ຮອດ 2024 ເມືອງຄູນຄຳ ຈະສູ້ຊົນໃຫ້ຍອດຜະລິດຕະພັນພາຍໃນບັນລຸ 448 ຕື້ກີບ

  ນັບແຕ່ນີ້ຮອດປີ 2024 ເມືອງຄູນຄຳ ແຂວງຄຳມ່ວນ ຈະສູ້ຊົນໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນໃຫ້ບັນລຸ 448 ຕື້ກີບ ສະເລ່ຍລາຍຮັບໃຫ້ໄດ້ 16 ລ້ານກວ່າກີບຕໍ່ຄົນຕໍ່ປີ, ສ່ວນການຜະລິດເຂົ້າໃຫ້ໄດ້ 31 ພັນກວ່າໂຕນ ແລະພືດໃຫ້ໄດ້ 33 ພັນກວ່າໂຕນ.

  ກອງປະຊຸມໃຫຍ່ຄັ້ງທີ II ຂອງ ອົງຄະນະພັກເມືອງຄູນຄຳໄດ້ອັດລົງດ້ວຍຜົນສຳເລັດອັນຈົບງາມໃນວັນທີ 29 ມັງກອນ 2020 ພາຍຫຼັງດໍາເນີນມາເປັນເວລາ 2 ວັນ (28-29 ມັງກອນ) ຢູ່ທີ່ສະໂມສອນຂອງເມືອງໂດຍພາຍໃຕ້ການເປັນປະທານຂອງສະຫາຍ ຄຳໜັ້ນ ສໍປະເສີດ ເລຂາພັກເມືອງເຈົ້າເມືອງໆຄູນຄຳ,ເປັນກຽດເຂົ້າຮ່ວມມີສະຫາຍ ພົມມາ ພັນທະລັງສີ ຮອງເລຂາພັກແຂວງຫົວໜ້າຄະນະຈັດຕັ້ງແຂວງ, ຕະຫຼອດແຂກຖືກເຊີນ ແລະຜູ້ແທນສົມບູນທີ່ເປັນຕົວແທນໃຫ້ ສະມາຊິກພັກໃນທົ່ວເມືອງເຂົ້າຮ່ວມທັງໝົດ 159 ສະຫາຍ, ຍິງ 15 ສະຫາຍ.

  ໃນວາລະດຳເນີນກອງປະຊຸມສະຫາຍ ຄໍາໝັ້ນ ສໍປະເສີດ ເລຂາພັກເມືອງ ເຈົ້າເມືອງໆຄູນຄຳ ໄດ້ຜ່ານຮ່າງບົດລາຍງານການເມືອງການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມໃນໄລຍະ 5 ປີຜ່ານມາໂດຍພາຍໃຕ້ການຊີ້ນຳໆພາຂອງອົງຄະນະພັກເຫັນວ່າເສດຖະກິດຂອງເມືອງໄດ້ມີການຂະຫຍາຍຕົວຢ່າງຕໍ່ເນື່ອງຢູ່ໃນລະດັບ 6,56%, ລາຍຮັບລວມຍອດຜະລິດຕະພັນພາຍໃນປະຕິບັດໄດ້ 347 ຕື້ກີບ,ລາຍໄດ້ສະເລ່ຍຕໍ່ຫົວຄົນ 14 ລ້ານກວ່າກີບຕໍ່ຄົນຕໍ່ປີ,ຂົງເຂດວຽກງານກະສິກຳທົ່ວ ເມືອງມີເນື້ອທີ່ປູກເຂົ້າທັງໝົດ 7.250 ເຮັກຕາ, ໃນນີ້ນາປີ 6.400 ເຮັກຕາ, ທຽບໃສ່ແຜນ ການເພີ່ມຂຶ້ນ 49%, ເນື້ອທີ່ປູກເຂົ້ານາແຊງ 850 ເຮັກຕາ, ຜົນຜະລິດເຂົ້າທັງສອງລະດູໄດ້ 1.124 ກິໂລຕໍ່ຄົນຕໍ່ປີ, ການປູກພືດຜັກອຸດສາຫະກຳ ແລະພືດຜັກ ເປັນສິນຄ້າກໍ່ມີການຂະຫຍາຍຕົວຢ່າງຕັ້ງໜ້າ, ມີຫຼາຍຄອບຄົວກາຍເປັນຕົວແບບດ້ານການຜະລິດກະສິກຳ,ມາຮອດປະຈຸບັນຄອບຄົວທຸກຍາກຍັງເຫຼືອ 20 ຄອບຄົວ ເທົ່າກັບ 0,36% ຂອງຈຳນວນຄອບຄົວທັງ ໝົດ, ດ້ານຂົງເຂດວຽກ ງານວັດທະນະທຳ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາພື້ນຖານໂຄງລ່າງຕ່າງໆກໍ່ໄດ້ຮັບການພັດ ທະນາຕໍ່ເນື່ອງເປັນກ້າວໆ, ຂົງເຂດພັກ-ພະນັກງານທົ່ວເມືອງມີຄະນະພັກຮາກຖານ 5 ຮາກຖານ, ມີໜ່ວຍພັກທັງໝົດ 59 ໜ່ວຍພັກ ເພີ່ມຂຶ້ນ 15.25%, ມີສະມາຊິກພັກທັງໝົດ 1.043 ສະຫາຍ, ຍິງ 210 ສະຫາຍ, ເພີ່ມຂຶ້ນ 338 ສະຫາຍ.

  ຈາກນັ້ນກອງປະຊຸມໄດ້ຜ່ານຮ່າງແຜນພັດທະນາເສດຖະກິດ-ສັງຄົມໃນຕໍ່ໜ້າ 2020–2024, ຮ່າງບົດສໍາຫຼວດນໍາພາລວມ ແລະມາດຖານເງື່ອນໄຂຂອງຜູ້ທີ່ສະໝັກ ເຂົ້າໂຄງປະກອບຂອງຄະນະບໍລິຫານງານຊຸດໃໝ່, ມາດຖານເງື່ອນໄຂລາຍຊື່ຜູ້ແທນສົມບູນ, ສຳຮອງເພື່ອເຂົ້າຮ່ວມກອງປະຊຸມໃຫຍ່ຄັ້ງທີ 10 ຂອງອົງຄະນະພັກແຂວງ, ພ້ອມທັງດຳເນີນການປ່ອນບັດຄັດເລືອກເອົາເລຂາ, ຮອງເລຂາ ແລະຄະນະບໍລິຫານງານພັກເມືອງຊຸດໃໝ່ປະກອບມີຜູ້ລົງສະໝັກ 25 ສະ ຫາຍ, ຍິງ 3 ສະຫາຍ, ເລືອກເອົາ 21 ສະຫາຍ, ກອງປະຊຸມຄັ້ງປະຖົມມະເລິກເຫັນດີເປັນເອກະພາບເລືອກເອົາສະຫາຍ ຄຳໜັ້ນ ສໍປະເສີດ ເປັນເລຂາຄະນະ ພັກ ເມືອງ, ສະຫາຍ ສຸລິຍົງ ໂພຄຳ ເປັນຮອງເລຂາ, ສະຫາຍ ເພັດວິໄລສັກ ອິນຸລາ ເປັນຮອງເລຂາ, ທັງເປັນປະທານກວດກາ ແລະເລືອກເອົາສະຫາຍໃຫຍ່ປານາວົງ ແລະສະຫາຍ ພອນໄຊ ແກ້ວປານີ ເປັນຮອງປະທານກວດກາພັກເມືອງ.

 ສ່ວນດ້ານເສດຖະກິດທ່ານ ຄຳໝັ້ນ ສໍປະເສີດ ໄດ້ສະເໜີວ່າແຕ່ນີ້ຮອດປີ 2024 ຈະສູ້ຊົນໃຫ້ເສດຖະກິດຂອງເມືອງຄູນຄຳຂະຫຍາຍຕົວຢ່າງຕໍ່ເນື່ອງ,ລວມຍອດຜະລິດຕະພັນພາຍໃນບັນລຸ 448 ຕື້ກີບ, ສະເລ່ຍລາຍຮັບໃຫ້ໄດ້ 16 ລ້ານກວ່າກີບຕໍ່ຄົນຕໍ່ປີ, ການຜະລິດເຂົ້ານາປີ-ນາແຊງໃຫ້ໄດ້ 31.735 ໂຕນ,ສະເລ່ຍເຂົ້າເປືອກ 1.105 ກິໂລຕໍ່ຄົນຕໍ່ປີ, ຂະຫຍາຍເນື້ອທີ່ປູກພືດສຳຮອງເພີ່ມຂຶ້ນ 2.800 ເຮັກຕາ, ຜົນຜະລິດໃຫ້ໄດ້ 33.565 ໂຕນ.

__________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์