ແຫຼ່ງທີ່ມາຂອງການລະບາດໄວຣັສຄັ້ງໃຫຍ່ໃນຮອບເກືອບ 20 ປີ

  ສຳນັກຂ່າວອອນລາຍຕ່າງປະເທດລາຍງານວ່າ ການແຜ່ລະບາດຂອງເຊື້ອໄວຣັສສ່ວນຫຼາຍ ແມ່ນມາຈາກສັດ ກ່ອນການແຜ່ລະບາດຂອງພະຍາດເຂົ້າໄປໃນຮ່າງກາຍຂອງມະນຸດ 'SARS' ຫຼືພະຍາດລະບົບຫາຍໃຈຮ້າຍແຮງ ທີ່ເກີດຈາກເຊື້ອໄວຣັສໃນຕະກຸນໂຄໂຣນາ ເຊັ່ນ SARS-CoV ເຊິ່ງເຄີຍແຜ່ລາມຢ່າງຫຼວງຫຼາຍໃນປີ 2003 ແມ່ນມາຈາກການຕິດເຊື້ອໃນໂຕເຈຍ ລວມທັງສັດຈຳພວກຊະມົດ ແລະອີເຫັນ.

  ໃນຂະນະທີ່ເຊື້ອໄຂ້ຫວັດໃຫຍ່ສາຍພັນໃໝ່ (ໄຂ້ຫວັດໝູ) ທີ່ເກີດຈາກເຊື້ອໄວຣັສ 2009 / H1N1 ກໍມີລັກສະນະທາງສາຍພັນທຸກຳ ຂອງໄວຣັສທີ່ມາຈາກສັດຈຳພວກສັດປີກ ແລະໝູ ກ່ອນທີ່ຈະມີການລະບາດຄັ້ງໃຫຍ່ໃນປີ 2009 ມີຜູ້ຕິດເຊື້ອຫຼາຍກວ່າ 130 ປະເທດທົ່ວໂລກ.

  ໄວຣັສ MERS-CoV ທີ່ມີຕົ້ນກຳເນີດມາຈາກສັດຈຳພວກເຈຍ ກ່ອນທີ່ຈະມີອູດ ເປັນຕົວກາງ ເພື່ອສົ່ງເຊື້ອໄວຣັສໄປສູ່ຄົນ ໃນຂະນະທີ່ເຊື້ອໄວຣັສອີໂບລາ ແລະເຊື້ອໄວຣັສຊິກາ ແມ່ນເກີດມາຈາກການຕິດເຊື້ອ ແລະແຜ່ລາມໄປໃນສັດເຊັ່ນ ລີງ ແລະຍຸງຕາມລຳດັບ ກ່ອນຈະເກີດການຕິດເຊື້ອໃນມະນຸດ ແລະເຮັດໃຫ້ຄົນເສີຍຊີວິດເປັນຈຳນວນຫຼາຍ.

  ເຊື້ອໄວຣັສສາຍພັນໃໝ່ (2019-nCoV) ທີ່ເຮັດໃຫ້ລະບົບທາງເດີນຫາຍໃຈຂອງຜູ້ຕິດເຊື້ອ ແມ່ນຜິດປົກກະຕິ ແລະອາການຂອງພະຍາດປອດອັກເສບຮ້າຍແຮງ ຈົນເຖິງຂັ້ນເສຍຊີວິດໃນເວລານີ້. ເບື້ອງຕົ້ນມີການສັັນນິຖານວ່າ ເກີດຈາກສັດທີ່ຕິດເຊື້ອ ແລະຖືກນຳມາຂາຍຢູ່ຕະຫລາດຂາຍອາຫານທະເລສົ່ງ ໃນເມືອງອູ່ຮັ່ນ ແຂວງຫູເປີ່ຍ ຂອງ ສປ ຈີນ. ຜົນການສຶກສາຫຼ້າສຸດ ທີ່ລົງໃນວາລະສານ Journal of Medical Virology ສະແດງໃຫ້ເຫັນວ່າ ເຊື້ອໄວຣັສໂຄໂຣນາຊະນິດໃໝ່ ແມ່ນກ່ຽວພັນກັນຢ່າງໃກ້ຊິດ ກັບລັກສະນະທາງພັນທຸກຳ ຂອງໄວຣັສ SARS ແລະ MERS ທີ່ມາຈາກເຈຍ, ກ່ອນທີ່ຈະຄົ້ນພົບວ່າ ລັກສະນະຕົວຮັບຂອງເຊື້ອໄວຣັສທີ່ກາຍພັນນີ້ ແມ່ນຄ້າຍຄືກັບໄວຣັສໂຄໂຣນາທີ່ພົບໃນງູ ໂດຍສະເພາະແມ່ນງູເຫົ່າຈີນ ອາດຈະເປັນສັດຕົວກາງ ທີ່ສົ່ງຕໍ່ໄວຣັສໂຄໂຣນາ ທີ່ເກີດການກາຍພັນຈາກເຈຍ ກັບເຂົ້າສູ່ຮ່າງກາຍຂອງມະນຸດ.

แชร์