ຕາດແຊພະ-ແຊປອງໄລ ພວມປັບປຸງຫຼັງໄດ້ຮັບຜົນກະທົບຈາກເຂື່ອນແຕກ

 ຜູ້ສໍາປະທານແຫຼ່ງທ່ອງທ່ຽວທາງທໍາມະຊາດຕາດແຊພະ-ແຊປອງໄລ ເມືອງສະໜາມໄຊ ແຂວງອັດຕະປື ພວມກໍາເລັ່ງມືພັດທະນາ ແລະປັບປຸງໃຫ້ສະຖານທີ່ດັ່ງກ່າວກັບຄືນມາຮັບໃຊ້ນັກທ່ອງທ່ຽວ ແລະພ້ອມທີ່ຈະພັດທະນາໃຫ້ກາຍເປັນສະຖານທີ່ທ່ອງທ່ຽວທີ່ໂດດເດັ່ນຂອງແຂວງອັດຕະປື.

 ທ່ານ ວົງວິໄລ ໄຊຍະສອນ ຜູ້ສໍາປະທານແຫຼ່ງທ່ອງທ່ຽວຕາດແຊພະ-ແຊປອງໄລ ໄດ້ໃຫ້ສໍາພາດເມື່ອບໍ່ດົນນີ້ວ່າ: ພາຍຫຼັງສະຖານທີ່ທ່ອງທ່ຽວທາງທໍາມະຊາດຕາດແຊພະ-ແຊປອງໄລ ໄດ້ຖືກຜົນກະທົບຍ້ອນເຫດການໄພພິບັດຄູກັນນໍ້າເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນທ້າຍປີ 2018 ຜ່ານມາເຮັດໃຫ້ສະຖານທີ່ທ່ອງທ່ຽວດັ່ງກ່າວໄດ້ຮັບຄວາມເສຍຫາຍຄິດເປັນມູນຄ່າເຖິງ 30 ຕື້ກວ່າກີບ, ສະນັ້ນເພື່ອເຮັດໃຫ້ແຫຼ່ງທ່ອງທ່ຽວຕາດແຊພະ-ແຊປອງໄລ ໄດ້ກັບມາມີຄວາມສວຍ ງາມຄືເກົ່ານັ້ນທາງຜູ້ສໍາປະທານພວມກໍາລັງເລັ່ງມືຂຸ່ນຂ່ຽວພັດທະນາ ແລະປັບປຸງສະຖານທີ່ດັ່ງກ່າວຢ່າງເປັນເຈົ້າການ,ຊຶ່ງມາຮອດປະຈຸບັນແມ່ນພວມສຸມໃສ່ການ

ປັບປຸງດ້ານພື້ນຖານໂຄງລ່າງທີ່ຈໍາເປັນເຊັ່ນ: ການສ້າງຕາຂ່າຍໄຟຟ້າເຂົ້າໄປຍັງສະຖານທີ່, ກໍ່ສ້າງເສັ້ນທາງເຂົ້າ-ອອກສະຖານທີ່, ສ້າງອ່າງເກັບນໍ້າຂະໜາດໃຫຍ່ , ປຸກສ້າງຮ້ານອາຫານ, ກໍ່ສ້າງຫ້ອງນໍ້າ, ເຮັດສວນດອກໄມ້ທີ່ປະກອບດ້ວຍນໍ້າພຸ, ສວນໄມ້ໃຫ້ໝາກ, ກໍ່ສ້າງສະຖານທີ່ຈອດລົດຂະໜາດໃຫຍ່ ແລະກໍ່ສ້າງບ້ານພັກສໍາລັບນັກທ່ອງທ່ຽວທີ່ມາຄ້າງຄືນເພື່ອຊົມທໍາມະຊາດ,ການພັດທະນາສະຖານທີ່ດັ່ງກ່າວແມ່ນໄດ້ເລີ່ມຈັດຕັ້ງປະຕິບັດມາແຕ່ຕົ້ນເດືອນທັນວາ 2019 ແລະມາ ຮອດປະຈຸບັນໜ້າວຽກຕ່າງໆແມ່ນສໍາເລັດໄປແລ້ວ 10% ຄາດຈະໃຫ້ສໍາເລັດພາຍໃນ 3 ປີ ຊຶ່ງຈະນໍາໃຊ້ທຶນທັງໝົດໃນການພັດທະນາປະມານເກືອບ 20 ຕື້ກີບ.

-----------

 ທ່ານ ວົງວິໄລ ໄຊຍະສອນ ຜູ້ສໍາປະທານແຫຼ່ງທ່ອງທ່ຽວຕາດແຊພະ-ແຊປອງໄລ ຍັງໄດ້ກ່າວຕື່ມວ່າ: ຕົນເອງພ້ອມຈະພັດທະນາແຫຼ່ງທ່ອງທ່ຽວແຫ່ງນີ້ໃຫ້ກາຍ ເປັນແຫຼ່ງທ່ອງທ່ຽວທີ່ໂດດເດັ່ນ ແລະເຕັມໄປດ້ວຍຄວາມສວຍງານກວ່າແຕ່ກ່ອນທີ່ບໍ່ທັນເກີດເຫດການໄພພິບັດເຂື່ອນແຕກ ແລະກໍ່ຮຽກຮ້ອງມາຍັງນັກທ່ອງທ່ຽວທີ່ມີຄວາມສົນໃຈໃນການທ່ອງທ່ຽວທາງດ້ານທໍາມະຊາດແມ່ນໃຫ້ມາທ່ອງທ່ຽວທີ່ຕາດແຊພະ-ແຊປອງໄລ ໄດ້ໃນໄລຍະທີ່ກໍາລັງພັດທະນາຄືນໃໝ່ ຫຼືເມື່ອສຳເລັດການພັດທະນາແລ້ວ.

___________

ຂຽນໂດຍ: ວັດທະນາ ຫຼວງອາໄພ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์