ແຜ່ນດີນໄຫວລະດັບ 7,7 ສັ່ນສະເທືອນທະເລຄາຣິບບຽນ ມີການເຕືອນໄພຄື້ນສຸນາມິ

  ສຳນັກສຳຫຼວດທໍລະນີສາດແຫ່ງຊາດຂອງອາເມລິກາ ລາຍງານວ່າ: ເວລາປະມານ 2:10 ໂມງ ຂອງວັນພຸດ ທີ 29 ມັງກອນ 2020 ເວລາປະເທດລາວ ໄດ້ເກີດແຜ່ນດິນໄຫວລະດັບ 7,7 ແມັກນິຈູດ ໃນທະເລຄາຣິບບຽນ ສູນກາງແມ່ນຢູ່ລະຫວ່າງປະເທດຈາໄມກາ, ໝູ່ເກາະເຄແມນ ແລະປະເທດຄິວບາ ທີ່ມີຄວາມເລິກ 10 ກິໂລແມັດ.

 ໃນຂະນະທີ່ ບີບີຊີ ກ່າວວ່າ ແຜ່ນດິນໄຫວຄັ້ງນີ້ ໄດ້ເຮັດໃຫ້ຕຶກອາຄານຕ່າງໆໃນເມືອງຮາວານາ ຂອງຄິວບາ ແລະ ເມືອງຄິງສຕັນ ຂອງຈາໄມກາ ສັ່ນໄຫວ. ນອກຈາກນັ້ນ, ແຮງສັ່ນສະເທືອນ ຍັງຮູ້ສຶກໄດ້ເຖິງ ເມືອງໄມອາມີ ໃນລັດຟໍຣິດາ ຂອງອາມເລິກາ ແຕ່ຍັງບໍ່ມີການລາຍງານຜູ້ບາດເຈັບ ຫລືເສຍຊີວິດ.

  ສູນເຕືອນໄພຄື້ນສຸນາມິໃນເຂດປາຊີຟິກ (PTWC) ໄດ້ປະກາດເຕືອນໄພຄື້ນສຸນາມິ ໃນບໍລິເວນຊາຍຝັ່ງທະເລພາຍໃນລັດສະໝີ 300 ກິໂລແມັດ ຈາກຈຸດສູນກາງທັນທີ ເຊິ່ງບັນດາຂົງເຂດທີ່ຕ້ອງໄດ້ຮັບການເຝົ້າລະວັງ ລວມມີປະເທດເບລີ, ຄິວຢາ, ຮອນດູຣັສ, ເມັກຊິໂກ, ໝູ່ເກາະເຄແມນ ແລະ ຈາໄມກາ.

ພາຍຫຼັງເກີດເຫດ, ລັດຖະບານໝູ່ເກາະເຄແມນ ໄດ້ຂຽນຂໍ້ຄວາມລົງໃນ Twitter ເຕືອນປະຊາຊົນໃຫ້ຢູ່ຫ່າງຈາກເຂດແຄມຝັ່ງທະເລໂດຍດ່ວນ.

แชร์