ຄຶກຄື້ນເທສະການອາຫານລາວປີນີ້ ມີຍອດຂາຍສິນຄ້າກວ່າປີຜ່ານມາ

 ງານເທສະການອາຫານລາວປີ 2020 ນີ້ ມີບັນດາຮ້ານອາຫານ,ຮ້ານຫັດຖະກໍາ,ຮ້ານກະສິກໍາ,ຮ້ານຈາກສະຖານທູດ ແລະຮ້ານມາຈາກ OTOP ໄທມີທັງໝົດ 190 ຮ້ານ ໂດຍແຕ່ລະຮ້ານຄ້າຕ່າງກໍນໍາເອົາຈຸດເດັ່ນ ຫຼື ຈຸດພິເສດຂອງສິນຄ້າຕົນເອງມາວາງຂາຍໃຫ້ບັນດາມວນຊົນໄດ້ຊົມໃຊ້ແຕ່ປີນີ້ເຫັນວ່າບາງຫ້າງຮ້ານມີຄວາມຄຶກຄື້ນ ແລະມີຍອດຂາຍສູງກວ່າປີຜ່ານມາ.

 ແມ່ບຸນມີ ພັນທະເນດ ເຈົ້າຂອງຮ້ານກະເປົ໋າລາວປະຍຸກໃຫ້ສໍາພາດວ່າ: ໄດ້ເລີ່ມເຮັດກະເປົ໋າປະຍຸກຈາກໄມ້ໄຜ່ ແລະຫວາຍມາຫຼາຍກວ່າ 20 ປີ ໂດຍໄດ້ເລີ່ມຈາກທຸລະກິດໃນຄອບຄົວຈົນໄດ້ເລີ່ມຈ້າງພະນັກງານຊ່ວຍຜະລິດປະຈຸບັນໄດ້ມີຜະລິດຕະພັນຫຼາກຫຼາຍຢ່າງທີ່ເປັນເອກະລັກຂອງລາວເຊັ່ນ: ແພໄໝມ້ອນ, ແພຝ້າຍ ,ໄມ້ໄຜ່ ແລະຫວາຍປະຍຸກເປັນກະເປົ໋າໃຫ້ເຂົ້າກັນກັບຍຸກສະໄໝໃໝ່ປີນີ້ຖືວ່າເປັນຄັ້ງທີ 5 ທີ່ໄດ້ນໍາເອົາຜະລິດຕະພັນຂອງຕົນມາວາງສະແດງເພື່ອຈັບຈ່າຍເອົາຜະ ລິດຕະພັນຈາກທໍາມະຊາດ ແລະສະແດງເຖິງລວດລາຍທີ່ສື່ເຖິງເອກະລັກວັດທະນະທໍາລາວຖ້າທຽບໃສ່ປີຜ່ານມາເຫັນວ່າໄດ້ກະແສຕອບຮັບຈາກລູກຄ້າຫຼາຍສິນຄ້າທີ່ນໍາມາວາງຂາຍບາງຢ່າງກໍຜະລິດນໍາບໍ່ທັນເພາະສັງເກດເຫັນວ່າຫຼາຍຄົນຫັນມາໃຊ້ສິນຄ້າທີ່ເປັນເອກະລັກ ແລະ ຜະລິດດ້ວຍສີມືຂອງຄົນລາວຫຼາຍຂຶ້ນເບິ່ງແລ້ວໃຫ້ຄວາມສົນໃຈຢ່າງຄຶກຄື້ນແຖມຍັງເປັນການປະຍຸກໃຫ້ເຂົ້າກັບຄວາມທັນສະໄໝອີກດ້ວຍ.

  ແມ່ດໍາດວນ ດວງທະນູສອນ ເຈົ້າຂອງຮ້ານອາຫານຈາກຊຽງຂວາງໃຫ້ສໍາພາດວ່າ: ສິນຄ້າທຸກຢ່າງທີ່ນໍາມາຂາຍໃນເທສະການອາຫານລາວຄັ້ງທີ 15 ນີ້ມີຫຼາຍ ກວ່າ 10 ລາຍການ ໂດຍນໍາເອົາອາຫານທີ່ເປັນເອກະລັກຂອງແຂວງມາຈໍາໜ່າຍເຊັ່ນ: ແຈ່ວປາເຄັມ, ແຈ່ວບອງ, ຊຸບໃບໝາກຈອງ, ເຂົ້າຄຽບມັນຕົ້ນ, ເຂົ້າຮາງ , ເຂົ້າ ກໍ່າ, ກະທຽມ ແລະອີກຫຼາຍຢ່າງ ສ່ວນຮ້ານເຮົາໄດ້ເຂົ້າຮ່ວມງານ ເທສະການອາຫານລາວມາຫຼາຍ ປີແລ້ວ ແລະແຕ່ລະປີກໍຈະນໍາເອົາ ປະເພດອາຫານ ຫຼື ແຜ່ນແພມາຂາຍຮ່ວມນໍາປີນີ້ຖືວ່າໄດ້ຂາຍດີກວ່າປີຜ່ານມາ, ນອກຈາກນໍາມາຂາຍໃນເທສະການອາຫານລາວແລ້ວຕົນເອງກໍເຮັດອາຫານພື້ນບ້ານຂາຍປະຈໍາຢູ່ ແລ້ວຖ້າທ່ານໃດທີ່ໄປທ່ຽວຊົມງານມະຫາກໍາກີລາແຫ່ງຊາດກໍສາມາດໄປລອງຊິມໄດ້ທີ່ບ້ານໂພນສະຫວັນໃຕ້, ເມືອງແປກ ແຂວງຊຽງຂວາງ.

  ທາງດ້ານແມ່ ບົວທິບ ຫອມຈັນດີ ເຈົ້າຂອງຮ້ານທິບສະຫວ່າງຜະລິດຕະພັນປຸງແຕ່ງນໍ້າຍໍກໍໃຫ້ສໍາພາດວ່າ: ເລີ່ມມາວາງສະແດງໃນເທສະການອາຫານລາວນັບແຕ່ປີທໍາອິດຈົນມາຮອດປະຈຸບັນກໍເປັນປີທີ 15 ແລ້ວກະແສຕອບຮັບແມ່ນດີຂຶ້ນທຸກໆປີເຖິງວ່າເສດຖະກິດໃນປີນີ້ຈະບໍ່ຄ່ອຍດີແຕ່ບໍ່ໄດ້ເປັນຜົນກະທົບຫຍັງເພາະປີນີ້ຖືວ່າໄດ້ຮັບກະແສດີຈາກລູກຄ້າຫຼາຍກວ່າປີຜ່ານໆມາອີກດ້ວຍ,ສ່ວນຜະລິດຕະພັນທີ່ເອົາມາວາງຈໍາໜ່າຍຄັ້ງນີ້ມີນໍ້າໝາກຍໍ,ນໍ້າໝາກຂາມປ້ອມ, ຊາໝາກຍໍ, ຊາໝາກຂາມປ້ອມ, ກາເຟເຫັດຫວາຍ, ກາເຟດາວອິນຄາ ແລະອີກຫຼາຍໆຢ່າງວັດຖຸດິບຫຼັກໆແມ່ນປູກເອງ ແລະບໍ່ໄດ້ຮັບຊື້ຈາກບ່ອນອື່ນເພາະເຮົາຄໍານຶງເຖິງຄຸນນະ ພາບເປັນຫຼັກ.

____________

ຂຽນໂດຍ: ແພງຕາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์