຮຽນມັດຖະ ຍົມຕົ້ນພູອ່ອມທີ່ແຂວງອຸດົມໄຊ, ໂຮງຮຽນມັດຖະຍົມສົມບູນພາຂາວທີ່ແຂວງວຽງຈັນ, ໂຮງອະນຸບານ ແລະປະຖົມສົມສະຫວັນ ທີ່ແຂວງໄຊຍະບູລີ, ແລະໂຮງຮຽນມັດ ທະຍົມຕົ້ນດິນດາກທີ່ແຂວງສາລະວັນ. ສິ່ງອຳນວຍຄວາມສະດວກໃນບັນດາໂຮງຮຽນເຫຼົ່ານີ້ໃນປະຈຸບັນແມ່ນມີສະພາບທີ່ຊຸດໂຊມ ແລະ ແອອັດໃນຂະນະທີ່ຈຳນວນນັກ ຮຽນ ແລະອາຈານກໍຄາດວ່າຈະເພີ່ມຂຶ້ນອີກ. ໂຄງການເຫຼົ່ານີ້ມີເປົ້າໝາຍທີ່ຈະຍົກລະດັບສະພາບແວດລ້ອມການສຶກສາໂດຍການກໍ່ສ້າງຫ້ອງຮຽນຄົບວົງຈອນ 3 ຫາ 5 ຫ້ອງ.

  ໂຄງການຂະແໜງສາທາລະນະສຸກຈະກໍ່ສ້າງຫ້ອງປະສູດທີ່ໂຮງໝໍວຽງໄຊ,ແຂວງຫົວພັນ ສິ່ງອຳນວຍຄວາມສະດວກທີ່ໂຮງໝໍໃນປະຈຸບັນແມ່ນມີສະພາບຊຸດໂຊມໃນຂະນະທີ່ຈຳນວນຜູ້ປ່ວຍກໍຄາດວ່າຈະເພີ່ມຂຶ້ນ, ໂຄງການມີເປົ້າໝາຍທີ່ຈະເພີ່ມສັກກະຍະພາບຂອງໂຮງໝໍໂດຍການກໍ່ສ້າງຫ້ອງປະສູດ ແລະຍັງຈະມອບອຸປະກອນທາງ ການແພດໃຫ້ອີກ.

  ສ່ວນວ່າໂຄງການກໍ່ສ້າງສະພານເຫຼັກຂ້າມຫ້ວຍຫາດທີ່ບ້ານຫາດເກາະນໍ້າ, ແຂວງສາລະວັນ ຊຶ່ງເປັນສະຖານທີ່ທີ່ປະສົບຄວາມຫຍຸ້ງຍາກໃນການເຂົ້າເຖິງສິ່ງອຳນວຍຄວາມສະດວກທາງສາທາລະນະ, ຕະຫຼາດໃນພື້ນທີ່ຕ່າງໆ ໂດຍສະເພາະຊ່ວງລະດູຝົນເນື່ອງຈາກບໍ່ມີຂົວຂ້າມຫ້ວຍໄປມາ. ໂຄງການນີ້ມີເປົ້າໝາຍທີ່ຈະຍົກລະດັບການເຂົ້າເຖິງການບໍລິການຂັນພື້ນຖານໃຫ້ແກ່ປະຊາຊົນໃນຂົງເຂດ ແລະອຳນວຍຄວາມສະດວກໃຫ້ແກ່ການຂົນສົ່ງສິນຄ້າ ແລະການໃຫ້ບໍລິການໃນຂົງເຂດດັ່ງກ່າວ.

___________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์