ຜະລິດເບຕົງສໍາເລັດຮູບຂາຍສ້າງລາຍຮັບມາໃຫ້ຄອບຄົວ

  ການຜະລິດເບຕົງສໍາເລັດຮູບຂາຍກໍແມ່ນອີກອາຊີບໜຶ່ງທີ່ປະຊາຊົນຄົນລາວເຮົານິຍົມ ແລະຫັນມາເຮັດອາຊີບນີ້ຢ່າງຫຼວງຫຼາຍຈົນກາຍເປັນມືອາຊີບທີ່ພົ້ນເດັ່ນຂຶ້ນຢູ່ໃນສັງຄົມສາມາດສ້າງລາຍຮັບມາໃຫ້ຄອບຄົວຢ່າງໜ້າເພິ່ງພໍໃຈ ແລະແກ້ໄຂຊີວິດການເປັນຢູ່ພາຍໃນຄອບຄົວໄດ້ຢູ່ມີກິນສາມາດນໍາພາຄອບຄົວຫຼຸດພົ້ນອອກຈາກຄວາມທຸກ ຍາກເທື່ອລະກ້າວ.

 ເໝືອນດັ່ງຄອບຄົວຂອງທ່ານ ນາງ ມະລິສາຄອນ ພັນທະວົງ ຢູ່ບ້ານອາມອນ ເມືອງໄຊເຊດຖາ ນະຄອນຫຼວງວຽງຈັນ ໄດ້ມີທຸລະກິດຜະລິດເບຕົງສໍາເລັດຮູບຂາຍ ເປັນຂອງຕົນເອງ, ຊຶ່ງຜູ້ກ່ຽວໄດ້ ໃຫ້ຮູ້ວ່າ: ທຸລະກິດດັ່ງກ່າວນີ້ແມ່ນ ໄດ້ດໍາເນີນມາແຕ່ປີ 2009 ເປັນ ທຸລະກິດແບບຄອບຄົວ, ໂດຍໄດ້ ປະຄັບປະຄອງມາເປັນເວລາ 10 ປີ ບົນເສັ້ນທາງເດີນໃນການດໍາ ເນີນທຸລະກິດຢ່າງລະອິດລະອ້ຽວ, ຊຶ່ງບາງໄລຍະກໍເກືອບບໍ່ມີລູກຄ້າ ເຂົ້າມາສັ່ງ ແລະຊື້ຜະລິດຕະພັນ ເລີຍ, ອີກຢ່າງໜຶ່ງທຸລະກິດແບບນີ້ ໄດ້ເກີດຂຶ້ນຢູ່ຫຼາຍແຫ່ງ ແລະ ເຮັດໃຫ້ມີຄູ່ແຂ່ງຫຼາຍຂຶ້ນ, ແຕ່ຕົນເອງພ້ອມຄອບຄົວກໍບໍ່ຫວັ່ນໄຫວຕໍ່ເຫດການດັ່ງກ່າວພ້ອມທັງຕັດສິນໃຈສູ້ຕໍ່ໄປ ແລະ ໃຊ້ຄວາມພະຍາ ຍາມ,ຄວາມມານະອົດທົນ ແລະຄວາມພາກພຽນເຮັດໃຫ້ດີທີ່ສຸດ,ສໍາຄັນ ກໍຄືຄວາມຊື່ສັດບໍລິສຸດຕໍ່ກັບລູກຄ້າ, ບໍລິການລູກຄ້າດ້ວຍຄວາມ ໂປ່ງໃສ, ຜະລິດສິນຄ້າໃຫ້ມີຄຸນນະພາບ ແລະໄດ້ມາດຕະຖານຜະລິດ ຕາມລູກຄ້າສັ່ງຈອງ ແລະບໍລິການ ສົ່ງເຖິງທີ່ຈາກນັ້ນ, ຈຶ່ງເຮັດໃຫ້ ລູກຄ້າຈາກຫຼາຍບ້ານ ແລະຫຼາຍ ຕົວເມືອງເຂົ້າມານໍາໃຊ້ບໍລິການ ນໍາພວກເຮົານັບມື້ຫຼາຍຂຶ້ນ, ເຮັດ ໃຫ້ທຸລະກິດມີການເຕີບໃຫຍ່ຂະຫຍາຍຕົວຂຶ້ນກວ່າເກົ່າ, ຊຶ່ງໃນ ເມື່ອກ່ອນມີກໍາມະກອນພຽງ 2 ຄົນ ແລະເຮັດວຽກຍັງບໍ່ທັນຊໍາ ນານທັງເຮັດທັງຮຽນໄປນໍາ, ມາຮອດດຽວນີ້ມີກໍາມະກອນເພີ່ມຂຶ້ນ ເຖິງ 5 ຄົນ ທີ່ມີຄວາມຊໍານານ ງານແບບມືອາຊີບ, ມີເຄື່ອງຈັກ ໂມ້ປູນ 3 ເຄື່ອງ, ລົດຍົກ 1 ຄັນ, ລົດບັນທຸກ 1 ຄັນ ແລະສາມາດ ສ້າງລາຍຮັບໄດ້ປະມານ 30 ລ້ານ ກີບຕໍ່ປີ, ຜະລິດຕະພັນທີ່ເຮັດມີຄື: ຫຼໍ່ເສົາເຮືອນ-ເສົາຫຼັກຮົ້ວ, ຫຼໍ່ທໍ່ລອດພື້ນ, ແທ້ງສ້າງ, ດິນບ໋ອກ, ຜາປິດຮ່ອງລະບາຍນໍ້າ ແລະຫຼໍ່ຂອບ ທາງຟຸດບາດ ຊຶ່ງຜະລິດຕະພັນແຕ່ ລະປະເພດມີຫຼາຍຂະໜາດຕາມລູກຄ້າສັ່ງຈອງ.

 ທຸລະກິດຜະລິດຊິ້ນສວນເບຕົງຂອງຄອບຄົວທ່ານນາງ ມະລິ ສາຄອນ ພັນທະວົງ ໄດ້ກາຍເປັນອາຊີບທີ່ດີ ແລະໝັ້ນຄົງຖາວອນ, ສາມາດພັດທະນາຄອບຄົວໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວພ້ອມທັງສ້າງວຽກເຮັດງານທໍາໃຫ້ກໍາມະກອນ ແລະລູກຫຼານໄດ້ມີລາຍຮັບເປັນຂອງຕົນເອງມາຮອດດຽວນີ້, ແມ່ນໄດ້ກາຍເປັນຄອບຄົວຕົວແບບທາງດ້ານການຜະລິດເບຕົງສໍາເລັດຮູບປະຈໍາບ້ານອາມອນ ເມືອງໄຊເຊດຖາ ນະຄອນຫຼວງວຽງຈັນ.

_____________

ຂຽນໂດຍ: ຊາຍພະເນຈອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์