ທ່ຽວຊົມຍອດຊວງແດນເນລະມິດ

  ຍອດຊວງແດນເນລະມິດກໍແມ່ນອີກສະຖານທີ່ທ່ອງທ່ຽວແຫ່ງໜຶ່ງທີ່ໂດດເດັ່ນ ແລະສວຍສົດງົດງາມ, ຕັ້ງຢູ່ບໍລິເວນນໍ້າຊວງເຂດບ້ານໃໝ່,ເມືອງໂພນໂຮງ,ແຂວງວຽງ ຈັນ, ໂດຍໃຊ້ເວລາໃນການເດີນທາງຈາກນະຄອນຫຼວງວຽງຈັນ ຕາມເສັ້ນທາງເລກທີ 13 ເໜືອໄປປະມານ 50 ນາທີ ກໍຮອດ,ຊຶ່ງໄດ້ຮັບການພັດທະນາ, ປັບປຸງປົວແປງ ແລະຕໍ່ເຕີມເສີມສ້າງສະຖານທີ່ພັກຜ່ອນຢ່ອນໃຈ, ບ່ອນຊົມວິວ ແລະຮ້ານອາຫານບໍລິການເຄື່ອງດື່ມຕ່າງໆ ເພື່ອຮອງຮັບນັກທ່ອງທ່ຽວເຂົ້າມາທ່ຽວຊົມທີ່ມີສະຖານ ທີ່ທ່ຽວຊົມຢ່າງກວ້າງຂວາງຍາວຢຽດເລາະລຽບໄປຕາມຍອດຫ້ວຍນໍ້າຊວງ.

  ຍອດຊວງແດນເນລະມິດເປັນສະຖານທີ່ທ່ອງທ່ຽວທໍາມະຊາດແຫ່ງທໍາອິດຂອງເມືອງໂພນໂຮງ ແຂວງວຽງຈັນ ທີ່ໄດ້ຮັບການພັດທະນາໃຫ້ມີສີສັນແບບໃໝ່ໂດຍຕິດພັນກັບທໍາມະຊາດທີ່ມີອາກາດປອດໂປ່ງສົດໃສ, ເໝາະແກ່ການມາທ່ຽວຊົມ ແລະພັກຜ່ອນຢ່ອນໃຈ, ເມື່ອທ່ານໄປຮອດກໍຈະສັງເກດເຫັນຕູບນ້ອຍລຽນຊ້າຍຢັງຢາຍກັນໄປໄວ້ຄອຍບໍລິການໃຫ້ຜູ້ມາທ່ຽວຊົມໄດ້ແວ່ຜ່ອນຄາຍຄວາມອິດເມື່ອຍມານັ່ງກິນອາຫານແຊບໆແລະດື່ມນໍ້າ-ເບຍເຢັນໆ ແລະຟັງເພງມ່ວນໆ, ສ່ວນຢູ່ຕາມເດີນຫຍ້າຮາບພຽງກໍຈະມີເຕັ້ນຄູ່ ແລະເຕັ້ນດ່ຽວໄວ້ເປັນບ່ອນພັກແຮງສໍາລັບນັກທ່ອງທ່ຽວ,ນອກຈາກນັ້ນ, ນັກທ່ອງທ່ຽວຍັງມີກິດຈະກໍາຂີ່ເຮືອຊົມວິວຄ້ອຍຄໍ່າຍາມແລງພະອາທິດໃກ້ຈະດັບແສງເພື່ອສໍາພັດກັບບັນຍາກາດແບບສະບາຍໆທີ່ມີອາກາດສົດຊື່ນ ແລະເຢັນດີເຮັດໃຫ້ຫາຍຈາກຄວາມຕຶງຄຽດ ແລະອິດເມື່ອຍ.

---------

  ຍອດຊວງແດນເນລະມິດ, ເປັນສະຖານທີ່ທ່ອງທ່ຽວທີ່ໂດດເດັ່ນ ແລະສວຍສົດງົດງາມແລ້ວແບບຍືນຍົງ ແລະອະນຸລັກຮັກສາສິ່ງແວດລ້ອມໂດຍປະປາຊົນມີສ່ວນຮ່ວມ ຈຶ່ງກາຍເປັນບ່ອນສ້າງວຽກເຮັດງານທໍາໃຫ້ປະຊາຊົນບັນດາເຜົ່າໃນພື້ນທີ່ແຫ່ງດັ່ງກ່າວໄດ້ມີລາຍຮັບມາໃຫ້ຄອບຄົວມີຢູ່ມີກິນເພື່ອຫຼຸດພົ້ນຈາກຄວາມທຸກຍາກເທື່ອລະກ້າວ.

____________

ຂຽນໂດຍ: ຊາຍພະເນຈອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 31/01/2020