ເປີດນຳໃຊ້ລະບົບ ບ53 ຢູ່ດ່ານສາກົນບໍ່ເຕ່ນ

  ກະຊວງການເງິນໄດ້ຈັດຕັ້ງພິທີເປີດການນໍາໃຊ້ລະບົບຈັດເກັບຄ່າທຳນຽມ ແລະຄ່າບໍລິການ (EasyPass) ແລະລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ ແລະພາຫະນະຂົນສົ່ງສິນຄ້າດ້ວຍລະບົບອີເລັກໂຕຣນິກ ບ53 ຜ່ານລະບົບທະນາຄານພັດທະນາລາວ (ທພລ) ຢູ່ດ່ານພາສີສາກົນບໍ່ເຕ່ນແຂວງຫຼວງນໍ້າທາຢ່າງເປັນທາງການໃນວັນທີ 30 ມັງກອນ 2020 ໂດຍການໃຫ້ກຽດເຂົ້າຮ່ວມຂອງທ່ານ ຄຳໄຫຼ ສີປະເສີດ ຮອງເຈົ້າ ແຂວງຫຼວງນໍ້າທາ, ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ, ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ, ທ່ານ ປອ ອາຄົມ ປຣະເສີດ ຜູ້ອຳນວຍການໃຫຍ່ ທພລ, ທ່ານ ມົນປະເສີດ ຄຳອ່ອນ ຜູ້ອຳນວຍການບໍລິສັດຄໍາປະເສີດ ຄອມພິວເຕີ ຈໍາກັດຜູ້ດຽວ ແລະຜູ້ຕາງ ໜ້າຈາກພາກສ່ວນກ່ຽວຂ້ອງທັງສູນກາງ-ທ້ອງຖິ່ນເຂົ້າຮ່ວມ.

   ການນໍາໃຊ້ລະບົບຈັດເກັບຄ່າທຳນຽມ, ຄ່າບໍລິການ ແລະ ລະບົບຄຸ້ມຄອງພາຫະນະດັ່ງກ່າວກໍ່ເປັນການຫັນທັນສະໄໝເຂົ້າໃນວຽກງານຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ໂດຍສະເພາະການນໍາໃຊ້ເຄື່ອງມືເຂົ້າໃນການຄຸ້ມຄອງການບໍລິການໆ​ເງິນພາກລັດຢູ່ສູນກາງກໍ່ຄືທ້ອງຖິ່ນຊຶ່ງເປັນວຽກທີ່ສໍາຄັນຫຼາຍໃຫ້ລັດຖະບານ ເພື່ອຍົກລະດັບການບໍລິການພາກລັດແລະອໍານວຍຄວາມສະດວກໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວ ແລະ ປະຊາຊົນໃນການຊໍາລະຄ່າທຳນຽມ-ຄ່າບໍລິການຜ່ານຊ່ອງ ທາງເຄື່ອງມືທີ່ທັນສະໄໝໂດຍຜ່ານລະບົບທະນາຄານ.

  ກະຊວງການເງິນໄດ້ສ້າງຕັ້ງສະຖາບັນພັດທະນາຂໍ້ມູນຂ່າວສານການເງິນເພື່ອເປັນເສນາທິການໃນການຄົ້ນຄວ້າ, ອອກແບບ, ພັດທະນາປັບປຸງລະບົບຮ່ວມກັບບັນດາກົມອ້ອມຂ້າງກະຊວງການເງິນ ແລະຂະແໜງການທີ່ກ່ຽວຂ້ອງຊຶ່ງເລີ່ມແຕ່ປີ2018 ເປັນຕົ້ນມາ ແລະໄດ້ພັດທະນາລະບົບຄຸ້ມຄອງຂໍ້ມູນຂ່າວສານລາຍຮັບສ່ວຍສາອາ ກອນ (TAXRIS) ແລະເຊື່ອມຕໍ່ກັບບັນດາທະນາຄານທຸລະກິດທີ່ອໍານວຍຄວາມສະດວກແກ່ການຊໍາລະພາສີ-ອາກອນຜ່ານທະນາຄານ (Easy Tax ແລະSmart Tax) ແລະປະຈຸບັນການເຊື່ອມຕໍ່ລະບົບດັ່ງກ່າວໄດ້ຍົກລະດັບຂຶ້ນເທື່ອລະກ້າວເພ່ືອຮັບຮອງການເຊື່ອມຕໍ່ຫາ 5 ທະນາຄານທຸລະກິດ ແລະເພີ່ມຊ່ອງທາງການຊໍາລະສໍາລັບຄ່າທຳນຽມທາງ-ອາກອນທີ່ດິນ ແລະໃນແຜນປີ 2020 ຈະໄດ້ເຊື່ອມຕໍ່ຫາລະບົບຊໍາລະສະສາງທຸລະກໍາຍ່ອຍ (ACH) ຂອງທະນາຄານ ແຫ່ງ ສປປ ລາວ ເພື່ອລວມສູນການເຊື່ອມຕໍ່ຊໍາລະສະສາງທະນາຄານທຸລະກິດທັງໝົດໃນຂອບເຂດທົ່ວປະເທດ.

 ທ່ານຫົວໜ້າຫ້ອງການກະຊວງການເງິນຊີ້ແຈງວ່າ: ການຄຸ້ມຄອງວຽກງານການເງິນແຫ່ງລັດໃຫ້ໄປສູ່ທັນສະໄໝເປັນຍຸດທະສາດໜຶ່ງທີ່ສຳຄັນຂອງລັດຖະບານ ແລະໄດ້ຮັບການເອົາໃຈໃສ່ຊີ້ນໍາຢ່າງໃກ້ສິດຈາກຄະນະນໍາກະຊວງການເງິນຊຶ່ງສະແດງອອກໃນການຮັບຮອງແຜນພັດທະນາວຽກງານການເງິນໃຫ້ເປັນທັນສະໄໝຂອງແຜນຍຸດທະສາດທີ 7 ວິໄສທັດຮອດປີ 2030 ເພື່ອເຮັດໃຫ້ການຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ມີຄວາມທັນສະໄໝ, ວ່ອງໄວ, ໂປ່ງໃສ ແລະກວດສອບ ໄດ້ພ້ອມກັນນີ້ເພື່ອຮັບປະກັນຄວາມປອດໄພຂອງຂໍ້ມູນ, ການແລກປ່ຽນຂໍ້ມູນຂະແໜງການເງິນກັບຂະແໜງການອື່ນໆໃຫ້ມີຄວາມໝັ້ນຄົງທາງດ້ານໂຄງລ່າງພື້ນຖານໄອທີຂອງຂະແໜງການເງິນພາກລັດ ແລະ ສອດຄ່ອງກັບແນວທາງນະໂຍບາຍມາດຕະຖານການພັດທະນາໄອທີໃນ ສປປ ລາວ, ພາກພື້ນ ແລະ ສາກົນຊຶ່ງການພັດທະ ນາລະບົບຄຸ້ມຄອງຂໍ້ມູນຂ່າວສານການເງິນແຫ່ງລັດມາແຕ່ປີ 1996 ເປັນການພັດທະນາພາຍໃນເພື່ອຄຸ້ມຄອງການຈັດຕັ້ງປະຕິບັດງົບປະມານ-ຄັງເງິນ.

  ໃນໄລຍະຕໍ່ມາ, ກະຊວງການເງິນໄດ້ຜັນຂະຫຍາຍການຄຸ້ມຄອງການເກັບລາຍຮັບພາສີ-ອາກອນ ແລະຄຸ້ມຄອງງົບປະມານແຫ່ງລັດ (ລາຍຮັບ-ລາຍຈ່າຍ) ແບບທັນ ສະໄໝໂດຍຮ່ວມມືກັບ ທພລ ພັດທະນາລະບົບ EasyPass ແລະບໍລິສັດ ຄໍາປະເສີດຄອມ ພິວເຕີຈໍາ ກັດຜູ້ດຽວພັດທະນາລະບົບຄຸ້ມຄອງພາຫະນະທ່ອງທ່ຽວຢ້ຽມ ຢາມ ແລະ ພາຫະນະຂົນສົ່ງສິນຄ້າດ້ວຍລະບົບອີເລັກໂຕຣນິກ ບ53 ຊຶ່ງເປັນຈຸດເລີ່ມຕົ້ນໃນການນໍາໃຊ້ເຄື່ອງມືທີ່ທັນສະໄໝເຂົ້າໃນການລວມສູນການເກັບຄ່າທຳນຽມ, ຄ່າບໍລິການທາງດ້ານວິຊາການ ແລະກອງທຶນຂອງລັດໃນຂອບເຂດທົ່ວປະເທດ ແລະທັງອຳນວຍຄວາມສະດວກໃຫ້ແກ່ຜູ້ໃຊ້ບໍລິການ, ນັກທ່ອງທ່ຽວເດີນທາງເຂົ້າ-ອອກ ສປປ ລາວ ໃນການຊໍາລະຜ່ານຊ່ອງທາງເຄື່ອງມືທີ່ທັນສະໄໝຜ່ານລະບົບທະນາຄານໂດຍໃຫ້ບໍລິການຈັດເກັບຄ່າທຳນຽມ, ຄ່າບໍລິການທີ່ກ່ຽວຂ້ອງກັບຂະແໜງການເງິນກ່ອນໃນນີ້ມີຄ່າທໍານຽມວິຊາກັບດ່ານ, ຄ່າທຳນຽມ-ບໍລິການຄົນເຂົ້າ-ອອກເມືອງ ແລະ ພາຫະນະ (ບ 53); ຈາກນັ້ນ, ກໍ່ຈະສືບຕໍ່ຂະຫຍາຍບໍລິການການເກັບຄ່າທໍານຽມ-ຄ່າບໍລິການທີ່ຕິດພັນກັບຂະແໜງການທີ່ກ່ຽວຂ້ອງ.​

  ທ່ານ ປອ ອາຄົມ ປຣະເສີດ, ຜູ້ອຳນວຍການໃຫຍ່ ທພລ ໄດ້ໃຫ້ເຫດຜົນ ການເລີ່ມຕົ້ນສຳຫຼວດຂໍ້ມູນດ້ວຍການຄົ້ນຄວ້າ ແລະພັດທະນາລະບົບຕາມວັດຖຸປະສົງຂອງກະຊວງການເງິນ ໂດຍມຸ່ງ ເປົ້າໝາຍພັດທະນາໃຫ້ສາມາດລວມສູນຄ່າທຳນຽມ ແລະຄ່າບໍລິການຢູ່ດ່ານສາ ກົນທີ່ສາມາດຕິດຕາມລາຍຮັບງົບປະມານໄດ້ຕະຫຼອດ 24 ຊົ່ວໂມງຜ່ານຄອມພີວເຕີ ແລະໂທລະສັບມືຖືຜ່ານການທົດລອງ 7 ເດືອນຜ່ານມາມີຫຼາຍອັນພົ້ນເດັ່ນໃນການເກັບລາຍຮັບເຂົ້າງົບປະມານສູນກາງມີລັກສະນະເພີ່ມຂື້ນໃນແຕ່ລະເດືອນ ແລະຈຸດເດັ່ນທີ່ສຳຄັນໃນການພັດທະນາລະບົບ Easy Pass ກໍ່ແມ່ນ ສປປ ລາວ ເປັນປະເທດໃນແຖວໜ້າຂອງໂລກທີ່ສາມາດຊຳລະຄ່າທຳນຽມວິຊາກັບດ່ານແບບບໍ່ໃຊ້ເງິນສົດດ້ວຍລະບົບແອັບ AliPay ຊຶ່ງເປັນ Application ຍອດນິຍົມທີ່ສຸດຂອງປະຊາຊົນຈີນ.

  ເພື່ອສະໜອງແຜນຍຸດທະຍາດຫັນເປັນທັນສະໄໝໃນການເກັບຄ່າທຳນຽມ ແລະຄ່າບໍລິການຢູ່ດ່ານສາກົນ Easy Pass, ທພລມີແຜນພັດທະນາລະບົບໃນໄລຍະທີ 2 ໂດຍຈະສູ້ຊົນໃຫ້ສຳເລັດພາຍໃນເດືອນເມສາ ປີ 2020 ແລະ ອຳນວຍຄວາມສະດວກໃຫ້ແກ່ເດີນທາງ ດ້ວຍການນຳໃຊ້ຕູ້ KIOSK ເພື່ອຮອງຮັບການຮັບຊຳລະຄ່າທຳນຽມ ແລະ ຄ່າບໍລິການໃຫ້ຫຼາຍຊ່ອງທາງເພື່ອຫຼຸດຜ່ອນການນຳໃຊ້ເງິນສົດໂດຍການຊຳລະຜ່ານ LDB Trust, LDB Wallet ແລະ ການຮັບຊຳລະດ້ວຍບັດສາ ກົນມີບັດ VISA, MASTER ແລະ ອື່ນໆ.

__________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์