ຈໍາປາສັກຖອດຖອນບົດຮຽນວຽກງານໂຍທາທິການ ແລະຂົນສົ່ງ

  ແຂວງຈໍາປາສັກ ແລະເມືອງໂພນທອງ ໄດ້ຮ່ວມກັນຈັດກອງປະຊຸມແລກປ່ຽນຖອດຖອນບົດຮຽນປຶກສາຫາລືວຽກງານໂຍທາທິການ ແລະຂົນສົ່ງຂຶ້ນໃນວັນທີ 29 ມັງກອນ 2020 ທີ່ສະໂມສອນເມືອງໂພນທອງໂດຍໃຫ້ກຽດເປັນປະທານຂອງທ່ານ  ສຸກກະເສີມ ປາກດີມະນີວົງ ຫົວໜ້າພະແນກໂຍທາທິການ ແລະ ຂົນສົ່ງ, ທ່ານ ສຸພາບ ທໍາມະຮັກສາ ເຈົ້າ ເມືອງໆໂພນທອງ, ມີບັນດາຫົວ ໜ້າ ແລະຮອງຫົວໜ້າ ຍທຂ 1 ນະ  ຄອນ, 9 ເມືອງ ແລະເຈົ້າໜ້າທີ່ ກ່ຽວຂ້ອງເຂົ້າຮ່ວມ.

  ໃນກອງປະຊຸມທ່ານ ສຸກກະເສີມ ໄດ້ກ່າວວ່າ: ຈຸດປະສົງຂອງການຈັດກອງປະຊຸມຄັ້ງນີ້ແມ່ນເພື່ອສະຫຼຸດລາຍງານວຽກງານໂຍທາທິການ ແລະຂົນສົ່ງ (ຍທຂ) ທົ່ວແຂວງໃນໄລຍະ 1 ປີ 2019 ຜ່ານມາ, ທັງເປັນການແລກປ່ຽນ ຖອດຖອນບົດຮຽນເພື່ອປັບປຸງແກ້ ໄຂບັນຫາທີ່ຄົງຄ້າງ ແລະກໍານົດທິດທາງເຄື່ອນໄຫວໃຫ້ສອດຄ່ອງໃນປີໃນປີ 2020, ເປັນຕົ້ນແມ່ນການຄຸ້ມຄອງຂຶ້ນທະບຽນລົດໄຖນາ,ລົດໃຫ້ເຊົ່າ (ລົດດາວ),ການສົມທົບທຶນກໍ່ສ້າງ ແລະສ້ອມແປງເສັ້ນທາງຂົວ, ການຄຸ້ມຄອງບັນຫາການເກັບເງິນຄ່າທາງ, ການກວດກາເຕັກນິກລົດ, ການສອບເສັງເອົາໃບຂັບຂີ່, ການເກັບມ້ຽນ ແລະກໍານົດຂີ້ເຫຍື້ອ, ການຄຸ້ມຄອງອຸບັດເຫດຕາມທ້ອງຖະໜົນ, ຄຸ້ມຄອງເຄຫາຜັງເມືອງ ແລະໂຄງການກໍ່ສ້າງອື່ນໆ.

 ພ້ອມດຽວກັນນີ້ທ່ານຫົວໜ້າພະແນກໂຍທາທິການ ແລະຂົນສົ່ງ ແຂວງຈໍາປາສັກ ຍັງໄດ້ຮຽກຮ້ອງໃຫ້ທຸກຂະແໜງການທີ່ນອນໃນ ຍທຂ ແຂວງເອົາໃຈໃສ່ຕໍ່ວຽກ ງານຂອງຕົນຢ່າງຈິງຈັງ, ປະຕິບັດລະບຽບກົດໝາຍຂອງ ຍທຂ ຢ່າງເຄັ່ງຄັດທັງນີ້ກໍເພື່ອແນໃສ່ເຮັດໃຫ້ວຽກງານ ຍທຂ ແຂວງຈໍາປາສັກ ໄດ້ຮັບການຈັດຕັ້ງປະຕິ ບັດຢ່າງມີປະສິດທິຜົນກວ່າເກົ່າ ແລະພັດທະນາກ້າວຂຶ້ນ, ນໍາຜົນປະໂຫຍດຕົວຈິງສູ່ສັງຄົມກໍ່ຄືປະເທດຊາດ.

_____________

ຂຽນໂດຍ:  ໂພທິຣາຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

 

แชร์