ລົດຕູ້ ອາດໝົດໄປເທື່ອລະນ້ອຍຖ້າບໍ່ແກ້ໄຂ 4 ບັນຫາ

 ສະມາຄົມລົດຕູ້ໜຶ່ງໜ່ວຍບໍລິການຮັບໃຊ້ສັງຄົມຖືເປັນອີກໃບໜ້າທີ່ສຳຄັນດ້ານບໍລິການຮັບຂົນສົ່ງຜູ້ໂດຍສານ ແລະໃຫ້ເຊົ່າເໝົາພາຍໃນ ແລະຕ່າງປະເທດຕະຫຼອດ 10 ປີຜ່ານມາປະຈຸບັນຖືວ່າສະມາຄົມພົບ 4 ບັນຫາຫຼັກທີ່ເຮັດໃຫ້ການບໍລິການບໍ່ສະດວກ ແລະລົດຕູ້ອາດໝົດໄປເທື່ອລະໜ້ອຍຖ້າຍັງບໍ່ໄດ້ຮັບການແກ້ໄຂໂດຍສະເພາະເລື່ອງລາຄາ, ລົດຕູ້ບໍ່ມີສັງກັດ, ລົດຕູ້ທ່ອງທ່ຽວ ແລະລົດຕູ້ຕ່າງແຂວງ.

   ທ່ານ ບຸນຄໍ້າ ລາດຊະວົງ ຫົວໜ້າສະມາຄົມລົດຕູ້ໃຫ້ສຳພາດທີມຂ່າວໜັງສືພິມເສດຖະກິດ-ສັງຄົມໃຫ້ຮູ້ວ່າ: ສະມາຄົມລົດຕູ້ຂົນສົ່ງໂດຍສານ ແລະ ໃຫ້ເຊົ່າເໝົານະ ຄອນຫຼວງວຽງຈັນແມ່ນສ້າງຂຶ້ນມາແຕ່ປີ 2004 ໂດຍຂຶ້ນກັບພະແນກໂຍທາທິການຂົນສົ່ງນະຄອນຫຼວງວຽງຈັນທຳອິດມີລົດທັງໝົດ 45 ຄັນ ແລະຕໍ່ມາ 3-4 ປີ ມີລົດເພີ່ມ 407 ຄັນແຕ່ຕົກມາປະຈຸບັນມີລົດພຽງ 260ຄັນຊຶ່ງສາເຫດທີ່ເຮັດລົດຕູ້ຫຼຸດລົງສ່ວນໜຶ່ງມາຈາກເຈົ້າຂອງລົດອອກຖອນໂຕໄປເຮັດວຽກອື່ນ,ບາງລາຍຢຸດເຊົາ.

  ປະຈຸບັນລົດຕູ້ມີບໍລິການທັງໝົດ 6 ຈຸດຄື: ດ່ານສາກົນຂົວມິດຕະພາບ 180 ຄັນ,ດ່ານສາກົນສະຖານນີລົດໄຟທ່ານາແລ້ງ12 ຄັນ,ດ່ານສະໜາມບິນ 32 ຄັນ,ດ່ານປະເພນີໜອງດາ 13 ຄັນ, ປະຈຳໂຮມແຮງ ແລະທົ່ວໄປ 42 ຄັນ ແລະ ສະຖານນີຄີວລົດສາຍເໜືອ 15 ຄັນ ຊຶ່ງໃຫ້ບໍລິການຕາມຈຸດ ແລະ ລະບຽບກົດໝາຍຂອງສະ ມາຄົມລາຄາແມ່ນພະແນກໂຍທາທິການກຳນົດ.

   ທ່ານ ບຸນຄໍ້າ ລາດຊະວົງ ໃຫ້ຮູ້ຕື່ມວ່າ: ສຳລັບບັນຫາທີ່ເຮັດໃຫ້ການບໍລິການພົບຄວາມຫຍຸ້ງຍາກປະຈຸບັນສ່ວນໃຫຍ່ເລື່ອງລາຄາເລື່ອງລົດບໍ່ຂຶ້ນທະບຽນເປັນຂອງສະ ມາຄົມທີ່ໄປຍາດລູກຄ້າຢູ່ຄິວ, ມີລົດຕູ້ບາງບໍລິສັດທ່ອງທ່ຽວມາຍາດຄິວ ແລະຍັງມີລົດຕູ້ຕ່າງແຂວງແລ່ນຮັບຜູ້ໂດຍສານຕື່ມອີກ.

  ສຳລັບພາລະບົດບາດຂອງສະມາຄົມແມ່ນຈັດຕັ້ງທາງສັງຄົມໂດຍມີພາລະບົດບາດສຶກສາອົບຮົມ ແລະເຕົ້າໂຮມຄວາມສາມັກຄີຊ່ວຍເຫຼືອເຊິ່ງກັນ ແລະກັນລະຫວ່າງສະ ມາຊິກ ແລະຊ່ວຍສັງຄົມບົນພື້ນຖານກົດໝາຍສາມາດຊ່ວຍບຸກຄົນປະກອບສ້າງວຽກເຮັດງານທຳຊ່ວຍພັດທະນາປະເທດຊາດລຶບລ້າງຄວາມທຸກຢ່າງຊຶ່ງໜ້າທີ່ບໍລິການແມ່ນເປັນແບບໃຫ້ເຊົ່າເໝົາພາຍໃນ ແລະຕ່າງປະເທດ, ບໍລິການຂາດຽວໄປກັບ ແລະນຳທ່ຽວໃນຕົວເມືອງ ແລະຕ່າງແຂວງ, ມີບໍລິການເປັນອາທິດ, ເດືອນ, ປີພ້ອມ ຄົນຂັບປະສົບການມີໃບຂັບຂີ່ ABC, ຖະບຽນວິສາຫະກິດເສຍອາກອນ, ໃບອະນຸຍາດແລ່ນລົດ, ໃບທະບຽນການຄ້າແລະກັນໄພລົດ.

ແນວໃດກໍ່ຕາມທິດທາງແຜນການຕໍ່ໜ້າທາງສະມາຄົມຈະຂະຫຍາຍຈຸດບໍລິການຫຼາຍຂຶ້ນປັບແຕ່ງລົດພາຍໃນ ແລະນອກເປັນວີໄອພີເພື່ອໃຫ້ລູກຄ້າໃຫ້ຄວາມສົນໃຈຫຼາຍຂຶ້ນ ທີ່ສຳຄັນທາງສະມາຄົມສ້າງຄວາມເຊື່ອໝັ້ນໃຫ້ລູກຄ້າມາໃຊ້ບໍລິການ, ຊື້ປະກັນໄພໃຫ້ນັກທ່ອງທ່ຽວທຸກຄັ້ງທີ່ໃຊ້ບໍລິການ ແລະເນັ້ນເລື່ອງຄົນຂັບ ແລະລົດໃຫ້ມີຄວາມເທົ່າທຽມພິເສດແມ່ນຈະເປີດນຳໃຊ້ແອບໂລກ້າທີ່ເຮັດໃຫ້ລູກຄ້າສາມາດໃຊ້ບໍລິການສະດວກຂຶ້ນ.

__________

ຂຽນໂດຍ: ບຸນນິກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์