ທນບ ເຊື່ອມຊຶມມະຕິ 9 ສະໄໝທີ X ຂອງພັກ

 ຄະນະພັກຮາກຖານ-ຄະນະອຳ ນວຍການທະນາຄານນະໂຍບາຍ (ທນບ) ໄດ້ຈັດຕັ້ງການເຜີຍແຜ່ ແລະເຊື່ອມຊຶມມະຕິ 9 ສະໄໝທີ X ຂອງພັກ, ບັນດານິຕິກຳຂອງຂັ້ນເທິງ ແລະລະນຶກວັນສ້າງຕັ້ງ ທນບ ຄົບຮອບ 13 ປີໃນວັນ ທີ 29 ມັງກອນ 2020 ໂດຍການໃຫ້ກຽດເຂົ້າຮ່ວມຂອງ ສະຫາຍ ວຸດທິ ເລື່ອນວິໄລວົງ ຄະນະພັກທະ ນາຄານ ແຫ່ງ ສປປ ລາວ (ທຫລ), ເລຂາຄະນະພັກຮາກຖານ-ຜູ້ອຳນວຍການ ທນບ; ບັນດາສະຫາຍຄະນະພັກຮາກຖານ-ຄະນະໜ່ວຍພັກ, ສະມາຊິກພັກ ແລະພະນັກງານຫຼັກແຫຼ່ງ ທນບ ເຂົ້າຮ່ວມ.

  ການເຊື່ອມຊຶມໃນຄັ້ງນີ້, ສະຫາຍເລຂາຄະນະພັກຮາກຖານ ທນບ ໄດ້ນຳສະເໜີມະຕິສະບັບເລກທີ 058/ກມສພ ລົງວັນທີ13/12/2018 ວ່າດ້ວຍການຄົ້ນຄວ້າແນວຄິດ ໄກສອນ ພົມວິຫານ; ບົດແນະນຳສະບັບເລກທີ 12/ສພວສ ລົງວັນທີ 13/05/ 2019 ກ່ຽວກັບການຈັດຕັ້ງປະຕິບັດມະຕິເລກທີ 058/ກມສພ; ຈາກນັ້ນ, ສະຫາຍ ແສງເພັດ ດວງພິລາ ປະທານກວດກາຄະນະພັກຮາກຖານໄດ້ນຳສະເໜີບົດຄວາມເຫັນພິທີສະເຫຼີມສະຫຼອງວັນຕ້ານການສໍ້ລາດບັງຫຼວງສາກົນຄົບຮອບ 16 ປີ;ຄຳສັ່ງສະບັບເລກ ທີ 064/ກມສພ ລົງວັນທີ 9/04/2019 ວ່າດ້ວຍວຽກງານຂະຫຍາຍພັກ; ຄຳແນະນຳເລກທີ 201/ຄຈສພລົງວັນທີ 29/10/2019 ກ່ຽວກັບການຈັດຕັ້ງປະຕິບັດຄຳສັ່ງເລກທີ 064/ກມສພ.

   ໃນໂອກາດດັ່ງກ່າວ; ສະຫາຍເລຂາຄະນະພັກຮາກຖານ ທນບ ໄດ້ເລົ່າຄືນມູນເຊື້ອແຫ່ງການເຄື່ອນໄຫວຂອງ ທນບ ໃນຕະຫຼອດໄລຍະ 13 ປີຜ່ານມາ (29/01/ 2007-2 9/01/2020) ໂດຍການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງພັກ, ແຜນຍຸດທະສາດກ່ຽວກັບການພັດທະນາຊົນ ນະບົດ, ແກ້ໄຂຄວາມທຸກຍາກ ແລະແຜນພັດທະນາເສດຖະກິດ-ສັງຄົມ ຄັ້ງທີ VI ຂອງລັດຖະບານ ຊຶ່ງ ເບື້ອງຕົ້ນ ທນບ ມີ 1 ສໍານັກງານໃຫ່ຍ, 5 ສາຂາ ແລະ 18 ໜ່ວຍບໍລິການທີ່ໄດ້ຕັ້ງໜ້າປະກອບສ່ວນແກ້ໄຂຄວາມທຸກຍາກໃຫ້ແກ່ປະຊາຊົນໃນ 47 ເມືອງທຸກຍາກ ແລະ ມາຮອດທ້າຍປີ 2010 ໄດ້ຂະຫຍາຍຕາໜ່າງການບໍລິ ການອອກ 46 ໜ່ວຍບໍລິການເພີ່ມຂຶ້ນ 28 ໜ່ວຍບໍລິການເທົ່າກັບ 255% ທຽບໃສ່ປີ 2007 (18 ໜ່ວຍບໍລິການ)ທີ່ສະໜອງສີນເຊື່ອເຂົ້າໃນເມືອງເປົ້າໝາຍຂອງລັດຖະບານລັດຖະບານ-ທ້ອງຖິ່ນຢ່າງໄດ້ຮັບຜົນສຳເລັດເປັນກ້າວໆເຮັດໃຫ້ຄວາມທຸກຍາກຂອງປະຊາຊົນບັນດາເຜົ່າໄດ້ຫຼຸດລົງເທື່ອລະກ້າວ; ພ້ອມນີ້,ຍັງປັບປຸງໂຄງຮ່າງການຈັດຕັ້ງພາຍໃນທາງດ້ານປະລິມານ ແລະຄຸນນະພາບໃຫ້ມີຄວາມເຕີບໃຫຍ່ເຂັ້ມແຂງ ແລະທັນສະໄໝຕາມທິດຂອງຂັ້ນເທິງ.

   ມາຮອດທ້າຍປີ 2019 ທນບ ມີຍອດສິນເຊື່ອທັງໝົດ 2.936 ຕື້ກວ່າກີບ ເພີ່ມຂຶ້ນ 240,81 ຕື້ກີບ ເທົ່າກັບ 9% ທຽບໃສ່ຕົ້ນປີ2016 ໃນນັ້ນມີສິນເຊື່ອເມືອງ ເປົ້າໝາຍ 1.903 ຕື້ກວ່າກີີບ, ມີ 17 ແຂວງ, 1 ນະຄອນຫຼວງ, 71 ເມືອງເປົ້າໝາຍ, 3.505 ບ້ານ, ຈັດຕັ້ງກຸ່ມການຜະລິດໄດ້ 25.883 ກຸ່ມ, ຄອບຄົວເຂົ້າ ເຖິງ 189.881 ຄອບຄົວ, ສິນເຊື່ອຈຸດ ສຸມລັດຖະບານ-ທ້ອງຖິ່ນ320,28 ຕື້ກີບ, 17 ແຂວງ, 1 ນະຄອນຫຼວງ, 59 ເມືອງ, 444 ບ້ານ, 3.481 ກຸ່ມການຜະລິດ, 28.195 ຄອບຄົວ, ສິນເຊື່ອບ້ານ 3 ສ້າງ 296.38 ຕື້ກີບ, 17 ແຂວງ, 1 ນະຄອນຫຼວງ, 79 ເມືອງ, 192 ບ້ານ, 3.782 ກຸ່ມການຜະລິດ, 29.195 ຄອບຄົວ ແລະໂຄງການຜະລິດເປັນສິນຄ້ານອກເມືອງເປົ້າໝາຍ 416,75 ຕື້ກີບ.

   ໃນຕະຫຼອດໄລຍະ 13 ປີ, ທນບ ໄດ້ສະໜອງສິນເຊື່ອໃຫ້ແກ່ປະຊາຊົນເປັນຈໍານວນເງິນທັງໝົດ 6.464 ຕື້ກວ່າກີບ ສາມາດເຂົ້າເຖິງ 17 ແຂວງ, 1 ນະຄອນ ຫຼວງ,120 ເມືອງ,ເມືອງທີ່ບໍ່ທັນພົ້ນທຸກ 23 ເມືອງ, ເຂົ້າເຖິງບ້ານທັງໝົດ 3.975 ບ້ານ, ເຂົ້າເຖິງຄອບຄົວທັງໝົດ: 191.484 ຄອບຄົວ, ເຫັນໄດ້ວ່າປະຊາຊົນໃນເຂດຊົນນະບົດຫ່າງໄກສອກຫຼີກນັບມື້ນັບໄດ້ຮັບການພັດທະນາຫຼາຍຂຶ້ນ, ປະຊາຊົນສ່ວນຫຼາຍໄດ້ເຂົ້າເຖິງແຫຼ່ງທຶນຂອງ ທນບ ເພື່ອພັດທະນາຄອບຄົວໃຫ້ມີລາຍຮັບເຮັດໃຫ້ຊີວິດການເປັນຢູ່ດີຂຶ້ນກວ່າເກົ່າ, ຖ້າທຽບໃສ່ເມື່ອກ່ອນມີຫຼາຍເມືອງ, ຫຼາຍບ້ານ ແລະຫຼາຍຄອບຄົວໄດ້ຫຼຸດພົ້ນອອກຈາກຄວາມທຸກຍາກ, ປະຈຸບັນຄອບຄົວທຸກ ຍາກເຫຼືອພຽງ 64.549 ຄອບຄົວ ຂອງຄອບຄົວທັງໝົດໃນທົ່ວປະເທດ,ບ້ານທຸກຍາກເຫຼືອ ພຽງ1.536 ບ້ານ ຂອງຈໍານວນບ້ານທັງໝົດໃນທົ່ວປະເທດ ແລະເມືອງທຸກຍາກເຫຼືອພຽງ 23 ເມືອງ, ສັງລວມແລ້ວ ທນບ ໄດ້ເປັນສ່ວນໜຶ່ງໃນການປະກອບສ່ວນດ້ານແຫຼ່ງທຶນເຂົ້າໃນການພັດທະນາຊົນນະບົດເປັນຕົ້ນແມ່ນການສະໜອງ ສິນເຊື່ອເຂົ້າໃນເມືອງເປົ້າໝາຍ, ເຂດຈຸດສຸມລັດຖະບານ-ທ້ອງຖິ່ນ, ບ້ານ 3 ສ້າງ ທີ່ໄດ້ຮັບສິນເຊື່ອຫຼາຍຂຶ້ນເທື່ອລະກ້າວ.

 ____________

ຂຽນໂດຍ: ຣັດສະໝີ ດວງສັດຈະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์