ເຜີຍແຜ່ເຕັກໂນໂລຊີ ສະຖານີຈຸດພິກັດການເຊື່ອມຕໍ່

 ໃນວັນທີ 29 ມັງກອນ 2020 ກົມເຕັກໂນໂລຊີ ແລະນະວັດຕະກຳ, ກະຊວງວິທະຍາສາດ ແລະເຕັກໂນໂລຊີຮ່ວມກັບບໍລິສັດ ຢູນິກເທັກ ຈຳກັດ ຈັດກອງປະຊຸມ ສຳມະນາກ່ຽວກັບການປະຍຸກໃຊ້ເຕັກໂນໂລຊີສະຖານີຈຸດພິກັດການປະຕິບັດການເຊື່ອມຕໍ່ (Con tinu ously Operating Refer ence Station) ທີ່ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມເປັນປະທານກ່າວເປີດຂອງ ທ່ານ ແສງຈັນ ພະໄຊຍະແສງ ຮອງຫົວໜ້າກົມເຕັກໂນໂລຊີ ແລະ ນະວັດຕະກຳ ແລະທ່ານ ຈັນດາວົງ ສຸດທິທຳ, ປະທານບໍລິສັດຢູນິກເທັກຈຳກັດຊຶ່ງມີຜູ້ເຂົ້າຮ່ວມຈາກບັນດາກະຊວງ, ສະຖາບັນການສຶກສາ, ມະຫາວິທະຍາໄລແຫ່ງຊາດ ແລະພາກ ສ່ວນທີ່ກ່ຽວຂ້ອງ.

  ຈຸດປະສົງເປົ້າໝາຍຂອງການຈັດສຳມະນາດັ່ງກ່າວແມ່ນເພື່ອເປັນການເຜີຍແຜ່ວຽກງານການນຳໃຊ້ເຕັກ ໂນໂລຊີຂໍ້ມູນຂ່າວສານເພື່ອການປະຕິບັດເຊື່ອມຕໍ່ກັບສະຖານີຈຸດພິກັດ ແລະເຜີຍແຜ່ລະບົບຂໍ້ມູນ,ອຸປະກອນການ ນຳໃຊ້ເຂົ້າໃນວຽກງານການພັດທະນາ ເພື່ອປະຍຸກໃຊ້ເຂົ້າໃນການສ້າງແຜນທີ່ການຄຸ້ມຄອງ, ການຕິດຕາມ ແລະ ການແຈ້ງເຕືອນໄພພິບັດຕ່າງໆ.

 ທ່ານ ແສງຈັນ ພະໄຊຍະແສງ ກ່າວບາງຕອນວ່າ: ອີງຕາມພາລະບົດບາດ, ໜ້າທີ່ ແລະຄວາມຮັບຜິດຊອບຂອງກະຊວງວິທະຍາສາດ ແລະເຕັກໂນໂລຊີແມ່ນຄຸ້ມ ຄອງເອກະພາບກ່ຽວກັບວຽກງານການຄົ້ນຄວ້າ, ພັດທະນາ, ເລືອກເຟັ້ນ, ກວດສອບ, ອະນຸມັດ, ຢັ້ງຢືນ, ຕິດຕາມກວດກາການນຳເຂົ້າ ແລະການຖ່າຍທອດຜົນ ສຳເລັດທາງດ້ານວິທະຍາສາດ, ເຕັກໂນໂລຊີ ແລະນະວັດຕະກຳຂອງສາກົນ, ພ້ອມທັງສົ່ງເສີມຫົວຄິດປະດິດສ້າງ, ທົດລອງການນຳໃຊ້ເຕັກນິກ-ເຕັກໂນໂລຊີໃໝ່ ,ນະວັດຕະກໍາໃໝ່ ເພື່ອໃຫ້ແທດເໝາະກັບສະພາບຕົວຈິງຂອງ ການພັດທະນາເສດຖະກິດ-ສັງຄົມ ຂອງປະເທດເຮົາໃນວຽກງານການປະສານງານກ່ຽວກັບການນຳໃຊ້ເຕັກໂນໂລຊີຂໍ້ມູນລະບົບດາວທຽມນຳທາງເຊື່ອມຕໍ່ຈຸດພິກັດເພື່ອການຄຸ້ມຄອງ-ຕິດຕາມສິ່ງແວດລ້ອມ ແລະການເຕືອນໄພພິບັດຕ່າງໆ.

  ການສຳມະນາຄັ້ງນີ້ແມ່ນສ່ວນໜຶ່ງທີ່ສາມາດຕອບສະໜອງໄດ້ຕາມເປົ້າໝາຍ ແລະຈຸດປະສົງຂອງຍຸດທະສາດແຜນພັດທະນາວຽກງານວິທະຍາສາດ, ເຕັກໂນໂລຊີ ແລະນະວັດຕະກຳເພື່ອປະກອບສ່ວນໃຫ້ແກ່ຂະແໜງການຕ່າງໆເຊັ່ນ: ກະສິກຳ, ດ້ານສິ່ງແວດລ້ອມ, ການຄຸ້ມຄອງຕົວເມືອງ, ການຜະລິດ, ການສຶກສາຮຽນຮູ້ ແລະຂະແໜງການອື່ນໆທີ່ກ່ຽວຂ້ອງໃນການພັດທະນາເສດຖະກິດ-ສັງຄົມໃຫ້ມີຜົນປະໂຫຍດ ແລະຍືນຍົງ.

__________

ຂຽນໂດຍ: ນໍ້າເໝີຍ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 03/02/2020